Sabtu, 30 Agustus 2014

Musik Panting Mahasiswa Banjar di Yogyakarta

TVRI Kalsel, Yogyakarta -- Diam di banua urang kada musti kalumpanan lawan adat budaya warisan padatuan. Gasan bubuhan mahasiswa Banjar, Kalimantan Selatan, nang kuliah di Yogyakarta, musik panting musti diharagu wan ditampaiakan di banua urang.

Damiya aksi mahasiswa banua nang tabuat di Pawadahan Mahasiswa Kalimantan Selatan (PMKS) di Yogyakarta. Babaju adat Banjar, musik panting wan lagu Banjar didundangakan. Ngaran pawadahannya Musik Panting Dendang Banua. Sakira bapala jua, bubuhannya nanar latihan.

Ujar kapala ahuinya, Waydia Norhasanah, nang asal Tanjung, Tabalong, main musik panting tamasuk usaha mahasiswa Banjar di Yogyakarta maharagu adat budaya warisan padatuan. Kada gasan bubuhan Banjar haja. Bubuhannya rajin jua disaru urang. Mahibur warga Yogya, nang handak tahu musik panting, nang lain pada nang lain. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 31.08.2014, Pukul Lima kamarian. Matan Yogyakarta, Dina Qomariah, TVRI Kalimantan Selatan, mahabarakan.) 




                                                                                                     




Halal Bihalal Bubuhan Banjar di Yogyakarta

TVRI Kalsel, Yogyakarta -- Lain pada mahabarakan pambangunan di banua gasan bubuhan Banjar nang hidup di banua urang, halal bihalal Pamarintah Kalimantan Selatan lawan Karukunan Kulawarga Banjar Yogyakarta (Kakabayo) salajur gasan silaturahmi wan bamaapan.

Nang rami, wayah Wakil Hubnur Kalimantan Selatan Rudy Resnawan manakuni ngaran masakan Banjar lawan bubuhan Banjar nang bagana di Yogya. Tunggal ikungan ditakuni, tunggal ikungan manjawapi. Nang jawapannya bujur, dibari hadiah. Liwar raminya.

Halal bihalal nang ampun gawi Kakabayo wan Pawadahan Mahasiswa Kalimantan Selatan (PMKS) di Yogyakarta samalam didatangi Wakil Hubnur, Sakutaris Dairah Kalimantan Selatan wan lainnya. Wadahnya di Gedung Serba Guna Adi Sutjipto.   

Ujar Rudy Resnawan, halal bihalal ni gasan babagi habar banua gasan bubuhan Banjar nang hidup di banua urang. Kabalikannya, damintu jua, bubuhan Banjar nang hidup di banua urang, bahabar jua.

Ujar kapala ahui Kakabayo, Haji Bukhari Anang, halal bihalal nang satahun sakali ni gasan marakatakan silaturahmi bubuhan Banjar di Yogyakarta. Inggan ini, ada 500 labih urang Banjar nang tabuat di Kakabayo. Haji Bukhari Anang mamadahakan niat Kakabayo manajak Masigit Quwwatul Islam, nang parlu duit Rp 16 miliar labih. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 31.08.2014, Pukul Lima kamarian. Matan Yogyakarta, Dina Komariah, TVRI Kalimantan Selatan, mahabarakan.) 



                                                                                                                  

Jalan di Satui Rumbih Pulang

TVRI Kalsel, Batulicin -- Jalan di Satui Barat, Pal 169, Tanah Bumbu, tamasuk jalan antasan Kalimantan Selatan-Kalimantan Timur. Dapatnya hujan nang turun saling labatan, jalanan rumbih pulang. Siring wasi wajanya tabulangkir.

Pamarintah Tanah Bumbu musti maambil hikmahnya. Jangan lagi mambariakan parusahaan swasta manabuk batu harang di wadahya. Imbah tuntung batabuk, parusahaan kada lagi manyimpuni luang tanah bakas tabukannya. Jalan nang rumbih jadi bukti, batabuk batu harang jadi bala gasan warga. Jalan rumbih tarus.

Sudah barapa kali jalanan disiring, magun haja rumbih dapatnya hujan. Mun kada dihatiakan babanaran, jalan antasan Kalimantan Selatan-Kalimantan Timur wan kantur pamarintah bisa taumpat rumbih jua.

