Pasar Antasari Hibak wan Jajal

TVRI Kalsel, Banjarmasin -- Parak hari raya Idul Fitri, 1 Syawal 1435 Hijriyah, warga Banjarmasin rami baulanja di pasar. Pasar Antasari hibak wan jajal. Warga baulanja sarabanya, gasan hari raya. Kada wadah bajual baju, tapih wan salawar haja nang hibak wan jajal. Wadah bajual amas, rami jua.

Ujar nang bajualan, talu hari sabaluman hari raya, warga nang baulanja liwar banyaknya. Sudah kabiasaan, imbah puasa sabulanan, warga musti batukar baju, tapih wan salawar gasan hari raya. Kada baju, tapih wan salawar haja nang hanyar -- bibinian sapalihan handak jua bakangkalung wan bagalang amas hanyar.

Wadah bajual hurdin, rami jua. Ujar nang bajualan, Abdul Rahman, nang manukar hurdin batambah talu kali lipat. Nang tabanyak dicari, hurdin nang barinda-rinda. Ujarnya, inya kulihi haja lima walas juta sahari. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 27.07.2014, Pukul Satangah Lima kamarian. Ten Umayah, Rachma Ainun, TVRI Kalimantan Selatan, mahabarakan.) 

Habar Pamilihan Prasidin

TVRI Kalsel, Banjarmasin -- Gasan kamaslahatan sabarataan, surat kabar, radiu wan tipi musti mambantu warga sakira jangan manganganak wan manarima hasil pamilihan prasidin tanggal 22 Juli samalam. Ujar kapala ahui pawadahan wartawan Indunisia (PWI) Kalimantan Selatan, Faturahman, surat kabar, radiu wan tipi musti bujur-harus bahabar. Jangan mahabui. Maginnya mahabarakan nang kada-kada.

Faturahman baucap damintu rahat buka puasa baimbai papadaan wartawan di Banjarmasin. Ujarnya, pamilihan prasidin tahun ini jadi ujian, sakira wartawan surat kabar, radiu wan tipi kada bapihak.   

Tatuha wartawan banua, Gusti Rusdi Effendi, bapadah damintu jua. Ujarnya, warga musti akur wan rakat mupakat. Jangan baidabul nang kada-kada. Wartawan surat kabar, radiu wan tipi musti maambil hikmah pamilihan prasidin tahun ini. Samunyaan cagar dipandirakan wayah bubuhan wartawan Indunisia bamujakarah, bulan dua, tahun dihadap. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 27.07.2014, Pukul Satangah Lima kamarian. Ratna Sari Dewi, Yusar Wardana, TVRI Kalimantan Selatan, mahabarakan.) 

            

Jambatan Ulin di Banjarmasin

TVRI Kalsel, Banjarmasin -- Bujur kayu ulin sasain ngalih dicari, Pamarintah Banjarmasin tatap mamakai wan maharagu jambatan ulin nang ada. Ujar kapala ahui Dinas Bina Marga Banjarmasin, Gusti Ridwan, sasain lawas, sasain ngalih maharagu jambatan ulin. Haraga ulin larang banar, ulinnya liwar dicari.

Duit lima miliar gasan mambaiki wan maharagu jambatan ulin di Banjarmasin, inggan ini balum tauna, marga pamburung kada taulih kayunya. Bujur damintu, Gusti Ridwan tatap maharagu jambatan ulin nang ada, gasan ciri adat budaya banua.

         

Ujar Gusti Ridwan, di Banjarmasin ada tiga ratusan labih jambatan ulin. Jambatan nang hanyar sudah kada pakai kayu ulin lagi. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 27.07.2014, Pukul Satangah Lima kamarian. Ratna Sari Dewi, Sineda, TVRI Kalimantan Selatan, mahabarakan.) 

Bahurup Duit Pacah Gasan Hari Raya

TVRI Kalsel, Banjarmasin -- Sakira warga banua Banjar kada ngalih bacari duit pacah salawas bulan puasa wan babagi jakat pitrah malam Hari Raya Idul Fitri 1435 Hijriyah, Bank Indunisia Wilayah Dua Kalimantan di Banjarmasin manyiapakan duit pacah talu miliar tujuh ratus juta, gasan bahurupan. Bank Indunisia manangguh, duit tabungan nang diambil warga satumbangan bulan puasa wan gasan babagi jakat pitrah satriliun lapan miliar.

