Pamilu, Paiwakan di Kotabaru Parai

TVRI Kalsel, Kotabaru -- Warga Kampung Rampa Lama, Pulau Laut Utara, Kotabaru, rami takumpulan wayah Pamilu, hari Arba samalam. Bujur wadah nang gasan mancucuk atawa TPS-nya bahatap tarpal haja, bubuhan paiwakan tatap basumangat.

                                                                                                               

Alahan lagi, bubuhan paiwakan kadada saikung-ikung nang maiwak di laut. Ujar bubuhannya, kada maiwak sudah jadi kabiasaan warga saban Pamilu. Bujur kada kawa bacari, bubuhannya kada papa, baya sahari haja.

Di Kampung Dirgahayu, damintu jua. Bapuluh-puluh kapal iwak sandar di batang, kada maiwak. Kada marga Pamilu haja, sapalihan jua marga musimnya. Wayah Pamilu samalam, bulan rahatan tarang. Wayah bulan tarang, bubuhan paiwakan kada maiwak. Mun bulan bulan tarang, ngalih manjanaki iwak timbul atawa nang galiuran di banyu. Sabulan sakali, bulan tarang sapuluh hari.

Warga Kotabaru nang umpat Pamilu tahun ini samunyaan 225.000 ikung. KPU Bumi Sa-ijaan manyiapakan 862 wadah nang gasan mancucuk di 21 kacamatan, di 222 kampung. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 13/04/2014, Pukul Lima kamarian. Matan Kotabaru, Fitri, TVRI Kalimantan Selatan, mahabarakan.) 

Nasip Seni Tradisi Banjar di Tapin

TVRI Kalsel, Rantau -- Seni tradisi Kalimantan Selatan nang ada di Tapin sabujurnya kada kalah jua awan anggit urang, tagal nang anum-anum sapalihan katuju budaya urang pada budaya banua saurang. Mun kada dihatiakan, seni tradisi bisa langlam, hilang kada katahuan.

Seni tradisi baik banar gasan nang anum-anum, sakira tahu di basa, adap, adat wan budaya. Mamanda, musik panting, wayang gung, kuda gipang, wayang kulit, tari japin wan silat kuntau sudah jarang di Bumi Bastari, tajak ka pinggir dapatnya budaya lain. Ujar, di Rantau ada Dewan Kesenian Tapin, tagal katiya kadada buriniknya.

Nang anum-anum sapalihan kada katuju lagi balajar seni tradisi. Kita musti sama-sama mamikirakan, sakira seni tradisi warisan nini-datu bahari kada langlam. Pamarintah Tapin musti mambantu seniman wan budayawan malajari seni tradisi gasan bubuhan nang anum-anum, supaya ada nang mawaris.

                    

Urang banua Banjar sapalihan tahu haja, musik panting asalnya matan Tapin. Urang tahu jua, tari tirik matan Pandahan, pamandaan wan panggandutan di Margasari. Urang gin tahu, aruah Rundi (dadalang wayang kulit Banjar nang habis umur di Makkah), diam di Binuang.

Supaya seni tradisi taharagu, Pamarintah Tapin baiknya baulah Aturan Dairah kabudayaan. Mun ada aturan hukumnya, seni tradisi hingkat diharagu wan diduiti di APBD. Mun satatayuhnya haja, seni tradisi saku kadada lagi di Bumi Bastari. (*) [ysas]

                                                                                                                                        

(“Habar Banua”, TVRI Kalimantan Selatan, Banjarmasin. Siaran Ahad, 06/04/2014, Pukul Lima kamarian. Matan Rantau, Jamaludin, TVRI Kalimantan Selatan, mahabarakan.)

Kampung di Tapin Kadada Jambatan

TVRI Kalsel, Rantau -- Kampung Pabaungan Pantai, Candi Laras Selatan, Tapin, andaknya di subarang sungai. Sudah bapuluh tahun kadada jambatan gasan warga manyubarang ka kampung lain. Pabaungan kaya takuhum di unjut banua.