Wayah ditakuni TVRI, Camat Satui, H. Suwignyo, bapadah, Pamarintah Tanah Bumbu pacangan baulah jalan hanyar, dua ratus dapa jauhnya pada jalan nang ada. Panjangnya 375 dapa, luasnya 15 dapa. Satumbangan jalan lawas nang rumbih dibaiki, warga lalu lalang di jalan hanyar. Mau kada mau, musti damintu. Lamunnya kada, bilang kada kasudahannya ai. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 31.08.2014, Pukul Lima kamarian. Mawan Himawan, TVRI Kalimantan Selatan, mahabarakan.) 




Sabtu, 23 Agustus 2014

Pasar Paringin, Balangan

TVRI Kalsel, Paringin -- Di pinggir kartak jalan Paringin, Balangan, matan Sanayan isuk kada dibariakan lagi gasan wadah bajualan. Pamarintah Balangan sudah barapa kali manangati warga bajualan di situ, tagal kada diasi. Saban Sanayan baisukan, kartak di muka Pasar Paringin sasak, hibak urang bajualan. Mun lalu intangan situ, mutur, bis Kaltim wan kandaraan nang lalu lalang, paksa bagamat.

Ujar Kapala Pasar Balangan, Ikhsan Tata Kesuma, Pamarintah Balangan sudah talalu baik awan warga. Pasar di pinggir kartak sudah lawas ada. Tumatan Sanayan isuk, nang bajualan diminta baalih ka pasar iwak di atas Pasar Paringin nang puang. Nang bajualan di sana sudah pindah ka pasar hanyar.

Ujar Ikhsan Tata Kesuma, bubuhannya sudah mamadahi warga, supaya jangan lagi bajualan di pinggir kartak. Mun kada diasi jua, cagar dipaksa. Mun indah baalih ka pasar iwak, musti bajualan di lain.

Pamarintah Balangan sudah barapa kali handak maalih pasar di pinggir kartak Paringin, tagal padagang kadada nang hakunnya. Pasar ni andaknya di Jalan Lintas Kalimantan, mangalihi bis, mutur wan kandaraan lalu lalang. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 24.08.2014, Pukul Lima kamarian. Matan Balangan, Fitri, TVRI Kalimantan Selatan, mahabarakan.) 





Ilung di Danau Baruh Bahinu

TVRI Kalsel, Paringin -- Tukang haragu wadah wisata Danau Baruh Bahinu di Balangan ngalu kapala dapatnya ilung wan kumpai. Ilung wan kumpai sabat banar, manukupi danau. Danau nang asalnya luas, bakipit. Nang tukang haragu bilang kada kaawakan mambarasihi.

Ujar nang tukang haragu, M. Abidin, Pamarintah Balangan sadikitannya mambari duit gasan maharagu wan mambarasihi Danau Baruh Bahinu. Marga itu, bubuhan Sadar Wisata satatayuhnya haja mambarasihi ilung wan kumpai nang sabat. Dinas Pakarjaan Umum Balangan kada manuntung jua mambarasihi. Ujar, duitnya kada mayu.

Pawadahan Sadar Wisata Baruh Bahinu kada sanggup lagi mambuangi ilung wan kumpai nang sudah diangkat ka darat. Marga itu, ilung wan kumpainya dituyuk di tabing haja. Lawas kalawasan, danaunya bakipit.

Danau Baruh Bahinu andaknya di Kampung Baruh Bahinu Dalam, Paringin Selatan. Kada jauh pada Paringin. Panjangnya mandua pal-an. Jalan nang tuju ka sana, nyaman haja. Saban hari Ahad, banyak warga nang bakunjangan ka mari. Lain pada gasan wadah raunan, Danau Baruh Bahinu dipakai warga gasan manggaduh iwak di karamba, tamasuk gasan wadah latihan balanjaan jukung.

M. Abidin handak, Pamarintah Balangan mahatiakan Danau Baruh Bahinu. Maginnya pulang, inggan ini di Bumi Sanggam balum ada undas wisata. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 24.08.2014, Pukul Lima kamarian. Matan Balangan, Fitri, TVRI Kalimantan Selatan, mahabarakan.) 