Ujar kapala ahui Bank Indunisia Wilayah Dua Kalimantan, Mohammad Dadi Aryadi, bahurup duit pacah di Bank Indunisia sabujurnya kada wayah puasa wan hadap Hari Raya haja. Bulan lain, kawa jua. Sakira jangan talalu jajal, saikung paling banyak kawa bahurup duit pacah lima juta haja. Lain pada di Bank Indunisia, bahurup duit pacah nang hanyar kawa jua di bank lainnya.

Mohammad Dadi Aryadi handak, warga bahurup duit pacah di bank banua haja. Nyata aman. Duitnya dijamin asli. Jumlahnya pas. Kada babayaran. Gasan kamaslahatan sabarataan. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 20.07.2014, Pukul Satangah Lima kamarian. Ten Umayah, Rachma Ainun, TVRI Kalimantan Selatan, mahabarakan.) 

Taksian Pal Anam Dibariakan

TVRI Kalsel, Banjarmasin -- Imbah sawat tapahual, tapulilit wan tapuntal-puntal, ayungannya Pamarintah Kalimantan Selatan mambariakan tanah Taksian Pal Anam gasan Pamarintah Banjarmasin.

Ujar Walikota Banjarmasin, Muhidin, imbah dibariakan, Pamarintah Banjarmasin cagar bakurinah mambaiki Taksian Pal Anam. Pamarintah cagar maniring baasa, dimapa akad Walikota Banjarmasin nang tadahulu awan ampun Banjarmasin Trade Centre (BTC). Sakira dudi-dudi kada tapahual lagi.

     

Ujar Muhidin, kartak di muka Taksian Pal Anam nang gasan kalaluan urang banyak, cagar dihatiakan jua. Dimapa caranya, sakira Taksian Pal Anam sasain baik. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 20.07.2014, Pukul Satangah Lima kamarian. Ratna Sari Dewi, Ten Umayah, TVRI Kalimantan Selatan, mahabarakan.) 

Urang Susah Dibari Rumah

TVRI Kalsel, Banjarmasin -- Laila, nang hari-hari bajualan sayur, langsung sujud syukur, himung kada sakira, asa kaguguran indaru, wayah lakinya dapat hadiah rumah matan pamburung P.T. Lambung Mangkurat Cipta Persada wan DPD REI Kalimantan Selatan, gasan warga banua nang susah. Inya kada manyangka kulawarganya dibari rumah. Bahari, inya suah tamimpi dibari urang rumah.

Kada Laila haja nang himung. Kulawarga Haikal wan Rubaidi, buruh wan tukang bica, himung jua. Nang mambarinya rumah kapala ahui BPD Kalimantan Selatan, Juni Rif’at, wan Wakil Pawadahan DPD REI Kalimantan Selatan, Anwar Hadimi.

Ujar Anwar Hadimi, DPD REI Kalimantan Selatan sudah manyuruhakan pamburung rumah di banua supaya mahatiakan warga nang susah. Marga itu, rumah nang dibari kada sabuah haja, tagal talu buah.

Mantri Parumahan Rakyat RI, Jan Faridz, manjulung kunci rumah gasan warga nang manarima, di hadapan Hubnur Kalimantan Selatan Rudy Ariffin wan puhun gawi BAZ Kalimantan Selatan, Pangeran Rusdi Effendi, di Kampung Tungkaran, Parumahan Bukit Lambung Mangkurat, Martapura. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 20.07.2014, Pukul Satangah Lima kamarian. Dina Qomariah, Syahril Malik, TVRI Kalimantan Selatan, mahabarakan.) 

Nasip Rumah Adat Banjar di Balangan

TVRI Kalsel, Paringin -- Kadada nang tahunya, pabila rumah adat Banjar Bubungan Tinggi di Kampung Tarangan, Paringin Selatan, Balangan, Kalimantan Selatan, bamula ditajak. Umurnya saku sudah labih 70 tahun.

Nang ampun rumah, Muhammad As’ari wan Siti Rufi’ah, nang mawaris rumah kawitannya, sawat himung kada sakira wayah Pamarintah Balangan bajanji mambaiki. Paling kada, maulahakan pagar wan mangganti hatap rumah nang japukan, kamirisan wayah hujan.

