Calun Wakil Rakyat Tahutang Spanduk

TVRI Kalsel, Banjarmasin -- Pamilu sudah tuntung, tagal banyak calun wakil rakyat nang maninggal hutang. Ujar Tajudin Noor, tukang spanduk di Pal Anam, Banjarmasin, calun wakil rakyat masih tahutang duit spanduk 2,5 %. Ujarnya, sabaluman Pamilu samalam banyak calun wakil rakyat nang batampah spanduk ka wadahnya, tamasuk batampah almanak, bandira partai wan lainnya.

Nang batampah kada calun wakil rakyat di banua haja, ada jua nang matan Kalteng. Nang batampah rata-rata maninggal hutang. Ujar Tajudin Noor, inya kurang labih haja. Mun inggan wayahnya kada ditahuri, hutangnya cagar dikurangi.

Wayah Pamilu samalam, tukang spanduk di Banjarmasin maulahakan spanduk gasan calun wakil rakyat nang di banua haja. Calun wakil rakyat di parupinsi, DPR RI wan DPD RI kabanyakan batampah ka Pulau Jawa. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 20/04/2014, Pukul Lima kamarian. Ten Umiayah, TVRI Kalimantan Selatan, mahabarakan.) 

Pamilu, Warga HSU Mancucuk Ba'asa

TVRI Kalsel, Amuntai -- Warga Hulu Sungai Utara (HSU) di talu buah kacamatan paksa mancucuk ba’asa di 10 wadah nang gasan mancucuk, atawa TPS. KPU HSU paksa maasai Pamilu, marga surat suara gasan dairah pamilihan (dapil)-nya tapahurup wayah Pamilu 9 April samalam.

TPS 02, Kalurahan Sungai Malang, Amuntai Tangah, tamasuk TPS nang lagi ba’asa mancucuk. Warga mancucuk matan Pukul Lapan baisukan. Nang ngaran kada hari parai, lain jua awan Pamilu hari Arba samalam. Tagal, warga sumangat haja mamilih. Di TPS ni ada 217 ngaran warga nang mamilih, tamasuk 2 ikung pamilih tambahan. Surat suaranya 221 lambar.

Di TPS 03, Tangga Ulin Hulu, lain pulang kisahnya. Ujar KPPS-nya, surat suara di TPS-nya kurang. Nang diminta 219 lambar, tagal nang diunjuk 205 haja. Artinya, kurang 14 lambar.

Kapala ahui KPU Kalimantan Selatan, Samahuddin Muharram, langsung basuara. Ujarnya, kakurangan tu rajin marga ada pamilih tambahan, nang kada masuk DPT. Sasuai aturan, pamilihnya musti ka TPS nang taparak, asal mambawa KTP.

Warga nang mancucuk ba’asa di 10 TPS samunyaan 2.353 ikung. Mayu gasan sabuah kursi di DPRD HSU. (*) [ysas]  

             

(“Habar Banua”, TVRI Kalimantan Selatan, Banjarmasin. Siaran Ahad, 20/04/2014, Pukul Lima kamarian. Mawan Himawan, TVRI Kalimantan Selatan, mahabarakan.) 

Paiwakan di Kotabaru Pusang

TVRI Kalsel, Kotabaru -- Bagang sambatan bubuhan paiwakan Bugis di Kotabaru gasan tihang kayu nang ditajak di laut, gasan mahampang iwak. Rapun kayu bakau di tabing pantai nang sunyi ditabang bubuhan paiwakan gasan diulah bagang. Bubuhannya kada salang ka darat lagi. Mun salang manabang ka gunung, asa kajauhan, ngalih pulang mahangkutnya.

                                                                                                                           

Paiwakan di Kampung Sarang Tiung, Pulau Laut Utara, rajin manabang kayu bakau di Kampung Bakambit, Pulau Laut Timur. Bahari, bubuhannya sakahandak manabangi kayu, tagal wayah ini kada kawa lagi. Sudah mandua tahunan bubuhannya takutan ditangkap pulisi. Kada saikung-dua nang ditangkapi. Hanyaram jua, talu ikung pulang nang ditangkap. 

