PUASA, JANGAN BAIDABUL NANG KADA-KADA

TVRI Kalsel, Banjarmasin -- Tanggal 9 Juli 2014 kaina rakyat Indunisia mamilih calun prasidin wan calun wakil prasidin nang hanyar. Saku warga banua Banjar asing-asingnya sudah ada pilihan, cagar mancucuk calun prasidin wan calun wakil prasidin nang sasuai kahandaknya.

                                                        

Kapala Pulisi Banua Kalimantan Selatan, Machfud Arifin, handak, bubuhan nang umpat malawanakan calun prasidin wan calun wakil prasidin pilihan asing-asingnya musti gawi sabumi, kayuh baimbai. Baapik-apik kalakuan. Dijaga pamandiran. Jangan bahualan. Jangan bacakut papadaan, maginnya bakalahian.

Ujar Machfud Arifin, bujur calun prasidin wan calun wakil prasidin pilihan asing-asingnya kada sama, warga banua musti akur, rukun wan damai. Maginnya rahat bulan puasa. Jangan baidabul nang kada-kada, maginnya baparigal nang kada sampuraka. Sakira pamilihan calun prasidin wan calun wakil prasidin kaina lapang haja. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 29.06.2014, Pukul Lima kamarian. Dina Qomariah, Ibnu Fatih, TVRI Kalimantan Selatan, mahabarakan.) 

                                                                                                                  

BULAN PUASA JANGAN MAIN LATUPAN

TVRI Kalsel, Banjarmasin -- Salawas bulan puasa warga banua Banjar, Kalimantan Selatan, musti hawas. Bulan puasa rajin bamaling banar. Tacut wan tarkul kaluaran, mancuntan kandaraan, marampas kangkalung wan tas bibinian nang rahatan bakandaraan saurangan di jalan.

Lain pada itu, kakanakan Banjarmasin sapalihan katuju banar balatupan, mahaur urang tarawihan. Ada jua nang wangal, manimbai latupan ka urang nang handak tarawihan atawa rahat bakandaraan.

Kapala Pulisi Banua Kalimantan Selatan Machfud Arifin handak, salawas bulan puasa warga jangan main latupan. Pulisi cagar mangacak urang nang mambarang balatupan, maginnya mun sawat ada nang balukaan. Pulisi cagar marajia urang nang bajual latupan. Supaya warga nyaman baibadah, kada takajut-kajut mandangar bunyi latupan. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 29.06.2014, Pukul Lima kamarian. Dina Qomariah, Ibnu Fatih, TVRI Kalimantan Selatan, mahabarakan.) 

PATUNG WARIK BAKANTAN DI BANJARMASIN

TVRI Kalsel, Banjarmasin -- Gasan ciri Banjarmasin, tahun ini Pamarintah Banjarmasin baulah patung warik bakantan di Siring Pacinan, intangan Taher Square.

Ujar kapala ahui Dinas Kabudayaan Pariwisata Pamuda dan Olah Raga (Disbudparpora) Banjarmasin, Subhan Yaumil, gambar patung warik bakantannya sudah diulah tahun 2013 samalam. Siapa kaina nang manggawinya, rahat dililang. Subhan Yaumil handak, bulan dihadap patungnya sudah diulah.

Bahan gasan maulah patung warik bakantannya, parunggu. Duit gasan maulahnya dua miliar. Bakantannya kaina nang kaya patung singa di Singapur, nang muntungnya kaluar banyu. Patung warik bakantannya kaina maluak banyu ka Sungai Martapura.

Salajur baulah patung warik bakantan, tahun ini jua Pamarintah Banjarmasin baulah kampung Cina (China Town), lapangan basket wan panggung hiburan di Siring Pacinan. (*) [ysas]

  

(“Habar Banua”, TVRI Kalimantan Selatan, Banjarmasin. Siaran Ahad, 22.6.2014, Pukul Lima kamarian. Rini Muliana, Kadrianto Nurdin, TVRI Kalimantan Selatan, mahabarakan.) 

KAMBANG HIAS BAMULA RAMI DI BANJARMASIN

TVRI Kalsel, Banjarmasin -- Kambang hias kada gasan mambungasi halaman rumah haja, kawa jua gasan di dalam rumah. Tamasuk gasan mahadiahi kawitan, dangsanak, kawan, atawa gasan urang nang disayangi. Marga banyak nang katuju, usaha kambang hias di Banjarmasin bamula rami.

Marga banyak nang katuju, Azizah wan Rony gagawaian bajualan. Hasilnya, sahari kulihan haja tangah dua juta. Kambang nang dijualnya nukar di Jawa. Haraganya matan nang dua puluh dua ribu inggan nang tiga satangah, sasuai kahandak urang asing-asingnya. Kada dijual batangkai haja, ada jua nang bakindit.