Sudah barapa kali bubuhan Dinas Pamuda Olah Raga Kabudayaan dan Pariwisata (Disbudparpora) Balangan maningau. Bajanji mambaiki. Tagal, inggan ini kadada habarnya. Marga kada hingkat manukar sirap, Muhammad As’ari wan Siti Rufi’ah sawat handak mangganti hatapnya awan seng, tagal ditangati. Ujar bubuhan Disbudparpora, kaina rumahnya kada asli lagi.

Wayah ditakuni, Sakutaris Disbudparpora Balangan, Herliani, bapadah: duit gasan mambaiki sudah dipintaakan, tagal balum diakuri. Lain pada itu, wayah ini hatap sirap tangalih dicari.

Tahun 2011, rumah adat Banjar Bubungan Tinggi ni diulah pamarintah jadi Cagar Budaya. Rumah nang panjang 17 dapa wan tinggi 2 dapa pada tanah ni sabuahannya haja lagi di Bumi Sanggam, Balangan. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 13.07.2014, Pukul Satangah Lima kamarian. Matan Balangan, Fitri, TVRI Kalimantan Selatan, mahabarakan.) 

Karcis Kapal Tarbang Gasan Mudik Hari Raya

TVRI Kalsel, Banjarmasin -- Wadah bajual karcis kapal tarbang di Banjarmasin rami ditukui urang nang pacangan mudik hari raya. Banyak nang batampah karcis gasan bulang-bulik Banjarmasin-Solo-Yogyakarta-Semarang. Alahan lagi, karcis nang ka Yogyakarta sudah habis, lingis -- padahal haraganya matan lapan ratus ribu inggan sajuta dua ratus ribu salambar.

Ujar nang bajual karcis, Imah, tumatan bulan lima inggan sabaluman puasa samalam sudah banyak nang batampah karcis kapal tarbang di wadahnya. Banyak nang batampah gasan mudik ampat hari sabaluman hari raya, wan ampat hari imbahnya. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 13.07.2014, Pukul Satangah Lima kamarian. Rachma Ainun, Mawan Himawan, TVRI Kalimantan Selatan, mahabarakan.) 

                                                                                                                  

Kapal Laut Gasan Mudik Hari Raya

TVRI Kalsel, Banjarmasin -- Wayah buka puasa baimbai kakawanan sagawian, kapala ahui P.T. Dharma Lautan Utama Banjarmasin, Budiono, bapadah, bubuhannya sudah manyiapakan dua buah kapal laut gasan warga nang handak mudik bahari raya.

Saban hari, kapal Dharma Kencana wan Kumala hingkat mahangkut 1.000 panumpang, nang bulang-bulik Banjarmasin-Surabaya-Semarang. Parak hari raya, karcisnya naik 20 % inggan 30 % salambar.

Saminggu sabaluman hari raya, rajin banyak nang handak manukar karcis. Sakira panumpang kada tatuyuk, Budiono handak, pamarintah wan parusahaan jangan malayur maunjuk Tunjangan Hari Raya (THR) gasan karyawan. Jangan parak harinya, hanyar diunjuk. Sakira panumpang kada tapakalang, kada tagalumuk di Palabuhan Tri Sakti, Banjarmasin. (*) [ysas]

 

(“Habar Banua”, TVRI Kalimantan Selatan, Banjarmasin. Siaran Ahad, 13.07.2014, Pukul Satangah Lima kamarian. Budi Alamsyah, Ibnu Fatih, TVRI Kalimantan Selatan, mahabarakan.) 

Pasar Wadai Ramadan di Banjarmasin

TVRI Kalsel, Banjarmasin -- Panambaian puasa, Ahad (29/6) samalam, Hubnur Kalimantan Selatan Rudy Ariffin wan Wakil Walikota Banjarmasin Irwan Ansyari baimbai mancatuk dauh, tanda bamula Pasar Wadai Ramadan Tahun 1435 Hijriyah di Banjarmasin.

Ujar Hubnur, sasain lawas pasar wadai nang diulah Pamarintah Banjarmasin sasain baik, tamasuk wadahnya wan makanan-nginuman nang dijual. Warga kawa bausaha, bacari rajaki. Sakali samustawa, warga kawa baulanja makanan-nginuman asli banua Banjar, nang bahanu satahun sakali haja ada.

