Hawa di Banua Banjar Sudah Rigat Banar

TVRI Kalsel, Banjarmasin -- Imbah diukur Badan Lingkungan Hidup Dairah (BLHD) Kalimantan Selatan, gawi sabumi lawan Hiperkes, Labkes, BBTKL wan Baristand Industri Banjarbaru, hawa di Bumi Lambung Mangkurat sudah kada barasih lagi. Rigat banar. Sapalihan bahabu wan bakalalatu. Kukus api liwar palaknya.

Wayah diukur BLHD (16-17/9/2014), hawa nang rigat sudah hitungan 189,7 -- tabanyak pada nang samustinya, nang tangah dua ratus haja. Ujar puhun gawi BLHD Kalimantan Selatan, Said Ali, hawa nang rigat kada baik dihiut. Marga itu, mun di luar rumah, warga musti manukupi muha lawan sapu tangan, atawa masker. Mun kada parlu banar, paraya bakunjangan atawa kaluar pada rumah.

Ada 12 wadah nang hawanya diukur BLHD Kalimantan Selatan. Nang parigatnya intangan Lapangan Ulin Syamsudin Noor, Banjarbaru, Gambut, wan di Simpang Ampat Belitung, Banjarmasin. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 28.09.2014, Pukul Lima kamarian. TVRI Kalimantan Selatan, mahabarakan.) 

                                                                                                            

                                                                                                                                  

                                                               

300 Burungan Hutan di Banua Kamandahan

TVRI Kalsel, Banjarmasin -- Kukus palak di banua Banjar, Kalimantan Selatan, nang bilang parak saban baisukan, maulah warga sasak hinak. Nang manggah, magin marista. Untung jua, bahanu turun hujan. Marga itu, kukusnya balum bangat banar.

Inggan bulan ini haja, ada 313 titik api di banua, tabanyak pada bulan samalam, nang 119 haja. Hutan banua luasnya parak dua juta burungan, nang mandah kurang labih 300 burungan.

Ujar kapala ahui Dinas Kahutanan Kalimantan Selatan, Rahmadi Kurdi, hutan nang mandah bulan ini kada tamasuk Taman Hutan Rakyat (Tahura) Mandiangin, nang sawat mandah marga puting ruku nang dibuang mambarang. Ayungannya, 10 burungan labih Tahura Mandiangin kamandahan.

Ujar Rahmadi Kurdi, sakira jangan mandah lagi, samunyaan musti umpat mahawasi, supaya kada babangat. Rahmadi Kurdi balum tahu, adakah nang bakurinah manyalukut hutan? Mun kadapatan, urangnya musti ditangkap. Sakira jara. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 28.09.2014, Pukul Lima kamarian. TVRI Kalimantan Selatan, mahabarakan.) 

            

Hukum Nang Manyalukut Hutan!

TVRI Kalsel, Banjarmasin -- Sasain lawas, kukus palak sasain bangat di banua. Magin wayah baisukan, kukus liwar palaknya. Murid sakulah di Martapura wan Banjarbaru ada nang rabah, manggah, siup tahiut kukus. Mun kada hawas panjanak, nang bakandaraan gin bisa baranjahan.

Wakil rakyat di DPRD Kalimantan Selatan, Soraya, asa hara jua hati. Soraya nang barumah di Martapura, katimpaannya jua, mun wayah baisukan bamutur ka DPRD Kalimantan Selatan di Banjarmasin. Marga itu, inya akur haja mandangar niat Pamarintah Kalimantan Selatan maulah hujan. Tagal, ujarnya, nang manyalukut hutan musti dihukum, sasuai aturan. 

 

Tumatan Tahun 2008, Pamarintah Kalimantan Selatan sudah baisi Perda, nang manangati siapa haja manyalukut hutan wan pahumaan. Nang katangkapan, pacang didanda -- paling banyak Rp 50 juta. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 28.09.2014, Pukul Lima kamarian. Ratna Sari Dewi, Fauzi Ipau, TVRI Kalimantan Selatan, mahabarakan.) 

Hubnur, Bupati wan Walikota Dipilih DPRD

TVRI Kalsel, Banjarmasin -- Banyak nang katuju, tagal banyak jua nang kada katuju. Katuju-kada-katuju, mun taparukui, tanggal salawi (25/09/2014) kaina DPR RI di Jakarta pacangan mancatuk Undang-Undang, nang maatur supaya hubnur, walikota wan bupati dipilih DPRD. Alasannya, sakira kada haran banar di duit. Ujar nang katuju, mun hubnur, walikota wan bupati langsung dipilih rakyat, haran banar duitnya.

Damintu ujar nang umpat jadi puhun gawi Koalisi Merah Putih (KMP) matan Partai Golkar, Aburizal Bakeri, rahat halal bihalal lawan bubuhan Partai Golkar Kalimantan, di Banjarmasin.

Lain Aburizal Bakeri, lain pulang Walikota Banjarmasin, Muhidin. Muhidin indah mun hubnur, walikota wan bupati dipilih DPRD. Alasannya, tabulik pulang nang kaya bahari.  