                                                                                                                  

Walut Gasan Tatamba Gatalan

TVRI Kalsel, Kertak Hanyar -- Urang Banjar sapalihan katuju banar makan iwak walut. Bujur nang kaya ular, walut baik banar gasan kasihatan. Walut banyak macamnya. Ada walut pahumaan, walut laut wan walut gaduhan (nang bakurinah digaduh). Tagal, kada samunyaan urang katuju makan walut. Ada jua nang galianan.

Sakalinya, walut baik banar gasan awak. Ujar Ahmadi, tumatan halui inya katuju banar makan iwak walut, nang disanga atawa dipais. Rasanya liwar nyaman. Ujarnya, iwak walut hingkat gasan tatamba gatalan.

Ujar Nurul, nang bawarung nasi di Pasar Kertak Hanyar, saban hari inya bajual masakan walut. Sahari, pais walut jualannya habis haja dua kilu. Payu banar.

Di Pasar Kertak Hanyar, walut hidup haraganya lima puluh ribu sakilu. Pais walut tujuh ribu sapundut. Gasan nang katuju makan iwak, kada salahnya sasakali marasani iwak walut. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 24.08.2014, Pukul Lima kamarian. Ten Umiayah, Rini Muliana, TVRI Kalimantan Selatan, mahabarakan.) 







Kamis, 21 Agustus 2014

Festival Teater Mamanda Kalimantan Selatan 2014

FESTIVAL TEATER MAMANDA KALIMANTAN SELATAN

BERHADIAH TOTAL RP 40 JUTA

Kotabaru, 27-29 November 2014

A.    Latar belakang
Hari Nusantara adalah perwujudan Deklarasi Juanda, yang diputuskan dalam Keppres Nomor 126 Tahun 2001. Deklarasi tersebut mencerminkan tekad Bangsa Indonesia untuk menyatukan lagi wilayah dan lautannya yang luas, sebagai wilayah yang utuh dan berdaulat.
Hari Nusantara mengingatkan kita, bahwa Indonesia merupakan negara kepulauan terbesar di dunia, dengan ribuan pulau yang memiliki keindahan alam dan keragaman seni tradisi, bahasa, budaya, adat istiadat dan potensi ekonomi yang dapat digali secara lebih maksimal.

Rapat Koordinasi Panitia Nasional dan Daerah Hari Nusantara XIV Tahun 2014 telah dibentuk di Kantor Gubernur Kalimantan Selatan di Banjarbaru, 15 April 2014. Rapat tersebut membahas persiapan Hari Nusantara XIV Tahun 2014, yang puncaknya akan dilaksanakan di Kabupaten Kotabaru.
Sebelum acara puncak, telah disusun aneka kegiatan, di antaranya Bhakti Sosial, Desa Inovasi Nelayan, Festival Maritim, Seminar, Dialog Interaktif, Pameran, Pawai Budaya, Festival Teater Mamanda Kalimantan Selatan, dan lain-lain.

B.     Maksud dan tujuan
Masyarakat Banjar, Kalimantan Selatan, memiliki teater tradisi mamanda, wayang gung, wayang kulit, japin carita, japin anak delapan, kuda gipang carita, bapandung (teater monolog), lamut (teater tutur), tantayungan, damarulan, pantul, babagungan, alan-alan, dan lain-lain. Meski terkadang dimainkan masyarakat Banjar yang bermukim di provinsi lain, mamanda adalah teater tradisi yang berasal dari, hidup, tumbuh dan berkembang di Tanah Banjar, Provinsi Kalimantan Selatan. Mamanda mempunyai dua aliran: Batang Banyu (mamanda Pariuk) dan Tubau (Batubau).

Mamanda mengandung seni drama, tari dan musik (sendratasik), berpola istana-sentris, dengan tokoh-tokoh Raja, Perdana Menteri, Mangkubumi, Wazir, Kepala Pertanda (Panglima Perang), Harapan Pertama (Panganan), Harapan Kedua (Pangiwa), Khadam, Inang (Amban), Permaisuri, Putera Mahkota, Puteri Raja, dan lain-lain (tergantung kebutuhan cerita). Tokoh dalam cerita mamanda dapat ditambah dengan tokoh-tokoh lain, seperti Raja Negeri Seberang, Perompak, Jin, Kompeni Belanda, dan lain-lain (tergantung kebutuhan cerita).

