Warga Banua Banjar Cagar Dihukum Mati

TVRI Kalsel, Banjarmasin -- Kamantrian Luar Nagri Indunisia sudah bacucuk buku awan Pamarintah Arab Saudi gasan lima warga banua Banjar, Kalimantan Selatan, nang cagar dihukum mati. Kada manabus atawa bayar diyat haja, tamasuk jua minta maap awan kulawarga nang mati.

Kula-kula warga banua nang pacangan dihukum mati handak, Pamarintah Indunisia manabusi kulawarganya, nang kaya Satinah.

Ujar Kapala ahui Dinas Tanaga Karja dan Transmigrasi Kalimantan Selatan, Antonius Simbolon, pungkalanya kada sama. Bujur lima warga banua sudah diampuni kulawarga urang Arab Saudi nang mati, tagal anaknya masih halui, balum kawa baurusan. Bujur damintu, Kamantrian Luar Nagri tatap bausaha baparbaik.  

 

Matan Tahun 2012, Pamarintah Kalimantan Selatan sudah baisi pawadahan gasan maurus warga banua nang bagawi di Arab Saudi, nang baungkara. Pamarintah Banua gawi sabumi awan Kamantrian Luar Nagri, nang sudah gawiannya maurusi. Sasuai aturan, Pamarintah Kalimantan Selatan kada kawa maurus langsung ka Pamarintah Arab Saudi. (*) [ysas]  

                                                                       

(“Habar Banua”, TVRI Kalimantan Selatan, Banjarmasin. Siaran Ahad, 27/04/2014, Pukul Lima kamarian. Ratna Sari Dewi, Yusar Wardana, TVRI Kalimantan Selatan, mahabarakan.) 

                                                                                          

Akad Gasan Calun Pulisi Banua

TVRI Kalsel, Banjarmasin -- Gasan jaga-jaga, sakira jangan diwaluhi urang nang bapadah kawa malulusakan calun pulisi di Kalimantan Selatan Tahun 2014, Kapala Pulisi Banua Mahfud Ariffin wan kawitan calun pulisi baakad. Akadnya ditanda tangani Mahfud Ariffin langsung di Palidangan Bhayangkara, Banjarmasin. Kawitan calun pulisi jadi saksi. 

Ujar Juru Pandir Pulisi Banua Kalimantan Selatan, Sunyipto, akad ni bukti, batarimaan pulisi tahun ini sucing haja. Kada baduduitan. Kada batapalan. Nang ditarima jadi pulisi kaina dasar lulus bujur-harus.

Dalam akad dipadahakan, kawitan wan wali calun pulisi jangan hakun diwaluhi urang nang mangaku kawa malulusakan, asal pakai duit. Samunyaan waluh bajarang haja. Karamput wara. Maginnya mun mambawa-bawa ngaran arjabat pulisi banua.

Matan 3.614 ikung warga banua nang mandaptar jadi pulisi, 665 ikung takipai, marga kada mayu syarat. Sisanya batarus umpat ujian. Tahun ini, banua Kalimantan Selatan batarimaan 219 ikung pulisi bibinian, 205 ikung pulisi lalakian. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 27/04/2014, Pukul Lima kamarian. Rini Muliana, Sineda Rudi Putra, TVRI Kalimantan Selatan, mahabarakan.) 

TK Al-Inayah di Kotabaru Marista

TVRI Kalsel, Kotabaru -- Taman Kanak-Kanak (TK) Al-Inayah andaknya di Jalan Minapuri, Kampung Dirgahayu, Pulau Laut Utara, Kotabaru. Ditingau matan luar, sakulahannya pina kurisaan.

Rahat dijanguki ka dalam, magin bangat lagi. Lantainya balapik tikar. Tawingnya baluang-luang, batukup plastik. Pina mambari maras. Kadada barang sahimpil-himpil, lamari haja sabuting gasan manyimpan buku palajaran kakanakan.