Kambang hias kawa jadi caramin hati, gasan urang nang disayangi. Di banua Banjar ada paribasa: “kambang kada sakaki, kumbang kada saikung, alam kada batawing”. Artinya, siapa nang baisi kahandak, musti dalas hangit, waja sampai ka puting. Bujur hidup banyak huhuwasnya, tagal jangan lakas patah sumangat.

Asal bujur-harus, kahandak wan niat baik kita Insya Allah kabul haja, marga “kambang kada sakaki, kumbang kada saikung, alam kada batawing”. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 22.6.2014, Pukul Lima kamarian. Ratna Sari Dewi, Ten Umiayah, TVRI Kalimantan Selatan, mahabarakan.) 

                                                                                                                  

MANARA PANDANG DI BANJARMASIN

TVRI Kalsel, Banjarmasin -- Walikota Banjarmasin H. Muhidin mambuka manara pandang di Siring Pacinan, Banjarmasin. Walikota handak, manara pandang jadi wadah hiburan kulawarga, gasan manjanaki Banjarmasin wan Sungai Martapura tumatan atas, salajur gasan bakunjangan. Tamasuk jua gasan wadah balajaran, supaya urang tahu seni tradisi wan budaya Banjar, nang ada di manara pandang.

Ujar kapala ahui Dinas Kabudayaan Pariwisata Pamuda dan Olah Raga (Disbudparpora) Banjarmasin, Subhan Yaumil, sambil mahadang kantur nang gasan maharagu siring Sungai Martapura wan manara pandang, samantara Disbudparpora dahulu nang manggaduhnya, gawi sabumi awan Dinas Parhubungan, Satpol PP wan Dinas Kabarsihan Banjarmasin.

Gasan warga banua Banjar nang handak manjanaki Banjarmasin wan Sungai Martapura tumatan atas, datang haja ka manara pandang di Siring Pacinan. Samantara, parai haja, kada babayaran. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 22.6.2014, Pukul Lima kamarian. Rini Muliana, Kadrianto Nurdin, TVRI Kalimantan Selatan, mahabarakan.) 

WADAH GASAN MANYUMBALIH SATUA DI BALANGAN KADA TAPAKAI

TVRI Kalsel, Paringin -- Imbah tuntung diulah tahun dua ribu sambilan, inggan ini wadah gasan manyumbalih sapi wan satua lainnya anggit Pamarintah Balangan, kada tapakai. Wadah manyumbalih sapi di Kampung Hamparaya, Kacamatan Batumandi ni, ulahan Pamarintah Kalimantan Selatan, pakai duit APBN. Asalnya gasan mangumpulakan tukang sumbalih sapi nang tabancai-bancai di Balangan, gasan mahawasi kasihatan satua nang handak disumbalih.

Di Bumi Sanggam ada dua wadah panyumbalihan sapi nang andaknya intangan rumah warga. Lima tahun sudah pamarintah maulahakan wadah nang tanahap, tagal inggan ini kada tapakai.

Ujar urang Dinas Patarnakan, TPH dan Parikanan Balangan, Mahrita, bubuhan dinas kada kawa mamaksa bubuhan panyumbalihan sapi sakira bapindah. Ada nang baalasan wadahnya jauh pada rumah, kada aman, wan sarabanya nang, ujar tukang sumbalih sapinya, kada mayu. Pamarintah Balangan sudah jua mambisai, pariannya mangganti duit gasan mahangkut satuanya, tamasuk wadahnya nang kada babayaran, tagal bubuhannya kada hakun jua pindah.

Wadah manyumbalih sapi nang mudal maulahnya mandua ratus jutaan labih ni sabujurnya lain kahandak Pamarintah Balangan, tagal barian Pamarintah Kalimantan Selatan. Warga Bumi Sanggam sapalihan pina kada katuju jua makan daging. Warga katuju iwak. Hari-hari, sapi nang disumbalih di Balangan paling saikung-dua ikung. Warga rami manyumbalih sapi wayah bulan Maulid wan Hari Raya Haji haja. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 22.6.2014, Pukul Lima kamarian. Matan Balangan, Fitri, TVRI Kalimantan Selatan, mahabarakan.) 

TANTARA KADA BAPIHAK

TVRI Kalsel, Banjarmasin -- Kada sakali-dua Kapala Stap Angkatan Darat (KASAD) Jindral TNI Budiman baucap, gasan pamilihan calun prasidin wan calun wakil prasidin Indunisia, 9 Juli 2014 kaina, tantara Indunisia kada bapihak. Tantara kada umpat siapa-siapa.

Imbah ada habar tantara di Jakarta nang mahuluakan warga mamilih calun prasidin wan calun wakil prasidin, warga sapalihan asa gair jua. Warga takun-takunan, bujur juakah tantara kada bapihak?