1.      Maksud
Guna memeriahkan Hari Nusantara XIV Tahun 2014, Dinas Pemuda, Olah Raga, Budaya dan Pariwisata (Disporbudpar) Kabupaten Kotabaru bermaksud melaksanakan Festival Teater Mamanda Kalimantan Selatan (FTMKS).

2.      Tujuan
FTMKS bertujuan menumbuhkan kebanggaan dan apresiasi masyarakat terhadap seni tradisi, terhadap kearifan lokal dan nilai-nilai budaya yang terkandung dalam teater tradisi mamanda.

3.      Bentuk dan sifat kegiatan
Kegiatan berbentuk pertunjukan teater tradisi mamanda. Kegiatan bersifat kompetisi (lomba).

4.      Waktu dan tempat kegiatan
Kegiatan berlangsung sejak hari Kamis hingga Sabtu, 27-29 November 2014, di Pantai Siring Laut, Kotabaru.

C.    Persyaratan, pendaftaran dan kejuaraan
1)      FTMKS terbuka untuk umum (nonkategori), untuk grup/komunitas/pawadahan teater yang berdomisili di Provinsi Kalimantan Selatan.
2)      Grup/komunitas/pawadahan teater dari satu kabupaten/kota dilarang mengatasnamakan peserta dari kabupaten/kota lain. Pemain di satu grup/komunitas/pawadahan teater dilarang merangkap sebagai pemain di grup/komunitas/pawadahan teater lain. Pengecualian hanya berlaku untuk pemusik/penabuh (yang boleh mendukung lebih dari satu grup/komunitas/pawadahan teater). Pelanggaran terhadap ketentuan ini akan mendapat sanksi.
3)      Tema bebas.
4)      Teater mamanda yang dimaksud adalah mamanda tradisi, mamanda Batang Banyu (mamanda Pariuk) maupun mamanda Tubau (Batubau), atau gabungan keduanya. Pertunjukan berlangsung malam hari, di tempat terbuka (dalam bentuk teater arena).
5)      Jumlah pemain, pemusik dan official tidak dibatasi. Peserta menanggung sendiri biaya transportasi PP, akomodasi dan konsumsi selama di Kotabaru.
6)      Peserta boleh membawakan naskah/cerita karangan sendiri, atau karya orang lain. Fotokopi naskah/treatment dan leaflet (berisi nama grup/komunitas/pawadahan, badan produksi, susunan pemain dan sinopsis) wajib diserahkan (masing-masing 4 rangkap) di Sekretariat Panitia Pelaksana: Jalan P. Indera Kesuma Negara (Gedung Abdi Negara), Lantai II, Telepon (0518) 21957, Kotabaru -- atau saat technicall meeting dan pencabutan nomor tampil, di Gedung Ratu Intan, Kotabaru; Kamis, 27 November 2014, Pukul 09.00-12.00 WITA. Pendaftaran ditutup Selasa, 25 November 2014, Pukul 12.00 WITA. Pendaftaran tidak dipungut biaya.
7)      Peserta mengikuti orientasi tempat (masing-masing 15 menit) di lokasi pertunjukan, Kamis, 27 November 2014, Pukul 13.00 s.d. 16.00 WITA.
8)      Durasi maksimal 60 menit. Pertunjukan diawali dengan pembacaan judul dan sinopsis cerita mamanda yang dibawakan grup/komunitas/pawadahan teater yang akan tampil (dibacakan oleh panitia pelaksana). Hitungan awal dan akhir waktu pertunjukan ditandai dengan pemukulan gong (oleh panitia pelaksana).
9)      Peserta membawa sendiri peralatan yang diperlukan (alat musik, pemusik, properties, kostum pemain, dan sebagainya). Panitia hanya menyediakan tempat pertunjukan, lampu penerangan (standar), meja raja dan lawangan sari.
10)  Panitia memberikan insentif/biaya produksi @ Rp 4 juta (dipotong pajak) kepada grup/komunitas/pawadahan teater yang menjadi peserta (diserahkan setelah peserta tampil).
11)  Dewan Juri akan menetapkan Penyaji Terbaik I, Penyaji Terbaik II dan Penyaji Terbaik III; Penyaji Harapan Terbaik I dan Penyaji Harapan Terbaik II; Aktor Terbaik, Aktris Terbaik dan Sutradara Terbaik. Pemenang akan mendapat piagam penghargaan dan hadiah uang tunai, total Rp 40 juta.
12)  Keputusan Dewan Juri bersifat mengikat dan tidak dapat diganggu gugat.

