Hubnur, Bupati wan Walikota Dipilih DPRD

TVRI Kalsel, Banjarmasin -- Banyak nang katuju, tagal banyak jua nang kada katuju. Katuju-kada-katuju, mun taparukui, tanggal salawi (25/09/2014) kaina DPR RI di Jakarta pacangan mancatuk Undang-Undang, nang maatur supaya hubnur, walikota wan bupati dipilih DPRD. Alasannya, sakira kada haran banar di duit. Ujar nang katuju, mun hubnur, walikota wan bupati langsung dipilih rakyat, haran banar duitnya.

Damintu ujar nang umpat jadi puhun gawi Koalisi Merah Putih (KMP) matan Partai Golkar, Aburizal Bakeri, rahat halal bihalal lawan bubuhan Partai Golkar Kalimantan, di Banjarmasin.

Lain Aburizal Bakeri, lain pulang Walikota Banjarmasin, Muhidin. Muhidin indah mun hubnur, walikota wan bupati dipilih DPRD. Alasannya, tabulik pulang nang kaya bahari.  

Syahrani Ambo Oga, puhun gawi Uniska Banjarmasin nang suwah jadi kapala ahui KPU Kalimantan Selatan, baucap damintu jua. Ujarnya, mun hubnur, walikota wan bupati dipilih DPRD pulang, sama ai mawaluhi warga.

Sudah sapuluh tahun hubnur, walikota wan bupati langsung dipilih rakyat. Mun ada kakurangannya, mustinya aturan wan tata caranya dibaiki bagimitan. Tumatan bahari kala, pariannya, Pambakal di banua Banjar langsung dipilih warga, kada diwakilakan. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 14.09.2014, Pukul Lima kamarian. Syahril Malik, TVRI Kalimantan Selatan, mahabarakan.)