                                                                                                

Pamarintah sapalihan bujur haja jua. Hutan bakau parlu banar gasan manguati tanah di tabing pantai, sakira jangan rumbih. Gasan manahani, mun ada tsunami. Sakira hawa sigar. Marga itu, pamarintah manangati warga manabang kayu bakau.

                                                                                                         

Sakira bubuhan paiwakan di Bumi Sa-ijaan kada pusang, Dinas Kalautan dan Parikanan Kotabaru mancariakan jalan. Bubuhan paiwakan disuruh maulah bagang drum plastik. Kada pakai kayu bakau lagi, tagal drum plastik. Bagang drum plastik nang cucubaan sudah dipasang di Pantai Sarang Tiung. Mun handak maulah, paiwakan musti mamudali saurang. Tagal, haraganya malaran larang. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 20/04/2014, Pukul Lima kamarian. Matan Kotabaru, Fitri, TVRI Kalimantan Selatan, mahabarakan.) 

Warga Bingung Mamilih

TVRI Kalsel, Banjarmasin -- Calun wakil rakyat nang minta pilih wayah Pamilu samalam sapalihan pina kada rakat awan warga. Nang handak mamilih bingung, kada patuh lalu awan calun wakil rakyatnya. Jaka di unjut banua, wajar haja. Mun di Banjarmasin, talalu jua.

                

Agus, warga Banjarmasin, bingung jua. Wayah handak mamilih calun wakil rakyat gasan DPRD, inya sawat kapulingaan. Inya kada patuh lalu awan calun wakil rakyat nang handak dipilihnya, apa nang cagar digawinya mun pariannya tapilih kaina.

Dinda kada parcaya jua. Inya urang Jakarta nang kaduluran ada di Banjarmasin. Nang ngaran warga Indunisia, inya ada hak mamilih jua. Tagal, ayungannya inya kada maambil hak-nya. Inya kada yakin, urang nang cagar dipilihnya amanah.

Mun Agus wan Dinda nang urang badahi haja kada yakin awan calun wakil rakyat nang handak dipilihnya, maginnya urang biasa, nang kada sakulah tinggi. Saku banyak ai warga ka TPS, tagal kada patuh wan kada tahu sahama-hama siapa, wan dimapa, parigal calun wakil rakyatnya. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 13/04/2014, Pukul Lima kamarian. Budi Alamsyah, Rahma Ainun, TVRI Kalimantan Selatan, mahabarakan.) 

Kada Kawa Mamilih Wayah Pamilu

TVRI Kalsel, Banjarmasin -- Pamilu tahun ini di rumah sakit kadada lagi wadah nang gasan mancucuk atawa TPS. Urang garing wan kulawarganya nang manunggui diminta mancucuk di TPS nang taparak.

Tagal, urusannya kada gagampangan. KPPS nang dituju kada hakun manarima mun kadada kartu A5. Ayungannya, nang handak mamilih pusing naning. Rahmadi wan bininya taamuh-amuh, marga kada kawa umpat mancucuk. Wayah Pamilu samalam, laki-bini asal Tanah Bumbu ni manjagai kulawarganya nang garing di Rumah Sakit Sari Mulia, Banjarmasin.

Kaduanya bingung, handak mancucuk di mana. TPS nang taparak kadada nang hakunnya manarima. Rahmadi wan bininya balapur ka KPU Kalimantan Selatan. KPU Kalimantan Selatan manyuruhnya minta kartu A5 di KPU Banjarmasin, tagal waktu gasan mamilih parak habis. Ayungannya, Rahmadi wan bininya kada mamilih. (*) [ysas]

             

(“Habar Banua”, TVRI Kalimantan Selatan, Banjarmasin. Siaran Ahad, 13/04/2014, Pukul Lima kamarian. Ratna Sari Dewi, Ibnu Fatih, TVRI Kalimantan Selatan, mahabarakan.)