D.    Dewan Juri
Dewan Juri adalah seniman, budayawan dan praktisi teater tradisi di Kalimantan Selatan.

E.     Contact person
Hal-hal yang belum jelas dapat ditanyakan langsung kepada contact person: Anang Marendra Bayu (085249514799, pendaftaran peserta), Zain Lawang Mahar (087715658700, merekomendasikan hotel/penginapan di Kotabaru), Abdus Sukur Mh (0852400405, teknis acara/pergelaran), Iwan Lawang Slangker (081351028879, teknis acara/pergelaran), dan Y.S. Agus Suseno (085249954849, persyaratan/kriteria penilaian).

F.     Penutup
Petunjuk Pelaksanaan ini dibuat untuk kelancaran acara. Hal-hal yang belum tercantum di sini akan diatur dan disusun kemudian, sesuai dengan relevansi dan urgensinya.

Kotabaru, Agustus 2014








Sabtu, 16 Agustus 2014

Tujuh Kampung di Satui, Ba'ah

TVRI Kalsel, Tanah Bumbu -- Baribu-ribu rumah warga di tujuh kampung di Satui, Tanah Bumbu, Kalimantan Selatan, kaba’ahan. Nang ba’ah Sungai Danau, Satui Timur, Satui Barat, Sinar Bulan, Jombang, Sekapuk wan Kampung Sejahtera.

Ba’ah di Satui saku marga hujan nang turun tatarusan. Ayungannya, dua ribu rumah warga, tinggalam. Tinggi banyunya mandua dapa. Warga kada hingkat baapa-apa. Nang rumahnya tinggalam paksa baandah ka wadah nang tatinggi. Kartak wan jalan kampung, tinggalam jua. Mun handak ka mana-mana, paksa bajukung. 

Lain pada hujan labat nang turun tatarusan, banyu nang turun matan Gunung Meratus, daras jua. Banyunya landas, bisa malarutakan rumah. Warga nang magun haja bagana di rumahnya, disuruh baalih ka lain, ka wadah nang tatinggi. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 17.08.2014, Pukul Lima kamarian. Yushar Wardana, TVRI Kalimantan Selatan, mahabarakan.) 





Aruh Dayak Pambakulan

TVRI Kalsel, Barabai -- Bujur jaman sudah sasain maju, urang Dayak di banua Kalimantan Selatan tatap maharagu adat budaya warisan padatuannya. Imbah musim katam, banyak urang Dayak nang baaruhan, tamasuk Dayak Pambakulan, di Kampung Linau, Batang Alai Timur, Hulu Sungai Tangah (HST).

Tumatan baisukan, warga sudah takumpulan di Balai Adat nang talung puluh lima pal jauhnya pada Barabai. Di tangah balai sudah banyak umbun, bakul, nang isinya baras, gula, minyak lamak wan nyiur. Ada jua batang buluh nang dibajui kaya bibinian, nang dingarani “babujangan”.

Wayah aruh bamula, balian wan tatuha adat dudukan mangulilingi sasambahan, sambil bamamang, mangariau aruah padatuan. Kada saapa, balian karasukan. Balian nang dirasuki aruah padatuan bajalan kuliling barapa kali, bapandir basa sangiyang awan tatuha adat.  Aruh hanyar tuntung, imbah balian ampih karasukan. Imbah tu, urang makanan samunyaan.

Gasan warga Dayak Pambakulan, aruh imbah katam wajip hukumnya. Banih hasil kataman di pahumaan kada dibariakan gasan dimakan atawa dijual, sabaluman baaruhan. (*) [ysas]  

(“Habar Banua”, TVRI Kalimantan Selatan, Banjarmasin. Siaran Ahad, 17.08.2014, Pukul Lima kamarian. Matan Barabai, Fitri, TVRI Kalimantan Selatan, mahabarakan.) 

                                                                                     


Iwak Matian di Batang Banyu Balangan

TVRI Kalsel, Paringin -- Paiwakan di Kampung Kupang, Lampihong, Balangan, asa marista banar. Iwak gaduhan nang dikurung dalam karamba di batang banyu Sungai Balangan, kana panyakit, matian tunggal ikungan.