TK Al-Inayah umurnya anam tahun. Sudah talu tahun manyiwa rumah warga, dua ratus ribu sabulan. Duit sakulahan matan anak murid haja, saikung bayar lima walas ribu sabulan. Duitnya tamasuk gasan manggajih guru, badua. Gajih guru kada manantu, saratus inggan tangah dua ratus ribu haja sabulan.

Bujur andaknya kada jauh pada Kantur Bupati Kotabaru, nasip TK Al-Inayah pina sakit pada kayap. Ngalihnya pulang, wadahnya lain ampun Yayasan Al-Inayah saurang. Tanahnya ampun Pamarintah Kalimantan Selatan. Wadahnya mainjam. Mun ada bantuan matan Pamarintah Bumi Sa-ijaan, paling mainan gasan murid balajaran haja.

Bujur nasipnya pina marista, talung puluh lapan ikung murid TK Al-Inayah sumangat haja balajar hari-hari. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 27/04/2014, Pukul Lima kamarian. Matan Kotabaru, Fitri, TVRI Kalimantan Selatan, mahabarakan.) 

Calun Wakil Rakyat Tahutang Spanduk

TVRI Kalsel, Banjarmasin -- Pamilu sudah tuntung, tagal banyak calun wakil rakyat nang maninggal hutang. Ujar Tajudin Noor, tukang spanduk di Pal Anam, Banjarmasin, calun wakil rakyat masih tahutang duit spanduk 2,5 %. Ujarnya, sabaluman Pamilu samalam banyak calun wakil rakyat nang batampah spanduk ka wadahnya, tamasuk batampah almanak, bandira partai wan lainnya.

Nang batampah kada calun wakil rakyat di banua haja, ada jua nang matan Kalteng. Nang batampah rata-rata maninggal hutang. Ujar Tajudin Noor, inya kurang labih haja. Mun inggan wayahnya kada ditahuri, hutangnya cagar dikurangi.

Wayah Pamilu samalam, tukang spanduk di Banjarmasin maulahakan spanduk gasan calun wakil rakyat nang di banua haja. Calun wakil rakyat di parupinsi, DPR RI wan DPD RI kabanyakan batampah ka Pulau Jawa. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 20/04/2014, Pukul Lima kamarian. Ten Umiayah, TVRI Kalimantan Selatan, mahabarakan.) 

Pamilu, Warga HSU Mancucuk Ba'asa

TVRI Kalsel, Amuntai -- Warga Hulu Sungai Utara (HSU) di talu buah kacamatan paksa mancucuk ba’asa di 10 wadah nang gasan mancucuk, atawa TPS. KPU HSU paksa maasai Pamilu, marga surat suara gasan dairah pamilihan (dapil)-nya tapahurup wayah Pamilu 9 April samalam.

TPS 02, Kalurahan Sungai Malang, Amuntai Tangah, tamasuk TPS nang lagi ba’asa mancucuk. Warga mancucuk matan Pukul Lapan baisukan. Nang ngaran kada hari parai, lain jua awan Pamilu hari Arba samalam. Tagal, warga sumangat haja mamilih. Di TPS ni ada 217 ngaran warga nang mamilih, tamasuk 2 ikung pamilih tambahan. Surat suaranya 221 lambar.

Di TPS 03, Tangga Ulin Hulu, lain pulang kisahnya. Ujar KPPS-nya, surat suara di TPS-nya kurang. Nang diminta 219 lambar, tagal nang diunjuk 205 haja. Artinya, kurang 14 lambar.

Kapala ahui KPU Kalimantan Selatan, Samahuddin Muharram, langsung basuara. Ujarnya, kakurangan tu rajin marga ada pamilih tambahan, nang kada masuk DPT. Sasuai aturan, pamilihnya musti ka TPS nang taparak, asal mambawa KTP.

Warga nang mancucuk ba’asa di 10 TPS samunyaan 2.353 ikung. Mayu gasan sabuah kursi di DPRD HSU. (*) [ysas]  

             

(“Habar Banua”, TVRI Kalimantan Selatan, Banjarmasin. Siaran Ahad, 20/04/2014, Pukul Lima kamarian. Mawan Himawan, TVRI Kalimantan Selatan, mahabarakan.)