Helikuptir Halui Sagan Mangudak Matan Atas

TVRI Kalsel, Banjarmasin -- Saku banyak nang balum tahu, urang Indonesia nang katuju bakudakan wayah ini katuju banar lawan quadcopter, tamasuk di Banjarmasin. Quadcopter ngaran helikuptir halui nang diatur ardiu atawa remote control.

Di dalamnya ada kudakan, sagan mangudak matan atas, ngarannya gupro. Tumatan atas, nyaman mun handak mangudak nang di darat. Hingkat jua diatur, handak saapa tarabangnya, sagan mangudak napa haja.

Cangkiriknya ampat buting di higa, sagan mambawa kudakannya. Kawa diatur sagan tarabang atawa turun ka darat. Mun sagan mangudak atawa baulah pilim tumatan atas, hasilnya baik banar.

Quadcopter kada sagan mainan atawa hiburan wara. Hingkat jua sagan macam-macam, pariannya mangudak pamandangan alam, batang banyu, pasar tarapung, rumah, kawa jua mangudak urang baarak pangantin tumatan atas. Mun pian handak jua, haraganya Rp 15 juta. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 05/01/2014, Pukul Lima kamarian. M. Maurisza, Sineda, TVRI Kalimantan Selatan, mahabarakan.) 

Banyak Nang Batampah Arguci ka Banua

TVRI Kalsel, Banjarmasin -- Sasain lawas, sasain banyak nang katuju arguci. Alahan lagi, arguci sudah jadi undas kain hias Kalimantan Selatan. Banyak nang katuju arguci nang bagirap-girap, baik sagan lapik panataian atawa baju pangantin adat Banjar. Kalirnya nang bagirap-girap, bahindang bahindala, pantar kain istana raja-raja.

Gambar arguci bamacam-macam. Ada Asmaul Husna wan Ayat Kursi. Liwar langkar mun sagan ambin sayup, hiasan dalam tawing rumah. Ada jua gambar mawar, malati, kambang jaruju wan lain-lain. Samunyaan liwar langkarnya.

Bujur gawian di rumah haja, tagal urang Indonesia sudah tahuan lawan arguci Kalimantan Selatan. Ujar nang tukang ulah, Hajjah Siti Nurazizah, nang batampah arguci saling banyakan, sampai sidin kada kaawakan.

Lain pada sagan ambin sayup, arguci hingkat jua sagan baju tarian adat Banjar, baju mamanda wan wayang gung. Ada jua nang diulah kipas, lapik mija wan lain-lain. Urang banua lain banyak nang batampah arguci ka banua Kalimantan Selatan. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 29/12/2013, Pukul lima kamarian. Wiryanto Hadi, Fauzi Oku, TVRI Kalimantan Selatan, mahabarakan.) 

Milad 54 Tahun Hulu Sungai Tengah

TVRI Kalsel, Barabai -- Kabupaten Hulu Sungai Tengah (HST) sudah sasain maju. Tahun 2013, umurnya 54 tahun. Milad HST tahun ini judulnya “Mari Bahimat, Barakat-rakat, Bagawi Mudah-mudahan Babarkat”.

Judul tu tanda, Pamarintah HST bahimat bausaha mambangun banua. Sahibar kisah, APBD HST wayah ini sudah Rp 1 triliun, tabanyak pada dahulu. PDRB-nya, naik jua. Warga nang hidup susah wan kada bagawi, sudah takurang jua.

Marga itu, wayah karasmin di Lapangan Dwi Warna, Barabai (24/12), Hubnur Kalimantan Selatan Rudy Ariffin handak, pambangunan di Bumi Murakata magin dinahapi, sakira magin baik lagi. Alahan lagi, HST tamasuk banua di Kalimantan Selatan nang jadi kindai banih Indonesia. Banih matan pahumaan di HST tamasuk nang pambanyaknya di banua.

Lain pada manjulung hadiah sagan bubuhan nang juara batanding macam-macam, salajur jua ditandatangani paruyik pambangunan sagan HST. Ayungannya, Hubnur Rudy Ariffin wan Ibu Hajjah Hayatun Fardah manatak wadai apam Barabai. Tatakan sidin lain pada nang lain. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 29/12/2013, Pukul lima kamarian. Rini Muliana, Fauzi Ipaw, TVRI Kalimantan Selatan, mahabarakan.) 

Urang Banjar Pamakan Banar ka Iwak

TVRI Kalsel, Banjarmasin -- Di Indonesia, urang Banjar, Kalimantan Selatan, tamasuk pamakan banar ka iwak, pambanyaknya pada urang banua lain. Satahun, rata-rata urang Banjar makan iwak 44,78 kilu. Bujur damintu, pamarintah magun haja bausaha, sakira urang Indonesia katuju makan iwak.

Ujar bubuhan Kementerian Perikanan RI, Hajjah Innes Rahmania, wayah manasmiahi Forikan, pawadahan bubuhan nang katuju makan iwak di Banjarmasin, sasain lawas, sasain banyak urang Indonesia nang katuju makan junk food, atawa makanan luar nagri. Mun damintu tatarusan, kaina urang kada katuju lagi makan iwak. Padahal, iwak baik banar sagan kakanakan, sagan manambah kapintaran.

Di Indonesia, inggan ini Forikan ada di 22 parupinsi wan 132 kabupaten/kota. Diharap, kaina Forikan mambawai warga lainnya sakira katuju makan iwak. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 29/12/2013, Pukul lima kamarian. Wiryanto Hadi, Fauzi Oku, TVRI Kalimantan Selatan, mahabarakan.) 

Murid SMA Dibawai Umpat Mahawasi Pamilu 2014

TVRI Kalsel, Banjarmasin -- Kada mahasiswa wan pawadahan bubuhan nang anum-anum haja nang diminta saka rila mahawasi Pamilu 2014, murid-murid SMA diminta Panwaslu Banjarmasin jua mandangani.

Batanam Puhun di Pantai Wisata Rindu Alam

TVRI Kalsel, Tanah Bumbu -- Pasir pantai nang putih wan barasih kacilangan sapanjangan. Pantai Rindu Alam nang andaknya 20 pal pada Batulicin ni, nyaman dipandang. Puhun pinus tumbuh sapanjangan pantai nang 2 pal-an ni. Sakira warga nyaman bakunjangan kamari, Pamarintah Kabupaten Tanah Bumbu sudah mambaiki jalannya.

Kain Pagatan Sagan Baju Muslim

TVRI Kalsel, Tanah Bumbu -- Lain pada kain sasirangan, di Kalimantan Selatan ada jua kain Pagatan. Sakira warga magin katuju, Pamarintah Kabupaten Tanah Bumbu maulah gawi maarai baju Muslimah, pakai kain Pagatan. Pawadahan bibinian di Tanah Bumbu, rami umpatan.