Sabtu, 29 Maret 2014

Antara Musim Hujan ka Musim Kamarau



TVRI Kalsel, Banjarbaru -- BMKG manangguh, bulan ampat kaina di banua Kalimantan Selatan magun haja musim hujan. Tagal, hujannya kada labat banar jua, kada nang kaya bulan satu samalam, nang sawat maulah tanah rumbih di Tanah Bumbu, ba’ah di Hulu Sungai wan Banjarbaru.

Ujar kapala ahui BMKG Kalimantan Selatan, Purwanto, hujan nang turun bulan ampat kaina saku biasa haja, kada labat banar jua. Wayah ini rahat ma’antara: antara musim hujan ka musim kamarau. Ujarnya, musim kamarau saku bulan lima inggan bulan lapan dihadap.

Antara musim hujan ka musim kamarau, mun siang liwar panas atawa humap, malamnya rajin hujan. Artinya, musim parak baganti. Antara bulan talu ka bulan ampat kaina, hujan magun haja nang kaya rajin.

Warga banua Banjar nang diam di tabing laut, Kotabaru, Tanah Bumbu wan Tanah Laut, musti hati-hati, kalu pina ada tabing rumbih wan ba’ah. Ba’ah bisa haja timbul marga hujan nang saling labatan, alam lingkungan nang rusak, hutan habisan wan saluran banyu nang buntu kada diharagu. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 30/03/2014, Pukul Lima kamarian. Matan Banjarbaru, Nurdin Yusuf, TVRI Kalimantan Selatan, mahabarakan.) 

Parcitakan Kada Kasandangan



TVRI Kalsel, Banjarmasin -- Musim kampanyi sudah saminggu labih, tagal magun haja banyak partai pulitik wan calun wakil rakyat nang batampah bahan sagan kampanyi Pamilu di parcitakan. Ayungannya, parcitakan kada kasandangan, kabanyakan gawian.

Sabaluman minggu tanang, bubuhan parcitakan bilang kada kasantakan hinak. Banyak nang minta ulahakan spanduk wan bandira partai. Marga kada kaawakan, bahanu paksa bubuhan parcitakan baindah, takutan kalu pina gawian kada tuntung.

Ujar urang parcitakan, Tajudin Noor, anak buahnya paksa balantak, bagawi siang-malam, sakira tampahan urang tuntung. Tagal, inya kada wani lagi maulahakan baliho, marga wadah nang sagan maandaknya sudah hibak. Nang digawinya kartu nama wan stiker calun wakil rakyat wan calun DPD RI asal haja. Nang batampah kada calun wakil rakyat di banua haja, ada jua nang matan Kalimantan Tengah. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 30/03/2014, Pukul Lima kamarian. Ratna Sari Dewi, Junaedi, TVRI Kalimantan Selatan, mahabarakan.) 

Surat Suara Pamilu Siap Dibagi



TVRI Kalsel, Banjarmasin -- KPU Kalimantan Selatan siap manggawi Pamilu tanggal 9 April dihadap. Sapuluh hari sabaluman Pamilu, surat suara, wadah surat suara wan sarabanya nang sagan Pamilu, cagar dibagi.

Ujar puhun gawi KPU Kalimantan Selatan, Riza Jihadi, samunyaan sudah siap, tinggal mahadang kiriman kartu suara mudil “C” haja lagi, sagan calun DPR RI nang matan banua. Sakira kada tapiasat, surat suara wan wadah surat suara sagan PPS wan PPK nang di gunung, di subarang laut wan di unjut banua, cagar dikirim badahulu.

Kada bahan-bahan nang sagan mancucuk haja nang sudah siap, nang sagan mahitungi hasil cucukannya, sudah siap jua, matan PPS, PPK inggan KPU. Lamunnya KPU sudah rakat mupakat wan gawi sabumi awan warga banua, bahara Pamilu kaina lancar haja. Bahara wakil rakyat nang tapilih kaina baik jua. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 30/03/2014, Pukul Lima kamarian. Dina Qomariah, Yusar Wardana, TVRI Kalimantan Selatan, mahabarakan.) 

Sabtu, 22 Maret 2014

Pulitik Duit Wayah Pamilu



TVRI Kalsel, Tapin -- Pamilu satangah bulan haja lagi. Tanggung jawap KPU wayah Pamilu 9 April 2014 kaina liwar ganalnya. KPU cagar bahimat bausaha, sakira hasil Pamilu kaina sucing, adil wan bujur-harus.

Pikiran warga, calun wakil rakyat wan partai pulitik nang umpat Pamilu sapalihan sudah tabalik. Sapalihan aur mamikirakan duit haja. Sapalihan bapikir, ”mun kada jadi baras, kada hakun manggawi”. Warga nang cagar mancucuk, sama haja, sapalihan bapikir damintu jua. Padahal, pikiran nang “asal jadi baras haja” tu kada baik sagan warga banua.

Pulitik duit pinanya ngalih banar dibuang. Alahan lagi, pikiran damintu saku kaina tabawa-bawa ka wadah nang sagan mancucuk. Marga itu, sakira Pamilu kada mucai, KPU cagar bahimat manjagai.

Ujar kapala ahui KPU Tapin, Aminudin, sakira duit kada jadi untingan warga nang handak mancucuk, KPU cagar manambahi aturan. Warga Bumi Bastari ditangati mambawa kudakan wan alat lainnya ka wadah nang sagan mancucuk, nang bisa haja kaina sagan mangudak atawa marakam hasil cucukannya.

Ujar Aminudin, matan atas inggan bawah, bubuhan KPU Tapin kada bapihak awan calun wakil rakyat wan partai pulitik nang umpat Pamilu. Sakira hasil Pamilu sucing, adil wan bujur-harus. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 23/03/2014, Pukul Lima kamarian. Matan Rantau, Jamaludin, TVRI Kalimantan Selatan, mahabarakan.) 

PKPI wan PBB HSS Ditangati Umpat Pamilu



TVRI Kalsel, Banjarmasin -- KPU Pusat sudah mahapus 2 partai pulitik nang asalnya umpat Pamilu di banua. Marga kada malapurakan duit kampanyenya, PKPI wan PBB Hulu Sungai Selatan (HSS) kada dibariakan umpat Pamilu.

Ujar urang KPU Kalimantan Selatan (Kalsel), Riza Jihadi, PKPI wan PBB tadudi malapurakan duit kampanyenya ka KPU HSS. Ujar KPU di Bumi Antaludin, kaduanya sudah malanggar aturan. Marga itu, KPU Bumi Antaludin balapur ka KPU Kalsel di Banjarmasin. Imbah tu, KPU Kalsel balapur pulang ka KPU Pusat di Jakarta. Ayungannya, KPU Pusat manangati PKPI wan PBB HSS umpat Pamilu.

Ujar kapala ahui Bawaslu Kalsel, Mahyuni, PKPI wan PBB HSS sudah maunjuk surat, kada tarima partainya ditangati umpat Pamilu. Suratnya cagar dijawapi Bawaslu Kalsel. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 23/03/2014, Pukul Lima kamarian. Syahril Malik, Kadrianto Nurdin, TVRI Kalimantan Selatan, mahabarakan.)