Iwak nang kana panyakit, awaknya babintik-bintik. Sisiknya tapaculan. Kada saapa, mati. Panyakitnya datang wayah banyu pasang. Biar tuhuk ditambai, kada mampan jua. Iwak tatap matian. Damintu tatarusan. Bangatnya pulang, panyakitnya malalar. Biar iwak nang kana panyakit sudah dikaluarakan, iwak lain magun haja katularan. 

Ujar bubuhan paiwakan, sudah mandua tahunan iwak gaduhannya bapanyakitan. Napa marganya, bubuhannya kada tahu jua. Suwah jua iwak di karamba matian sabarataan. Saku karacunan banyu buangan matan tabukan parusahaan batu harang.

Dinas Parikanan Balangan sudah mamariksa banyu di batang. Ujar bubuhannya, iwak matian kana hama panyakit. Sapalihan jua marga iwak di karamba kabanyakan. Lain pada itu, banyu sungai sudah rigat.  

Sudah ada paiwakan nang bangkrut. Ada nang tajual karamba. Mun iwak nang kana panyakit sudah ganal-ganal, kawa haja dijual ka pasar. Tagal, mun halui-halui, kada payu dijual. Bubuhan paiwakan bisa rugi bajuta-juta. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 17.08.2014, Pukul Lima kamarian. Matan Balangan, Fitri, TVRI Kalimantan Selatan, mahabarakan.) 



Ujian Gasan Calun Guru

TVRI Kalsel, Banjarmasin -- Guru wayah ini lain banar awan guru bahari. Bujur gajihnya sadikit, guru bahari simpun haja. Guru wayah ini sapalihan baparigal kada sampuraka.

Bujur gajihnya ganal, guru wayah ini ada nang bagandakan awan papadaannya. Ada nang katuju baarai, atawa bagandakan, awan muridnya. Ada nang batumburan, galu saalamanan, marga muridnya batianan. Ada jua nang jarang maajar di sakulahan, aur bajualan, bacari duit haja.

Ujar kapala ahui Parsatuan Guru Ripublik Indunisia (PGRI) Kalimantan Selatan, Haji Dahri, sayang banar guru wayah ini sapalihan baparigal nang kada-kada. Tagal, ujarnya, guru manusia jua, nang bisa hilap. PGRI suwah manyurung ka pamarintah, wayah batarimaan, nang cagar jadi guru diuji dahulu jiwanya. Sakira katahuan, patut-kadanya inya jadi guru.

Haji Dahri handak, guru di banua Kalimantan Selatan manjaga adab wan manambah ilmunya, sakira muridnya jadi urang pintar nang baik wan baadab jua. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 17.08.2014, Pukul Lima kamarian. TVRI Kalimantan Selatan, mahabarakan.) 





Sabtu, 09 Agustus 2014

Haul Syekh Muhammad Arsyad Al-Banjari

TVRI Kalsel, Martapura -- Umat Islam di banua Kalimantan Selatan wan matan mana-mana mahaul Syekh Muhammad Arsyad Al-Banjari, atawa Datu Kalampayan, nang kadua ratus lapan tahun.

Haulannya di Masigit Tupaturrogibin, Kampung Dalam Pagar Timur, Martapura. Baribu-ribu ikung nang datangan. Ada nang matan Kalimantan Timur wan Kalimantan Tangah. Hubnur Kalimantan Selatan, Rudy Ariffin, wan arjabat banua lainnya, ada jua.

Ujar Rudy Ariffin, Syekh Muhammad Arsyad Al-Banjari bin Abdullah bin Abdurrahman Al-Banjari diranakakan di Kampung Lok Gabang, 17 Maret 1710. Habis umur di Kampung Dalam Pagar, 3 Oktober 1812. Umurnya 102 tahun. Syekh Muhammad Arsyad Al-Banjari cangkal maislamakan urang banua, baik banar mun dituruti umat Islam nang hidup wayah ini.

Ujar Haji Sampurna, nang datang matan Balikpapan, Kalimantan Timur, haul Datu Kalampayan banyak banar hikmahnya, gasan mahargai usaha Syekh Muhammad Arsyad Al-Banjari maislamakan banua Banjar.