Ujar Wakil Walikota Banjarmasin Irwan Ansyari, saban tahun Pamarintah Banjarmasin baulah Pasar Wadai Ramadan. Kada di tabing siring Sungai Martapura haja. Di lain, damintu jua, nang di buncu-buncu kampung. Ujarnya, malaran gasan warga bahari raya.  

Tahun ini ada 145 wadah gasan bajualan nang diulah Pamarintah Banjarmasin. Nang bajualan kada urang dagang haja, ada jua urang pamarintah wan swasta. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 06.07.2014, Pukul Satangah Lima kamarian. Rini Muliana, Fauzi Oku, TVRI Kalimantan Selatan, mahabarakan.) 

Warung Sakadup di Pasar Lima, Banjarmasin

TVRI Kalsel, Banjarmasin -- Perda Ramadan anggit Pamarintah Banjarmasin manangati warga bajualan makanan wan makan-nginum di warung siang-siang, sabulanan, salawas bulan puasa. Warung makan hanyar dibariakan buka matan pukul talu kamarian. Sakira aturan diasi, Satpol PP maniring wan bakuliling ka warung-warung wan pasar-pasar nang ada di Banjarmasin. Sanayan samalam, damintu jua. Tagal, balum ada hasilnya.

Lain Satpol PP Banjarmasin, lain pulang TVRI Kalimantan Selatan. Sanayan samalam, “Tipinya Urang Banua” mandapati warung sakadup nang buka siang-siang di Pasar Lima. Tasilip di buncu, batukup kain, sakilaran warungnya kada kalihatan. Tagal, urang higa-mahiga tahu ai ada warung sakadup, gasan bubuhan nang bagawi maambil upah mahangkut barang.

       

Puasa kada puasa, tukang hangkut barang musti bagawi hari-hari. Mun kada bagawi, kada kulihan duit. Bacari rajaki, gasan mambari makani anak-bini. Maambil upah, mahangkutakan barang urang. Nang ngaran lapah mahangkut barang bapikul-pikul, sapalihan ada nang kada puasa. Marga itu jua, warung sakadup ada.

Urusan ibadah, saku tabulik ka diri asing-asingnya haja. Ampun diri jua nang manyudahinya. (*) [ysas]

   

(“Habar Banua”, TVRI Kalimantan Selatan, Banjarmasin. Siaran Ahad, 06.07.2014, Pukul Satangah Lima kamarian. Ratna Sari Dewi, Fauzi Ipau, TVRI Kalimantan Selatan, mahabarakan.) 

                                                                                                                  

Listrik di Balangan Hanyar 80 %

TVRI Kalsel, Paringin -- Lain pada matan P.T. PLN Paringin saurang, listrik gasan Balangan sapalihan matan Tanjung wan Barabai. Di Balangan, listrik nang ada hanyar 80 % -- 20 % lagi nang balum balistrik. Kampung nang balum balistrik andaknya di unjut Bumi Sanggam, wadahnya tajauh, tangalih didatangi, nang kaya Halong wan Tabing Tinggi.

Ujar kapala ahui P.T. PLN Paringin, Teguh A’ang, tahun ini P.T. PLN Paringin manyurung ka P.T. PLN Kalimantan Selatan/Kalimantan Tengah di Banjarmasin, supaya Kampung Aju wan Kampung Dayak Pitap dipasangi listrik. P.T. PLN Paringin rahat maniring, kampung mana haja di Balangan nang hingkat dipasangi listrik.

Ujar Teguh A’ang, sabaluman manajak tihang listrik, P.T. PLN marikin duitnya jua dahulu, tamasuk saapa banyaknya warga nang handak pasang listrik. Duit gasan tihang listrik wan upah manajaknya matan APBN, marga itu urusannya mamulilit. Duit nang sadikitannya dibagi-bagi pulang gasan kampung-kampung nang jadi tanggung jawap P.T. PLN Kalimantan Selatan/Kalimantan Tengah. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 06.07.2014, Pukul Satangah Lima kamarian. Matan Balangan, Fitri, TVRI Kalimantan Selatan, mahabarakan.)