Baayun Maulid di Masigit Banua Halat, Tapin

TVRI Kalsel, Rantau -- Baayun Maulid di Masigit Al-Mukarramah, Banua Halat, Tapin, tahun ini liwar raminya. Kada Bupati Tapin M. Ariffin Arpan, Wakil Bupati, tatuha agama, alim ulama wan habaib haja nang datangan, Wakil Hubnur Kalimantan Selatan Rudy Resnawan datang jua. Baribu-ribu umat Islam datangan matan mana-mana, tamasuk matan luar banua.

Nang umpat Baayun Maulid, Salasa (14 Januari 2014/12 Rabiul Awal 1435 Hijriyah) samalam 5.196 ikung. Ditambah kulawarga nang mandangani, atawa umpat maniring, saku samunyaan 15 ribuan.

Marga itu, Baayun Maulid tahun ini liwar raminya. Baribu-ribu ayunan tapih bahalai dihias janur, hibak sagan urang baayun. Wakil Hubnur, Bupati wan arjabat Tapin lainnya umpat baayun jua. Sagan urang Banjar, Baayun Maulid sudah jadi ciri adat wan budaya. Baayun sudah ada tumatan bahari kala, sabaluman agama Islam masuk ka banua.

Ujar Wakil Hubnur Rudy Resnawan, Baayun Mulid warisan budaya padatuan nang musti kita jaga. Sakira kita baiman lawan Allah Ta’alla wan manyayangi Rasul Junjungan, Muhammad SAW. Urang Banjar musti rakat mupakat, gawi sabumi, kayuh baimbai wan badingsanakan. Jangan bacakut papadaan. Jangan tamakan habar. Jangan hakun dihabui urang lawan pandiran nang kada-kada, sakira banua kita lapang haja.

Baayun Maulid di Banua Halat sudah jadi karasmin wisata banua. Tujuannya sagan manjaga ahlak umat Islam, sakira baparigal nang kaya Nabi Muhammad SAW. Lain pada baayun, ada jua syair-syair maulid wan rabana, tamasuk papadah Kiyai Abdussalam. Nang baayun didoaakan barajaki, dijauhakan bala, sakira hidup bauntung, batuah, baiman. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 19/01/2014, Pukul Lima kamarian. TVRI Kalimantan Selatan, mahabarakan.) 

Maulid Nabi wan Baayun Anak di Anjir Muara

TVRI Kalsel, Barito Kuala -- Maulid Nabi Muhammad SAW di banua Banjar, Kalimantan Selatan, kada sing rantian. Di rumah warga, masigit wan langgar di kampung-kampung, urang rami bamaulidan. Umat Islam basyairan, mangganang hari lahir Rasulullah SAW, Rasul junjungan nang pahabisan. Jikir, salawat wan salam dinyanyiakan, tanda sayang lawan Nabi ahir jaman.

Maulidan salajur baayun anak sudah jadi kabiasaan warga banua, tamasuk di Masigit Baiturrahim, Anjir Muara Lama, Barito Kuala. Habib Hassan bin Faruq Al-Kaff mamadahakan kabaikan Rasulullah. Ujarnya, umat Islam musti manyayangi Rasulullah. Mamuji Rasulullah musti jadi amalan, jangan sawat kalumpanan.

                                           

Hikmahnya, maulid wan baayun anak ni sagan bajarat tali sindat, silaturahmi warga nang badiam intangan Masigit Baiturrahim, Anjir Muara Lama, Anjir Serapat Baru wan Beringin Jaya. Kakanakan nang diayun 84 ikung. Ada jua nang datang matan Banjarmasin, Tanah Laut wan Hulu Sungai Selatan. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 19/01/2014, Pukul Lima kamarian. M. Rasyidi, Junaedi, TVRI Kalimantan Selatan, mahabarakan.) 

