Jangan Mambarang Mambuang Ratik!

TVRI Kalsel, Banjarmasin -- Mun balum wayahnya, di Banjarmasin jangan wani-wani mambuang ratik ka wadahnya. Mun kadapatan, pacangan dihukum. Waktu nang sagan mambuang ratik sudah ditulis di wadah tuyukan ratik asing-asingnya, matan Pukul Lapan malam inggan Pukul Anam baisukan. Mun lain pada itu, ditangati.

Tagal, bahanu ada jua warga nang mambuang ratik di luar jam-nya. Ayungannya, ratik batuyuk, bahanu tahambur di kartak. Marga itu, Banjarmasin rigat, kada nyaman lalu dilihat.

                                          

Dinas Kebersihan dan Pertamanan wan Satpol PP Banjarmasin manjagai wadah tuyukan ratik. Sudah ada warga nang dihukum, marga katangkapan. Disuruh bayar danda. Sagan manjarai, sakira dudi-dudi jangan lagi.

Ujar Fahrani, tukang jaga wadah ratik di Jalan Kuripan, bujur waktu nang sagan mambuang ratik sudah ada, warga nang bamutur wan bakandaraan magun haja manimbai ratik ka wadahnya. Inya kada kawa manangati.

Tagal, imbah dijagai Satpol PP, takurang jua nang mambarang mambuang ratik. Tukang ratik lapang jua bagawi, mahangkut ratik lima kali sahari. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 26/01/2014, Pukul Lima kamarian. Ibnu Fatih, TVRI Kalimantan Selatan, mahabarakan.) 

Hasil Pamilu Maulah Sangkal

TVRI Kalsel, Banjarmasin -- Hadap Pamilu, 9 April 2014 kaina, gambar partai pulitik wan calun wakil rakyat banyak batajak di pinggir kartak wan di tabing sungai batang banyu banua Banjar. Samunyaan bajanji, supaya warga mamilih inya. Diharap, janji kada sahibar janji. Musti bujur-bujur digawi, sakira hidup warga tanyaman jua.

Ujar urang sapalihan, wakil rakyat hasil Pamilu nang tadahulu nang kakaya itu haja. Magun haja maulah warga sangkal. Urang sangkal, marga hidupnya kada ubah jua tumatan bahari, magun haja sakit pada kayap. Lamun damintu, warga magun haja handak mancucuk wayah Pamilu kaina. Warga handak, wakil rakyat nang tapilih kaina tabaik pada nang ada.

Ujar warga, banyak nang musti dibaiki di banua. Usaha, pandidikan, kasihatan, alam lingkungan wan jambatan nang rusak, tamasuk kartak nang balubak-balubak. Padahal, jambatan wan kartak parlu banar sagan lalu lalang, sagan bacari rajaki hari-hari.

Warga sangkal jua, banyak arjabat nang kurupsi. Imbah jadi, kada ingat diri lagi. Bahimat manuyuk harta barana, kada ingat lagi lawan nang mamilihnya. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 26/01/2014, Pukul Lima kamarian. Fitri, TVRI Kalimantan Selatan, mahabarakan.) 

Wakil Rakyat Musti Amanah

TVRI Kalsel, Banjarmasin -- Banyaknya wakil rakyat nang kurupsi maulah warga banua Banjar sangkal. Bujur asa hawai, tagal ada jua nang yakin, wakil rakyat hasil Pamilu 9 April 2014 kaina ada haja nang bujur-harus wan amanah.

Mustinya, Pamilu sagan mambaiki nasip rakyat. Mustinya, Pamilu kada sagan manyugihi diri wakil rakyat wan bubuhan papadaannya haja, imbah tu kada bagaduh lagi lawan urang jaba nang hidupnya magun haja marista.

Hasil Pamilu nang sudah-sudah, banyak wakil rakyat nang kada bujur-harus, kada amanah. Alahan lagi, marga kurupsi, banyak nang ditangkapi. Marga itu, warga sangkal. Sapalihan, asa hawai umpat Pamilu. Kahandak warga, wakil rakyat nang tapilih kaina baduhara mambaiki nasip warga nang diwakilinya, kada sagan manyamani inya haja.

Siapa haja kaina nang tapilih jadi wakil rakyat, musti amanah, musti ingat lawan janji. Janji tamasuk hutang. Mun kada ditahuri, nang bajanji bisa tapiasat. Hidupnya kada babarkat, bisa kada kakaruan. Jadi sambatan, tamakan sumpah urang sabanjaran. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 26/01/2014, Pukul lima kamarian. Syahril Malik, TVRI Kalimantan Selatan, mahabarakan.) 

Jambatan Gantung Margasari Dibaiki Tahun Ini

TVRI Kalsel, Rantau -- Jambatan gantung Margasari, nang pagat malam tahun baru 2013 samalam, cagar dibaiki tahun ini.

Ujar Kapala Bidang Bina Marga Dinas PU Kabupaten Tapin, Yustan Aziddin, Dinas PU mandangar haja urang takun-takunan, manakunakan pabila jambatan gantung dibaiki. Ujarnya, duit nang sagan manukar bahan sudah disiapakan tahun 2013, tagal duit nang sagan mamasangnya hanyar ada tahun 2014 ni.

Ujar Yustan Aziddin, warga hingkat malihat bahan-bahan nang sagan mambaiki jambatan, nang batuyuk di halaman Dinas PU. Inya handak, warga basabar sadikit. Kapala Dinas PU Kabupaten Tapin, Zainal Aqli, baucap damintu jua. Dua-talu bulan lagi, jambatan dibaiki. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 26/01/2014, Pukul lima kamarian. Matan Rantau, Jamaludin, TVRI Kalimantan Selatan, mahabarakan.) 

Taksian Pal Anam Dibaiki Tahun Ini

TVRI Kalsel, Banjarmasin -- Taksian Pal Anam, Banjarmasin, tahun ini mulai dibaiki. Sagan gawian nang panambaian, Pamarintah Banjarmasin manyiapakan duit Rp 7 miliar. Taksian cagar digawi tunggal dikitan, matan tahun ini inggan tahun 2015. Taksian nang hanyar cagarnya talu tingkat. Tahun ini, bawahnya dahulu nang digawi. Duit nang sagan manggawinya samunyaan Rp 30 miliar.

Ujar Kapala Ahui UPTD Taksian Pal Anam, Yusuf Ridwan, satumbangan digawi kaina, taksian magun haja nang kaya masi. Mun siguk atawa tangalih sadikit di taksian, kada papa. Bahara samunyaan lancar haja.

Andakannya di bakas wadah mahadang taksi jurusan Martapura. Samunyaan dibabak wan dibarasihi. Taksi Martapura dialih samantara baka muka. Warung-warungnya dibabak jua, dialih ka lain.

Pamburung nang manggawinya matan Bandung. Ujar habar, sudah pangalaman, rancak baulah taksian di Pulau Jawa. Taksian cagar tuntung tahun 2015 kaina, sabaluman habis jabatan Muhidin, Walikota Banjarmasin. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 26/01/2014, Pukul Lima kamarian. Fitri, TVRI Kalimantan Selatan, mahabarakan.)