Ujar Jindral Budiman, nang di Jakarta tu kahandak tantaranya saurang haja. Kadada nang manyuruh. Urangnya sudah dipariksa, sudah dihukum atasannya. Mun ada tantara nang katahuan mahuluakan warga mamilih calun prasidin wan calun wakil prasidin, lapurakan haja, supaya dipariksa. Mun ada buktinya, urangnya cagar dihukum.

Jindral Budiman mangaku jua, ada barapa ikung tantara nang dipariksa, disangka mahuluakan warga mamilih calun prasidin wan calun wakil prasidin nang sasuai kahandaknya. Marga itu, warga musti yakin, tantara bujur-bujur kada bapihak. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 15.6.2014, Pukul Lima kamarian. TVRI Kalimantan Selatan, mahabarakan.) 

BANYU MANGANDUNG DI KARTAK

TVRI Kalsel, Banjarmasin -- Saban kalian hujan, di muka Pasar Antasari, Banjarmasin, banyu mangandung di kartak. Kartak calap inggan buku lali.

Ujar Ahmad Darham, nang rajin kacungkungan di muka Pasar Antasari, mun hujan labat, satangah jam, gin, kartak sudah tarandam. Kartak tarandam, marga saluran banyunya pampan wan kada dalam, kada mayu lagi gasan buangan banyu. 

Ahmad Darham handak, Pamarintah Banjarmasin bakurinah mahatiakan. Sakira warga nang lalu lalang kada kacalapan. Saluran banyu nang pampan kada maulah kartak calap haja, tagal babau haruk, marga ratik wan pucirin kaluaran. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 15.6.2014, Pukul Lima kamarian. Ratna Sari Dewi, Ten Umiayah, TVRI Kalimantan Selatan, mahabarakan.) 

                                                                                                                 

MAHASISWA UNJUK RASA DUIT PARKIR

TVRI Kalsel, Banjarmasin -- Mahasiswa banua di pawadahan BEM Kalimantan Selatan unjuk rasa, garigitan banar malihat bayaran parkir kandaraan di Banjarmasin nang kada sasuai aturan.

Rahat unjuk rasa di Simpang Ampat Jalan Lambung Mangkurat samalam, bubuhan mahasiswa minta Pamarintah Banjarmasin bakurinah maurusi tukang parkir liar nang sakahandaknya minta bayaran.

Ujar kapala ahui unjuk rasa, Muhammad Ilyas, sasuai Aturan Dairah Numur 8 Tahun 2011, parkir gasan kandaraan mustinya saribu haja, tagal tukang parkir mintanya dua ribu. Artinya, Dinas Parhubungan Banjarmasin kada kawa maurusi bubuhan tukang parkir.

Mahasiswa handak, Pamarintah Banjarmasin lakas-lakas maurus tukang parkir nang macal. Mun kada maasi jua, cabut ijinnya. Nang malanggar aturan, dihukum, sakira jara. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 15.6.2014, Pukul Lima kamarian. TVRI Kalimantan Selatan, mahabarakan.) 

"ASWADI SYUKUR AWARD" IAIN ANTASARI BANJARMASIN

TVRI Kalsel, Banjarmasin -- Pandidikan di banua Kalimantan Selatan musti maju. Dibanding Pulau Jawa, pandidikan di banua Banjar jauh banar tatinggal, tamasuk manusianya wan sarabanya. 

Ujar pangusaha Sahbirin Noor, supaya maju, pandidikan di banua musti dibaiki. Mun parlu, kiau guru matan luar. Mun gurunya pintar, muridnya pasti pintar jua. Ayungannya, lulusannya kaina baik jua.

Wayah ditakuni niat Fakultas Dakwah IAIN Antasari Banjarmasin handak maulah Aswadi Syukur Award, Sahbirin Noor akur banar. Ujarnya, inya rakat banar awan almarhum K.H. Aswadi Syukur.

Ujar kapala ahui Fakultas Dakwah IAIN Antasari, Dr. Akhmad Sagir, M. Ag., Aswadi Syukur Award cagar mamilih wan mahadiahi da’i nang anum-anum di banua. Cagarnya bulan sapuluh kaina, salajur milad Fakultas Dakwah.

K.H. Aswadi Syukur tamasuk nang panambaian jadi kapala ahui Fakultas Dakwah. Sidin suah jadi kapala ahui IAIN Antasari, sawat jua jadi kapala ahui Majlis Ulama Indunisia (MUI) Kalimantan Selatan. Wayah hidup, saban parak bukaan puasa sidin tausyiah di radiu. Sidin jua nang manyalin Kitab Sabilal Muhtadin Syekh Muhammad Arsyad Al-Banjary ka hurup Latin. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 15.6.2014, Pukul Lima kamarian. Dina Qomariah, Budi Alamsyah, TVRI Kalimantan Selatan, mahabarakan.)