Minggu, 23 Februari 2014

Buah Binjai wan Ramania



TVRI Kalsel, Kartak Hanyar -- Kakanakan wayah ini saku sapalihan ada nang kada tahu awan buah binjai. Binjai ada dua macam. Binjai wanyi nang hijau, rasanya malaran manis. Mamakannya sama nang kaya mamakan hampalam wan hambawang.

Binjai nang sabutingnya, kalirnya suklat. Rajin sagan manyambal. Sambal binjai lain rasanya awan sambal acan. Binjai nang babuah satahun sakali ni di pasar dijual tiga ribu inggan lima ribu sabigi.

Wayah musim buah, kada rambutan haja nang dijual urang di Pasar Kartak Hanyar. Ramania, ada jua. Nang kaya binjai, ramania nang anum rajin sagan manyambal. Nang masak, hingkat langsung dimakan. Binjai wan ramania tamasuk buah tahun, nang ngalih dicari mun kada musimnya.

Di banua Banjar, Kalimantan Selatan, banyak buah nang kada tumbuh di banua lain, tamasuk binjai, ramania, kalangkala, hambawang wan kasturi. Mustinya sama-sama kita haragu, warisan sagan anak cucu. (*) [ysas]
     
(“Habar Banua”, TVRI Kalimantan Selatan, Banjarmasin. Siaran Ahad, 23/02/2014, Pukul Lima kamarian. Ten Umiayah, Ratna Sari Dewi, TVRI Kalimantan Selatan, mahabarakan.) 



Jalan Trak Batu Harang Ditutup Warga



TVRI Kalsel, Banjarmasin -- Imbah jalan ampah kabun sawit P.T. Suryabumi Tunggal Perkasa di Kampung Ringgo, Kalumpang Hulu, Kotabaru, ditutup warga, kada lawas bakajadian pulang. Parusahaan batu harang dituduh warga Kampung Tanah Rata, Kalumpang Tangah, Kotabaru, kada bapadah mamakai jalan sagan bahangkut batu harang. Warga kada dibari duit sajampal-jampal.

Ari Sanayan samalam, warga mahalangi jalan nang kalaluan trak batu harang P.T. Arutmin wan Puskopad. Nang batabuk batu harang di situ P.T. Putra Bumi Mandiri Sejahtera. Ujar warga, tu tanah padatuannya nang balum ditukari parusahaan.

Ujar Abdul Aziz, inya baisi sigil adat, bukti tanah tu warisan padatuannya. Parusahaan kada suah manukari tanahnya. Matan tahun 2002, parusahaan kada suah maunjukinya duit sajampal-jampal.

Sakira jangan babangat, pulisi Kalumpang Tangah mambawai warga wan parusahaan bamujakarah di wadah pambakal. Ujar kapala ahui P.T. Putra Bumi Mandiri Sejahtera, Haji Ramida, tanah warga sudah ditukarinya tunggal dikitan. Mun pariannya ada nang balum ditukari, inya handak maniring dahulu, sakira tahu wadahnya.

Pulisi handak, warga jangan mahalangi jalan. Tu malanggar aturan. Lain pada itu, musti ada bukti, siapa sabujurnya nang ampun tanah. Tanah nang dihual warga tamasuk jalan kampung nang sagan urang banyak.

Dilihat banyaknya warga nang bahual awan parusahaan, pulisi minta samunyaan dibawa ka tangah haja, ka pangadilan. Ujar pulisi, banyak warga nang mangaku-ngaku ampun tanah, padahal kada pasti asal muasalnya, sigilnya kadada jua. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 23/02/2014, Pukul Lima kamarian. Matan Kotabaru, Fitri, TVRI Kalimantan Selatan, mahabarakan.) 

Jalan ka Kabun Sawit Ditutup Warga



TVRI Kalsel, Kotabaru -- Ari Jumahat, minggu samalam, warga RT 5, Kampung Ringgo, Cantung Kiri Hulu, Kalumpang Hulu, Kotabaru, manutup jalan nang ampah parusahaan kabun sawit P.T. Suryabumi Tunggal Perkasa. Ujar warga, tanah tu ampunnya.