Kabun Satua di Jahri Saleh Pina Marista

TVRI Kalsel, Banjarmasin -- Bujur satuanya sadikitannya, tagal urang nang bakunjangan ka kabun satua di Jalan Jahri Saleh, Banjarmasin, malaran jua banyaknya. Hari-hari, nang kamari 30-40-an ikung. Mun rahat paraian, banyak lagi nang datangan. Karcis masuknya, murah haja. Sagan nang tuha, Rp 6 ribu. Kakanakan, Rp 4 ribu.

Jalan masuknya nang licak, kurungan satua nang rusak, maulah urang nang kamari gagarunum. Urang maras malihat satua nang pina marista, marga digaduh satatayuhnya haja.

Kabun satua ni sawat ditumpalak Centre for Orangutan, LSM nang manyayangi urang hutan. Alahan lagi, bubuhannya sawat minta kabun satua ditutup haja, satuanya dilapas, atawa dipindah ka lain. Tagal, Pamarintah Banjarmasin indah manutup. Tunggal dikitan, samunyaan dibaiki. Tamasuk kurungan satuanya, sakira mambadai jua.

Wadah sagan mainan kakanakan, sudah diulahakan jua, tamasuk air mancurnya. Tahun 2013 samalam, sapalihan sudah dibaiki. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 19/01/2014, Pukul Lima kamarian. Fitri, TVRI Kalimantan Selatan, mahabarakan.) 

Ba'ah, Jambatan Gantung di Loksado Pagat

TVRI Kalsel, Kandangan -- Banyu ba’ah di Kabupaten Hulu Sungai Selatan tahun ini bilang pambangatnya, tabangat pada tahun samalam. Matan 11 kampung di Kecamatan Loksado, ba’ah nang pambangatnya di Loksado wan Tumingki.

Batang kayu nang ganal-ganal, larut ditampuh banyu ba’ah. Lima jambatan gantung, rusak diranjahnya. Talu buah, pagat dapatnya. Nang musti lakas dibaiki jambatan gantung nang sagan titian Loksado-Lok Lahung-Tumingki-Kamawakan.

Jambatan gantung parlu banar dibaiki, sagan warga kaluar-masuk kampung. Lain pada jambatan gantung, jalan lain kadada lagi. Bujur jambatan gantungnya sudah cundai ka banyu wan rawan dititi, ada haja nang wani manyubarang. Kada sagan kaluar-masuk kampung haja, jambatan gantung tapakai banar jua sagan anak murid wan gurunya ka sakulahan.

Di Lok Lahung, Tumingki wan Kamawakan ada talu buah sakulahan nang bisa kada baurang mun jambatan gantungnya kada hancap dibaiki. Imbah banyu pandit, sakulahan kada paraian. Anak murid wan gurunya magun haja balajaran. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 19/01/2014, Pukul Lima kamarian. Ten Umaiyah, Fitri Hardudi, TVRI Kalimantan Selatan, mahabarakan.) 

Anak Iwak Dijual di Pasar

TVRI Kalsel, Kartak Hanyar -- Musim hujan, intalu iwak nang hidup di baruh atawa rawa-rawa mamacah jadi anak iwak. Tamasuk intalu iwak papuyu, sapat siam wan haruan.

Di barumahan, di baruh wan di sumur, urang rami manangguk wan mahancau anak iwak. Manangkap anak iwak, sutil haja. Mun dijual, haraganya malaran jua. Marga itu, banyak nang mahancau wan manangguki.

Di Pasar Kartak Hanyar, anak baranakan haruan, kalacingan, anak papuyu wan sapat siam, banyak dijual. Ada jua nang dijual kuliling kampung. Anak baranakan haruan sakilu Rp 50 ribu, anak iwak papuyu Rp 40 ribu.

Padahal, pamarintah sudah manangati warga manangkap anak iwak. Mun ditangkapi tarus, ayungannya iwak habis. Maginnya iwak nang di baruh. Tagal, warga magun haja kada maasi.

Ujar nang bajual, anak iwak payunya kada nang kaya iwak ganal jua. Sahari, paling payu 2 kilu. Mun kada habis, disamu, sagan dijual pulang isuknya. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 19/01/2014, Pukul lima kamarian. Ten Umaiyah, Rahma Ainun, TVRI Kalimantan Selatan, mahabarakan.)