Lain pada Hubnur Rudy Ariffin, ada jua Bupati Banjar Sultan Khairul Saleh, Walikota Banjarmasin Muhidin, Bupati Tanah Bumbu Mardani H. Maming, wan arjabat banua Kalimantan Selatan lainnya. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 10.08.2014, Pukul Lima kamarian. Matan Martapura, Nurdin Yusuf, TVRI Kalimantan Selatan, mahabarakan.) 

                                                                                     


Maunjun di Lanting Paring Sungai Balangan

TVRI Kalsel, Paringin -- Urang banua Banjar katuju maunjun. Tagal, lain jua rasanya maunjun di tabing wan di atas lanting. Sapanjangan Sungai Balangan, banyak warga maunjun di lanting paring.

Lanting paring nang gasan warga Bumi Sanggam maunjun bajurut sapanjangan sungai. Di hujung lanting, ada wadah gasan kanaungan, sakira paunjunan kada kapanasan atawa kahujanan. Tumatan lanting, tantaran diulur, unjun dilabuh. Sambil mahadang unjunnya dipatuk iwak, paunjunan santai di kanaungan, basangga wihang, manjanaki banyu sungai. Damintu hari-hari.

Sasain parak kamarian, sasain banyak paunjunan datangan. Lanting paring sasain banyak. Ada jua nang maunjun di jukung. Tagal, maunjun di lanting paring sudah lawas jadi kabiasaan warga Balangan.

Warga maunjun kada sahibar gasan baramian haja. Sapalihan ada jua nang gasan bacari. Iwak di Sungai Balangan banyak haja, tamasuk iwak baung. Mun banyak kulihan, sapalihan dijual di pasar, sapalihan gasan dimakan saurang. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 10.08.2014, Pukul Lima kamarian. Matan Balangan, Fitri, TVRI Kalimantan Selatan, mahabarakan.) 



Kakanakan Dirungkau Biruang

TVRI Kalsel, Banjarmasin -- Sudah saminggu labih Taufik Hidayat nang umur sawalas tahun ditambai di Rumah Sakit Suaka Insan, Banjarmasin. Tangan kanannya sudah talu kali dijahit, imbah dirungkau wan diigut biruang.

Salasa samalam, tangan kanan murid kalas anam SDN Kampung Melayu 7 ni wawah diigut biruang. Lapak tangannya rabit, tulangnya patah, musti dijahit barapa kali. Ujar kawitan Taufik Hidayat, Nurhayati, inya kada manyangka sahama-hama, bakunjangan ka kabun satua jadi bala gasan anaknya. Ujarnya, kabun satua Pamarintah Banjarmasin musti tanggung jawap. Bayaran rumah sakit, larang banar.

Dinas Partanian Banjarmasin sudah bajanji mambayari rumah sakit. Tagal, ujar kulawarga Nurhayati, inggan samalam balum ada habarnya.

Di banua Kalimantan Selatan, kabun satua sawalasannya. Andaknya di Jalan Jahri Saleh, Banjarmasin. Bujur satuanya kada tapi banyak, tagal nang bakunjangan kamari malaran jua. Sakira urang kada jara, mustinya kakanakan nang datang kamari dijaga wan dihawasi. Sakira kada bakajadian lagi. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 10.08.2014, Pukul Lima kamarian. Wiryanto Hadi, TVRI Kalimantan Selatan, mahabarakan.) 





Sabtu, 02 Agustus 2014

Baladuman Malam Hari Raya

TVRI Kalsel, Barabai -- Bunyi gadaguman di Kampung Palajau malam hari raya samalam lain bunyi latupan, tagal laduman karbit. Bunyinya liwar hangkui. Saling nyaringan. Bumi bagantar. Talinga sunging mandangar.

Kadada nang tahunya, matan pabila kabiasaan baladuman saban malam hari raya Idul Fitri ni bamula. Ujar Haji Fahrudin, tatuha Kampung Palajau, Pandawan, Hulu Sungai Tangah (HST), Kalimantan Selatan, tumatan sidin halus warga sudah baladuman saban malam hari raya. Tahun ini warga baulah 108 buting laduman. Tahun samalam, 60 buting haja.