P.T. Suryabumi Tunggal Perkasa dituduh mawaluhi tanah adat padatuan warga. Parusahaan ikar, kada sasuai janji. Parusahaan suah bajanji, hasilnya bagi dua: lapan puluh parsin sagan parusahaan, dua puluh parsin sagan warga. Tagal, imbah watas tanah kampung baubah, warga kada dapat jatah lagi. Ujar parusahaan, tanahnya lain ampun warga lagi.

Warga sudah mahual matan tahun 2005. Parusahaan sawit mamulilit, padahal warga sudah maurus baik-baik. Warga kada lagi manuntut jatah, tagal minta tanah adatnya dibulikakan. Imbah kadada hasilnya jua, jalanan ditutup warga. Maksudnya kada lain, sakira parusahaan sawit wan Pamarintah Kotabaru mahatiakan.

Imbah ditutup warga, trak parusahaan kada hingkat lagi bahangkut sawit jalan Kampung Ringgo. Parusahaan suah manyurung wakilnya sagan bamujakarah. Tagal, inggan ini bubuhan parusahaan kadada nang basuara, bujur hajakah tuduhan warga. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 23/02/2014, Pukul Lima kamarian. Matan Kotabaru, Fitri, TVRI Kalimantan Selatan, mahabarakan.) 

Tukang Minta Sadakah Dibulikakan



TVRI Kalsel, Banjarmasin -- 21 ikung galandangan wan tukang minta sadakah asal Jawa Timur dibulikakan Satpol PP Banjarmasin ka banuanya, bakapal Nusantara Wisesa 03, di Palabuhan Tri Sakti, Banjarmasin. Nang dibulikakan ni hasil tangkapan minggu samalam. Samunyaan 73 ikung. 30 ikung asal Madura, Jawa Timur. Nang 21 ikung dibulikakan badahulu. 

Ujar bubuhan Satpol PP Banjarmasin, Apiluddin Noor, duit sagan mambulikakannya duit galandangan wan tukang minta sadakahnya jua, nang disita. Duitnya ditukarakan karcis kapal. Bahara bubuhannya jara, kada babulik lagi ka Banjarmasin.

Ujar tukang minta sadakah nang dibulikakan, bubuhannya asing-asingnya haja datang ka Banjarmasin, kadada nang mahuluakan. Tagal, Apiluddin Noor kada parcaya. Satpol PP Banjarmasin tahu, ada nang mahuluakan.

Sabaluman dibulikakan, mustinya Pamarintah Banjarmasin bacucuk buku dahulu awan Pamarintah Jawa Timur, sakira disambang di Palabuhan Surabaya. Tagal, Apiluddin Noor yakin, musti sudah ada nang mahadangi jua di sana. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 23/02/2014, Pukul Lima kamarian. Ibnu Fatih, Mawan Himawan, TVRI Kalimantan Selatan, mahabarakan.) 

Sabtu, 15 Februari 2014

Valentine Day di Banjarmasin



TVRI kalsel, Banjarmasin -- “Hari Kasih Sayang” atawa Valentine Day di Banjarmasin kada sarami di banua lain, nang kaya di Pulau Jawa. Tagal, bubuhan nang anum-anum sapalihan magun haja katuju manukar hiasan Valentine, sagan dibariakan awan papadaan.

Sabaluman Valentine Day, Jumahat (14/02/2014) samalam, wadah nang bajual hiasan sagan “Hari Kasih Sayang” rami ditukui urang. Chi Giok, damintu jua. Saparundutan awan anaknya, inya baduhara manukar wadai suklat nang lucu-lucu, nang mudilnya macam-macam. Ujarnya, saban tahun, saban Valentine Day, inya wan kulawarganya babarian wadai suklat, sagan tanda kasih sayang.

Valentine Day sabujurnya adat budaya urang Barat. Sagan tanda kasih sayang, rajin urang babarian kambang wan wadai suklat sagan papadaan. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 16/02/2014, Pukul Lima kamarian. Wiryanto Hadi, Oku, TVRI Kalimantan Selatan, mahabarakan.)