Syahrani Ambo Oga, puhun gawi Uniska Banjarmasin nang suwah jadi kapala ahui KPU Kalimantan Selatan, baucap damintu jua. Ujarnya, mun hubnur, walikota wan bupati dipilih DPRD pulang, sama ai mawaluhi warga.

Sudah sapuluh tahun hubnur, walikota wan bupati langsung dipilih rakyat. Mun ada kakurangannya, mustinya aturan wan tata caranya dibaiki bagimitan. Tumatan bahari kala, pariannya, Pambakal di banua Banjar langsung dipilih warga, kada diwakilakan. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 14.09.2014, Pukul Lima kamarian. Syahril Malik, TVRI Kalimantan Selatan, mahabarakan.) 

Haraga LPG Naik, Urang Warung Jingkar

TVRI Kalsel, Banjarmasin -- Nang bawarung nasi asa marista banar imbah haraga LPG nang ukuran 12 kilu naik. Ujar nang bawarung nasi, Asril, sudah barapa hari haraga LPG nang ukuran 12 kilu naik. Rajin haraganya Rp 110 ribu haja satabung, wayah ini Rp 132 ribu. Hari-hari, inya mamakai 2 tabung LPG nang ukuran 12 kilu gasan bamasak.

Ujar Asril, imbah haraga LPG naik, haraga makanan nang dijualnya kada kawa sakahandaknya dinaikakan. Urang bisa bukahan -- kada jadi makan. Marga itu, hujungannya takurang pada biasanya.

Asril handak, lamunnya kawa, haraga LPG dibulikakan ka asal. Mun haraganya naik tarus, urang warung kada kawa manyandang. Bisa jingkar. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 14.09.2014, Pukul Lima kamarian. Ibnu Fatih, Mawan Himawan, TVRI Kalimantan Selatan, mahabarakan.) 

                                                                                                                                  

Tukang Buang Ratik

TVRI Kalsel, Banjarmasin -- Tuyukan ratik nang saduyau nyata kada nyaman dilihat. Untungnya, Pamarintah Banjarmasin baisi trak nang gasan mahangkut wan mambuangi ratik. Satrak, tukang ratiknya balima-baanam, gasan mahangkut wan mambuang ratik ka tuyukan nang pahabisan.

Tukang ratik bagawi tumatan pukul lima subuh, rahat urang sapalihan guringan, atawa basubuh, di masigit wan langgar. Kada gagampangan mambuang ratik nang babau haruk. Awak musti gancang, gasan manyakrup wan manimbai ratik ka atas trak. Ratik nang dibuang kada satuyukan haja. Imbah talah satuyukan, baalih pulang ka tuyukan lain.

Tukang ratik bagawi hari-hari, tumatan Sanayan inggan Ahad. Nang ngaran sudah gawian, bilang kadada parainya. Bubuhannya handak, sakira gawian talapang, traknya diganti lawan nang hanyar.

Tukang buang ratik nang bangaran Nasrullah handak, warga Banjarmasin jangan mambarang babuang ratik. Buang ratik ka wadahnya, di wadah nang ada, wayah jam-nya.

Gasan Nasrullah wan kakawalannya, upahnya mayu haja gasan mambari makani kulawarga. Tagal, bubuhannya handak, Pamarintah Banjarmasin mambantu bubuhannya umpat BPJS. Gasan bubuhannya saurang wan kulawarganya. Sakira lapang jua hinak. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 14.09.2014, Pukul Lima kamarian. Rachma Ainun, TVRI Kalimantan Selatan, mahabarakan.) 

Tukang Buang Ratik

TVRI Kalsel, Banjarmasin -- Tuyukan ratik nang saduyau nyata kada nyaman dilihat. Untungnya, Pamarintah Banjarmasin baisi trak nang gasan mahangkut wan mambuangi ratik. Satrak, tukang ratiknya balima-baanam, gasan mahangkut wan mambuang ratik ka tuyukan nang pahabisan.

Tukang ratik bagawi tumatan pukul lima subuh, rahat urang sapalihan guringan, atawa basubuh, di masigit wan langgar. Kada gagampangan mambuang ratik nang babau haruk. Awak musti gancang, gasan manyakrup wan manimbai ratik ka atas trak. Ratik nang dibuang kada satuyukan haja. Imbah talah satuyukan, baalih pulang ka tuyukan lain.

Tukang ratik bagawi hari-hari, tumatan Sanayan inggan Ahad. Nang ngaran sudah gawian, bilang kadada parainya. Bubuhannya handak, sakira gawian talapang, traknya diganti lawan nang hanyar.

Tukang buang ratik nang bangaran Nasrullah handak, warga Banjarmasin jangan mambarang babuang ratik. Buang ratik ka wadahnya, di wadah nang ada, wayah jam-nya.

Gasan Nasrullah wan kakawalannya, upahnya mayu haja gasan mambari makani kulawarga. Tagal, bubuhannya handak, Pamarintah Banjarmasin mambantu bubuhannya umpat BPJS. Gasan bubuhannya saurang wan kulawarganya. Sakira lapang jua hinak. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 14.09.2014, Pukul Lima kamarian. Rachma Ainun, TVRI Kalimantan Selatan, mahabarakan.)