Tuku Amas di Pasar Ujung Murung Karampukan

TVRI Kalsel, Banjarmasin -- Tuku Amas “Angkasa Indah” di Pasar Ujung Murung, Banjarmasin, karampukan. Parampuknya baanam, bakandaraan, babaju saraba hirang wan bapistul. Parampuknya tamasuk wani. Wani marampuk siang-siang rahat urang rami.

Nang ampun tuku, Yudarto Thio alias Yucking, kana timbak di batang paha. Nang bini, Ike Yulian alias Sing King, kana tukun pistul di muha.

Ujar Sally, nang batuku di Pasar Ujung Murung jua, ada anam ikung lalakian nang kulilik-kulilik intangan Tuku Amas “Angkasa Indah”. Kajadiannya lakas banar. Sawat ada bunyi timbakan talu kali. Imbah kajadian, hanyar katahuan, marga malawan, nang ampun tuku ditimbak parampuk.

Ujar Kapala Ahui Pulisi Banjarmasin, Kombes Suharyono, nang langsung manukui wadah kajadiannya, parampuknya sudah bapangalaman. Imbah marampuk, langsung bukahan. Pulisi hancap mangumpulakan bukti-bukti wan manakuni saksi-saksi.

Parampuk mambawa ampat kilu amas hiasan. Talu ikung urang nang dituduh marampuk, katangkapan di Lapangan Ulin Syamsudin Noor, Banjarbaru, rahat handak bakapal tarbang ka Makassar. Yuking wan Sing King ditambai di Rumah Sakit Suaka Insan. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 12/01/2014, Pukul lima kamarian. Budi Alamsyah, Syahril Malik, TVRI Kalimantan Selatan, mahabarakan.) 

Urang Susah Kada Dilayani Baranak di Rumah Sakit Ulin

TVRI Kalsel, Banjarmasin -- Maria Ulfah nang baranak subuh Salasa (07/01/2013) samalam sabalumannya handak baranak di Puskesmas Sungai Jingah, Banjarmasin. Tagal, marga parutnya ganal banar wan kada hingkat baranak nang kaya biasa, bidan Puskesmas  mambawa urang susah nang baisi kartu Jampersal tu ka Rumah Sakit Ulin.

Tagal, urang Rumah Sakit Ulin manyuruhnya ka Rumah Sakit Anshari Saleh haja. Ujar urang Rumah Sakit Ulin, mun Rumah Sakit Anshari Saleh kada sanggup, hanyar babulik ka sana, mambawa surat matan rumah sakit di Kayu Tangi Ujung tu.

Ujar bidan Puskesmas Sungai Jingah nang mandangani baurusan, urang Rumah Sakit Ulin baucap: mun Maria Ulfah handak baranak di sana, kawa haja, tagal kada kawa parai, musti bayar.

Di Rumah Sakit Anshari Saleh, Maria Ulfah langsung dilayani. Inya baranak nang kaya biasa. Tagal, anak lalakiannya nang talu kilu satangah maninggal dunia. Kikira maninggal dalam parut, marga lambat diranakakan. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 12/01/2014, Pukul Lima kamarian. Nazat Fitriah, TVRI Kalimantan Selatan, mahabarakan.) 

Cap "Halal" di Bungkus Makanan

TVRI Kalsel, Banjarmasin -- Mun dijanaki sakilaran, ada cap “halal” di bungkus makanan nang banyak dijual urang di warung-warung. Tagal, ada jua nang kada tahu, cap “halal” di bungkus makanan kada asli mun kada ba-cap “halal” matan Majlis Ulama Indonesia (MUI). Cap “halal” MUI bakurinah diulah, kada hingkat dipalsu.

Puhun gawi MUI Kalimantan Selatan, Rusdiansyah Asnawi, nang ditakuni rahat bamujakarah di Uniska, Banjarmasin, bapadah, banyak makanan nang ba-cap “halal” di bungkusnya, tagal kada asli, marga kadada cap MUI. Warga musti itih-itih manjanaki cap “halal” di bungkus makanan. Mun kadada cap MUI, makanannya bisa kada halal.

Ujar Kapala Ahui Balai POM Kalimantan Selatan di Banjarmasin, Dewi Prawitasari, banyak nang kada tahu cara minta cap “halal” sagan makanan jualannya. Urang nang manukar, damintu jua, banyak nang kada tapi paham.

Ujar Dewi Prawitasari, maandak cap “halal” di bungkus makanan kada gagampangan. Ada aturannya. Sabalumannya musti dipariksa MUI jua. Imbah lulus di MUI, hanyar Balai POM akur. Imbah tu, hanyar cap “halal”-nya kaluar. (*) [ysas]  

(“Habar Banua”, TVRI Kalimantan Selatan, Banjarmasin. Siaran Ahad, 05/01/2014, Pukul lima kamarian. Rini Muliana, Fauzi Oku, TVRI Kalimantan Selatan, mahabarakan.) 

Hubnur Mailangi Rumah Singgah Kanker

TVRI Kalsel, Banjarmasin -- Nasrullah takurihing wayah Hubnur Kalimantan Selatan Rudy Ariffin bailang ka wadahnya baandah, di Rumahku, Rumah Singgah Anak Kanker, di Kampung Melayu, Gang Kenari, Banjarmasin.

Rumah nang sudah dua satangah tahun ada ni sabuahannya di banua, wadah baandah kakanak nang bapanyakit kanker.  Kakanak nang dikawani kawitannya, datang matan unjut banua, ada jua nang matan luar, sagan batatamba.

Ujar puhun gawinya, Habib Salim Al-Kaff, ada bapuluh-puluh anak nang bapanyakit kanker di wadahnya. Inya minta Hubnur Rudy Ariffin mambantu ubat sagan kakanak nang kada mampu.

Hubnur Rudy Ariffin, nang didangani Kapala Ahui Rumah Sakit Ulin, Banjarmasin, duktur Suciati, mahargai banar wadah nang diurus saka rila ni. Pamarintah cagar mambantu jua, sakira wadahnya tanyaman pada nang ada, tamasuk mambantu kakanak nang saban hari baurusan ka rumah sakit. Hubnur maunjuki duit, sagan kamaslahatan wadah baandah nang inggan ini diurus bubuhannya saurang. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 05/01/2014, Pukul lima kamarian. Rini Muliana, Fauzi Oku, TVRI Kalimantan Selatan, mahabarakan.) 

Helikuptir Halui Sagan Mangudak Matan Atas

TVRI Kalsel, Banjarmasin -- Saku banyak nang balum tahu, urang Indonesia nang katuju bakudakan wayah ini katuju banar lawan quadcopter, tamasuk di Banjarmasin. Quadcopter ngaran helikuptir halui nang diatur ardiu atawa remote control.

Di dalamnya ada kudakan, sagan mangudak matan atas, ngarannya gupro. Tumatan atas, nyaman mun handak mangudak nang di darat. Hingkat jua diatur, handak saapa tarabangnya, sagan mangudak napa haja.

Cangkiriknya ampat buting di higa, sagan mambawa kudakannya. Kawa diatur sagan tarabang atawa turun ka darat. Mun sagan mangudak atawa baulah pilim tumatan atas, hasilnya baik banar.

Quadcopter kada sagan mainan atawa hiburan wara. Hingkat jua sagan macam-macam, pariannya mangudak pamandangan alam, batang banyu, pasar tarapung, rumah, kawa jua mangudak urang baarak pangantin tumatan atas. Mun pian handak jua, haraganya Rp 15 juta. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 05/01/2014, Pukul Lima kamarian. M. Maurisza, Sineda, TVRI Kalimantan Selatan, mahabarakan.)