Warga Pasar Batuah Batajak Rumah

TVRI Kalsel, Banjarmasin -- Warga Pasar Batuah, di Jalan Manggis, Banjarmasin, nang kamandahan Arba samalam, bagamatan manajak wan mambaiki rumahnya, sakira lakas didiami. Rumah wan warung warga nang kamandahan samalam samunyaan 21 buah.

Warga sapalihan bapintaan duit awan urang nang lalu lalang di kartak. Ada jua pawadahan warga nang mandangani bapintaan di Jalan S. Parman. Ujar puhun gawi Pawadahan Emergency Triple Ampat Banjarmasin, Muhammad Yamin, imbah barapa hari bapintaan, kulihi duit lima jutaan. Duitnya sagan warga nang kamandahan.

Warga nang kana musibah, Manhuri, batarima kasih banar awan Pawadahan Emergency Triple Ampat Banjarmasin nang mambantu bapintaan. Inya batarima kasih jua awan warga lainnya. Ujarnya, jaka kawa Pamarintah Banjarmasin maulahakan rumah susun. Rumah warga di Pasar Batuah sudah tagalumuk, sasain sasak wan marigat. 

Rahatan mandah, Pamadam Kabakaran Banjarmasin ngalih masuk sagan mamajahi api. Jalan di Pasar Batuah kipit banar. Warung wan rumah warga kada bahalat, liwar jajalnya. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 23/03/2014, Pukul Lima kamarian. Budi, TVRI Kalimantan Selatan, mahabarakan.) 

Jambatan Malutu Baungkapan

TVRI Kalsel, Kandangan -- Jambatan Malutu di Padang Batung, Hulu Sungai Selatan (HSS), panjangnya kurang labih 50 dapa. Jambatan di batang banyu Amandit ni tapakai banar sagan manyubarang, antara Sungai Raya-Padang Batung. Papan ulinnya banyak nang patahan, baluang, baungkapan. Sudah banyak warga nang tabarusuk. Mun malam, luangnya kada kalihatan. Jambatannya kada balampu.

Kada salang mahadang pamarintah, warga RT 4, nang diam parak jambatan, bahandip. Gawi sabumi, mambaiki. Tagal, warga tatap maharap Pamarintah HSS mahatiakan.

Gawi sabumi warga RT 4 di Malutu patut dituruti. Sakira adat budaya urang bahari, nang rakat mupakat, katuju bahandip atawa gawi sabumi, tatap ada, sagan kamaslahatan sabarataan. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 16/03/2014, Pukul Lima kamarian. Matan Kandangan, Jamaludin, TVRI Kalimantan Selatan, mahabarakan.) 

Mantuala, Buah Asli Bumi Murakata

TVRI Kalsel, Barabai -- Ibarat manusia, buah mantuala di banua Banjar, Kalimantan Selatan, basapupu sakali awan durian, buah lahung, marawin wan pampakin. Sakilaran, buah mantuala parcis pampakin. Mun isi buah lahung pina mahabang, mantuala kuning anum. Isi buah mantuala kandal, rasanya tanyaman pada pampakin. 

Ujar Pakacil Untung nang bajualan, mantuala tamasuk buah asli banua. Tumbuhnya di Batu Benawa, Bumi Murakata, Hulu Sungai Tengah (HST) haja. Puhunnya tinggal tujuh rapun.

Sama kaya asam tandui nang sarapunannya haja lagi di Tanah Bangkang, Hulu Sungai Selatan (HSS), puhun mantuala sadikitannya haja lagi. Bujur rahat musim buah, mantuala kada banyak dijual urang di pasar atawa pinggir kartak.

Buah mantuala tamasuk larang. Nang tahalus, salawi ribu sabigi. Nang taganal, haraganya matan salawi ribu inggan tujuh puluh lima ribu sabigi. Talarang pada durian, nang haraganya matan sapuluh ribu inggan lima puluh ribu sabigi, dilihat ganal-halusnya. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 16/03/2014, Pukul Lima kamarian. Ten Umiayah, TVRI Kalimantan Selatan, mahabarakan.) 

Sagan Pamilu Damai di Banua

TVRI Kalsel, Banjarmasin -- Pamilu tinggal hitungan hari. Partai pulitik wan calun wakil rakyat rahat badapat wan barakat-rakat awan warga, malikapi gambar wan bandira partai di pinggir kartak, di tangah kartak, di batang banyu, di rapun kayu, surat kabar, radiu, tipi wan di mana-mana. Sagala macam cara digawi, sakira urang mamilih inya, sakira partainya manang Pamilu.

Sakira Pamilu kaina damai haja, Kapala Pulisi Banua Kalimantan Selatan Machfud Ariffin mangumpulakan bubuhan alim ulama, tatuha adat, sagala macam suku wan agama nang ada di banua. Ujar Machfud Ariffin, pulisi indah bakajadian. Pulisi indah ada nang bahual atawa batumburan wayah Pamilu. Marga itu, alim ulama, tatuha adat, sagala macam suku wan agama dibawai gawi sabumi, sagan mamadahi warga asing-asingnya, sakira Pamilu kaina damai haja.

Tatuha masyarakat nang umpat bakumpulan, Bambang, akur banar awan niat Kapala Pulisi Banua nang mambawai warga sama-sama manjaga Pamilu. Sakira Pamilu aman wan damai.

Alim ulama, tatuha adat, sagala macam suku wan agama nang ada di banua, damintu jua, akur banar awan Kapala Pulisi Banua Machfud Ariffin. Samunyaan akur, Pamilu 9 April 2014 di Bumi Antasari musti lancar, aman wan damai. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 16/03/2014, Pukul Lima kamarian. Dina Qomariah, Fauzi Oku, TVRI Kalimantan Selatan, mahabarakan.) 

Sapu Haduk wan Kuda Kayu Barikin

TVRI Kalsel, Barabai -- Barikin tangah dua ratus pal jauhnya pada Banjarmasin. Andakannya di Haruyan, Hulu Sungai Tengah (HST). Andakannya pas banar di pinggir kartak, jalan nang ampah Paringin (Balangan) wan Tanjung (Tabalong).

Sapanjangan pinggir kartak, warga manyadai sapu haduk wan kuda-kudaan kayu di muka rumah, sagan dijual. Barikin wadah kalaluan urang nang bulang-bulik jalan darat Kalimantan Selatan-Kalimantan Timur.

Sapu haduk wan kuda-kudaan kayu sagan mainan kakanakan ulahan warga Bumi Murakata, langkar jua. Lain pada ukuran biasa, ada jua sapu haduk raksasa. Nang halui, ada jua, sagan hiasan. Kuda-kudaan kayunya dicat habang, tabaik pada kuda-kudaan plastik ulahan pabrik.

Ujar Safrudin, bujur kuda-kudaan kayu ulahannya kalah mudil awan kuda-kudaan plastik ulahan pabrik, inya tatap bahimat bausaha, sakira hasilnya baik. Mun hasilnya baik, urang katuju haja manukari.

                                                                                                 

Urang Barikin sabujurnya kada maulah sapu haduk wan kuda-kudaan kayu haja. Matan bahari kala, Barikin jadi kampung budaya. Urang Barikin bisa jua maulah wayang kulit Banjar wan alat musik panting. Barikin padangnya wayang gung, kuda gipang wan musik panting. Dalang wayang kulit Banjar ada jua diam di Barikin. Dadalang Tulur asalnya matan Barikin. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 16/03/2014, Pukul Lima kamarian. Matan Barabai, Jamaludin, TVRI Kalimantan Selatan, mahabarakan.)