Ladumannya diulah sabulan sabaluman bulan puasa. Laduman musti diulah badahulu, gasan baladuman salajur batakbiran malam hari raya. Ujar Haji Fahrudin, rapun hanau nang gasan diulah laduman musti kujur. Imbah ditabang, dikuyak, dibalah dua. Dalamnya dikarik. Imbah tu, ditangkupakan baasa, diikat tali anyaman buluh. Rapun hanaunya manukar. Sarapun, haraganya ampat ratus ribu. Ada jua nang sajuta, diliat ganal-halusnya.

Sakira hakun babunyi, luang ladumannya dibuati banyu wan karbit. Luangnya ditukupi satumat, sakira karbitnya tarandam. Mun kabanyakan banyu, laduman bisa buntat. Imbah tu, laduman dicucul. Siapa haja hingkat mancucul ladumannya. Kada pandang tuha, lalakian, bibinian atawa kakanakan. Asal wani. Gasan jaga-jaga, nang ampun gawi manyiapakan mutur ambulan wan pamadam kabakaran. Pulisi wan tantara, ada jua.

Sayang banar, Pamarintah HST kada mahatiakan kabiasaan warga baladuman saban malam hari raya Idul Fitri di Kampung Palajau, padahal saku baik banar gasan wisata budaya. Nang datang kada warga Bumi Murakata haja. Urang luar, banyak jua. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 03.08.2014, Pukul Lima kamarian. Rachma Ainun, TVRI Kalimantan Selatan, mahabarakan.) 




Kampung Katupat di Banjarmasin

TVRI Kalsel, Banjarmasin -- Di Banjarmasin, siapa nang kada tahu Kampung Katupat? Mun bakunjangan ka Sungai Baru, sapanjangan jalan bilang katupat haja nang dijanaki. Katupat wan lontong disadai atawa digantung, antui-antui di palataran, atawa di muka rumah warga.

Tumatan subuh, imbah babuncalak mata, warga Sungai Baru sudah mangulai katupat. Maginnya sabaluman hari raya Idul Fitri, 1 Syawal 1435 Hijriyah samalam, tukang ulah katupat wan lontong bilang kada kasintakan hinak, kabanyakan gawian. Nang maambil upah maulah urung katupat kada bibinan nang tuha-tuha haja, bibinian nang anum-anum banyak jua.

Di rumah Halimah, nang wadah baulah, manjarang wan bajual katupat wan lontong, damintu jua. Samunyaan kadada nang baranainya: maulah urung katupat, maisi’i barasnya, manjarang katupat wan lontongnya.

Hari raya Idul Fitri babarakat banar gasan warga Kampung Katupat. Halimah nang baumuran baulah katupat, damintu jua. Rajakinya dasar di katupat. Marga kada kaawakan, paksa inya mangiau urang gasan mandangani bagawi. Nang kaya tahun samalam jua, hadap hari raya samalam inya baulah 6.000 inggan 7.000 bigi katupat wan lontong hari-hari. Inya kulihi haja anam juta sahari. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 03.08.2014, Pukul Lima kamarian. Rini Muliana, Ibnu Fatih, TVRI Kalimantan Selatan, mahabarakan.) 



                                                                                                                  

Bubuhan Hukuman Dapat Karinganan

TVRI Kalsel, Banjarmasin -- Hari raya Idul Fitri 1 Syawal 1435 Hijriyah samalam banyak banar hikmahnya gasan bubuhan hukuman di Panjara Taluk Dalam, Banjarmasin. 1.022 ikung hukuman dapat karinganan matan Kamantrian Hukum wan HAM RI.

Ujar kapala ahui Panjara Taluk Dalam, Eddy Teguh Widodo, pamarintah mangurangi hukuman gasan bubuhan hukuman nang apik parigalnya salawas dipanjara. 9 ikung langsung bibas, 60 ikung hukumannya dikurangi sabulan, 60 ikung hukumannya dikurangi tangah dua bulan.

Nang pambanyaknya dapat karinganan bubuhan nang dihukum marga narkuba: 689 ikung. 12 ikung nang dihukum marga kurupsi, dikurangi jua hukumannya. Ujar Eddy Teguh Widodo, Panjara Taluk Dalam sudah kahibakan. Mustinya gasan 366 ikung haja, tagal dibuati 2.389 ikung hukuman. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 03.08.2014, Pukul Lima kamarian. Wiryanto Hadi, TVRI Kalimantan Selatan, mahabarakan.)