Ilung di Candi Laras, Tapin

TVRI Kalsel, Tapin -- Di batang banyu banua Kalimantan Selatan, ilung tumbuh saling banyakan. Bahanu, ilung dianggap mangganggu, manyasaki banyu. Mun sangkut di bawah jambatan, sungai bisa pampan. Jukung ngalih lalu. Tagal, di Kampung Candi Laras, Kecamatan Candi Laras Selatan, Kabupaten Tapin, ilung bisa jadi duit.

Matan bahari, urang Kampung Candi Laras pintar-pintar, cangkal wan rajin bausaha. Ilung diulah salipi, bakul, tas wan karanjang. Hasilnya sudah banyak dijual ka luar banua.

Sambil manampaiakan gambar wan piagamnya, Saidah arai bakisah. Ujarnya, hasil ulahannya sudah dijual ka Palangka Raya wan Balikpapan. Ujarnya, inya bisa jua maulah barang lainnya, kada salipi, bakul, tas wan karanjang haja.

Ujar Saidah, bahari argawai Pamarintah Tapin rancak ka kampungnya, mambantu. Tamasuk mainjami duit, lima inggan sapuluh juta, sagan mudal usaha. Tagal, wayah ini kada suah lagi. Inya handak, Pamarintah Tapin manggaduh bubuhannya, sakira warga nyaman jua bausaha. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 09/02/2014, Pukul lima kamarian. Matan Rantau, Jamaludin, TVRI Kalimantan Selatan, mahabarakan.) 

Bawarung Samalaman

TVRI Kalsel, Tapin -- Sapanjang pinggir kartak, tumatan Banjar ka Hulu Sungai, banyak warung nang buka samalaman. Lalakian nang anum-anum katuju kacungkungan, mawarung. Lain pada sagan makan-nginum, ada jua nang katuju mamandiri bibinian warung inggan subuh. Tukang tunggu warung rajin bibinian nang anum-anum.

Ujar tukang tunggu warung, rajin bubuhannya kulihi haja dua satangah inggan satangah jutaan bawarung samalaman. Tagal, bahanu bubuhannya kipuh jua mun ada lalakian nang pina mucil, bamaukan, bakalahi, atawa tabarungan dirajia pulisi.

Bibinian warung ni sapalihan handak jua bagawi di lain. Banyak nang manyangka, nang hakun bawarung malam-malam musti bibinian nakal, sambialau atawa pandayangan. Ada jua nang manyambat “warung jablai”, wan galaran lain nang kada baik, padahal kada samunyaan jua. Sapalihan marga tapaksa haja, sagan mamakani kulawarganya. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 09/02/2014, Pukul Lima kamarian. Matan Rantau, Jamaludin, TVRI Kalimantan Selatan, mahabarakan.) 

Imlek, Wadai Karanjang Palarisnya

TVRI Kalsel, Banjarmasin -- “Wadai karanjang” tamasuk wadai adat nang wajip ada saban Tahun Baru Cina, tamasuk sagan Imlek nang ka-2565, tahun ini.  Di wadah nang bajualan, di Pal Satu, Banjarmasin, “wadai karanjang” banyak dijual. Haraganya lain-lain, matan nang salawi ribu inggan nang talung puluh lima ribu.

Lain pada “wadai karanjang”, gulali, angpau wan makanan adat Cina lainnya banyak jua dijual. Karanjang makanan wan nginuman, atawa parsel, ujar Tachi Eva nang bajualan, mun ada nang batampah haja hanyar diulahakan.

Sabaluman Imlek samalam, karanjang makanan wan nginuman nang bungkusnya saraba habang balum banyak ditukari urang. Haraganya matan nang tangah dua ratus ribu inggan nang satangah jutaan sakaranjang, dilihat ukuran wan isinya jua.

Ujar Octaviana, nang matan Jakarta handak ba-Imlek di wadah kawitannya di Banjarmasin, mudahan Imlek tahun ini tabaik pada tahun tadi.

Kada katurunan Cina haja nang manukar “wadai karanjang”. Warga Banjar lainnya ada jua nang manukar, mambari hadiah sagan jiran nang ba-Imlek. Gong Xi Fa Cai! (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 02/02/2014, Pukul lima kamarian. Ten Umiayah, Rahma Ainun, TVRI Kalimantan Selatan, mahabarakan.) 

Taman Kamboja Mulai Rusak

TVRI Kalsel, Banjarmasin -- Taman Kamboja di Jalan Anang Adenansi, Banjarmasin, bahari kuburan Nasrani. Puhun gayam tumbuh ganal-ganal di mukanya. Lawas kalawasan, banyak bangunan hanyar ditajak.

Bangunan magin babanyak di Banjarmasin. Banjarmasin magin sasak wan jajal. Kadada lagi wadah sagan santai. Ayungannya, kuburan Nasrani dialih ka lain, wadahnya diulah taman.

Tagal, hanyar talu tahun, Taman Kamboja mulai rusak. Kadada nang digajih sagan manjaga wan maharagunya. Kumpai liwar sabat. Mun malam, liwar kadapnya. Kada siang, kada malam, bahanu ada urang bagandakan, bakinuman wan bamaukan di sana.

Ujar Sofian, urang Tanjung nang kaduluran singgah, sabujurnya Taman Kamboja baik banar sagan wadah santai. Inya handak, Pamarintah Banjarmasin bujur-bujur mahatiakan wan maharagu Taman Kamboja, sagan kanyamanan sabarataan.

Dalam pada itu, warga nang santai di Taman Kamboja kada hakun jua umpat maharagu. Ratik sabak, bahambur di mana-mana, Taman Kamboja marigat dapatnya. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 02/02/2014, Pukul lima kamarian. Ten Umiayah, Rahma Ainun, TVRI Kalimantan Selatan, mahabarakan.) 

Wadah Wisata Sagan Batabuk Batu Harang

TVRI Kalsel, Rantau -- Wadah wisata parlu banar sagan santai. Sagan wadah bakunjangan, sagan hiburan. Sakira kada pusing naning mamikirakan usaha atawa gawian hari-hari.

Sayangnya, wadah wisata di Kabupaten Tapin, kurang banar. Danau Peranginan Ratu di Kampung Budi Mulia, Kecamatan Lokpaikat, wadahnya pina kurisaan. Bahari, warga katuju banar bakunjangan ka Peranginan Ratu. Danaunya luas, banyunya barasih, wadahnya nyaman ditukui. Urang luar Tapin banyak jua nang bakunjangan kamari.

Peranginan Ratu sudah kada taharagu lagi. Kumpai sabat, puhun ganal-ganal, banyu danaunya rigat. Jalan nang ampah kamari bakipit ditumbuhi kumpai. Tanahnya luluk, licak wan lincar.

Bakas Pambakal Kampung Budi Mulia, Winarto, kada yakin Pamarintah Tapin hakun maharagu Peranginan Ratu. Di situ sudah ada P.T. ADP, nang batabuk batu harang. Ujarnya, jaka wadah wisata dibuka lagi, kawa jua warga umpat bausaha, bacari rajaki. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 02/02/2014, Pukul Lima kamarian. Matan Rantau, Jamaludin, TVRI Kalimantan Selatan, mahabarakan.)