Warganya samunyaan 467 ikung, atawa 140 kapala kulawarga. Warga ngalih bausaha, marga kadada jambatan. Gasan manyubarang ka kampung lain, warga bajukung wan bakalutuk haja. Warga sudah lawas minta ulahakan jambatan awan Pamarintah Tapin, tagal inggan ini kadada hasilnya. 

Warga bingung jua, padahal tanah nang gasan manajak tihang jambatannya sudah ada. Alahan lagi, tanah di tabing sungai sawat ditabuk, gasan diukur saapa karasnya. Warga handak, Pamarintah Tapin balakas maulahakan jambatan, sakira hidup warga Bumi Bastari nyaman jua.

Ujar warga, bidan kampung kadada nang tahannya diandak di situ. Baganti tarus. Tambang gasan manyubarang malaran larang, marga itu bidan kada tahan lawas. Jaka ada jambatan, nyaman jua bakandaraan. Duit kada haran. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 06/04/2014, Pukul Lima kamarian. Matan Rantau, Jamaludin, TVRI Kalimantan Selatan, mahahabarakan.)

Jambatan Gantung Dalam Pagar, Rusak

TVRI Kalsel, Martapura -- Jambatan gantung di Kampung Dalam Pagar, nang gasan manyubarang ka Taluk Selong, Martapura Barat, Kabupaten Banjar, diulah tahun lapan puluhan. Wayah ini, jambatannya rusak. Lantainya paculan, japukan, marga kalawasan. Warga sudah lawas minta baikiakan, tagal balum ada hasilnya. Jambatan kada kawa dilalui kandaraan, tamasuk gasan bajalan batis.

Sudah bapuluh tahun jambatan gantung rusak, balum jua dibaiki Pamarintah Kabupaten Banjar. Ayungannya, warga ngalih manyubarang. Jambatan parlu banar gasan manyubarang ka Pasar Martapura.

Ujar urang Kampung Dalam Pagar, Haji Muhammad Rusli, jambatan nang rusak maulah warga ngalih ka mana-mana, maginnya mun ada nang garing, atawa bibinian handak baranak. Warga handak, Pamarintah Kabupaten Banjar lakas-lakas mambaiki. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 06/04/2014, Pukul Lima kamarian. Nurdin Yusuf, TVRI Kalimantan Selatan, mahabarakan.) 

Jambatan di Gunung Ulin Parak Runtuh

TVRI Kalsel, Kotabaru -- Matan baisukan, urang Kampung Gunung Ulin, Pulau Laut Utara, Kotabaru, sudah gawi sabumi. Sapalih bagawi di atas jambatan, sapalih tajun ka banyu, mangumpulakan batu, gasan manapali tihang jambatan nang japuk, baluang-luang.

                                                                                                                                          

Jambatan Kampung Gunung Ulin nang andaknya di RT 2 umurnya sudah lima walas tahunan. Salawas itu jua kada suah dibaiki. Mun pasang, banyu sungai bisa talu dapa tingginya. Marga kalawasan tarandam banyu landas, tihang jambatan japuk. Sudah mandua tahunan jambatannya parak runtuh.

Pambakal sudah jua minta baikiakan, tagal Pamarintah Bumi Sa-ijaan kada igul-igul. Ayungannya, paksa warga mambaiki saurang. Duitnya upuan. Mun jambatan runtuh, warga RT 1 wan RT 5 bisa takurung, kada hingkat ka mana-mana.

Hasil gawi sabumi warga saku kada tahan lawas jua, gasan samantara haja. Marga itu, warga tatap maharap Pamarintah Kotabaru mambaikinya, sakira hasilnya nahap.

Ada jua jambatan lain di Gunung Ulin nang parak runtuh. Andaknya di watas Kampung Gunung Sari. Jambatannya kawa gasan bakandaraan haja. Warga sudah talu kali gawi sabumi mambaiki. Nang paampihan, sudah satangah tahunan, imbah jambatannya pagat. Marga kadada duitnya, warga mambaiki satatayuhnya haja. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 06/04/2014, Pukul Lima kamarian. Matan Kotabaru, Fitri, TVRI Kalimantan Selatan, mahabarakan.)