Tukang Minyak Ditangati Bajualan

TVRI Kalsel, Banjarmasin -- Hari Saptu, minggu samalam, surat Satpol PP sagan tukang tambal ban, nang manangati bubuhannya buka sapanjangan pinggir kartak Jalan Ahmad Yani, Banjarmasin, habis waktunya. Artinya, tukang tambal ban kada dibariakan lagi bacari rajaki di pinggir kartak.

Cagarnya, tukang binsin damintu jua. Bujur balum diunjuki surat, Satpol PP Banjarmasin cagar manangati warga bajualan binsin sapanjangan pinggir kartak Jalan Ahmad Yani. Ujar kapala ahui Satpol PP Banjarmasin, Ichwan Noor Khalik, tukang minyak kada langsung samunyaan ditangati, tagal tunggal dikitan.

Ujar Ichwan Noor Khalik, tukang tambal ban wan tukang jual minyak ditangati buka di pinggir kartak, marga malanggar Undang-Undang (UU) Numur 38 Tahun 2004 masalah jalan wan UU Numur 22 Tahun 2007 masalah lalu lintas wan angkutan jalan. Satpol PP Banjarmasin maingkuti Aturan Pamarintah Numur 6 Tahun 2010. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 09/03/2014, Pukul Lima kamarian. Ibnu Fatih, Mawan Himawan, TVRI Kalimantan Selatan, mahabarakan.) 

Alkah Raja-raja Sigam di Pulau Laut, Kotabaru

TVRI Kalsel, Kotabaru -- Bahari kala, di Pulau Laut, Kotabaru, ada Karajaan Sigam, nang tamasuk Karajaan Banjar. Rajanya juriat Sultan Adam. Sayang banar, paninggalan karajaan nang ada matan tahun 1840 inggan 1905 ni sudah kadada lagi. Tinggal alkahnya haja, kubur raja-raja wan juriatnya.

Alkah Raja-raja Pulau Laut ni andakannya di Kampung Sigam, Jalan Barangas, Pal 3,5, Pulau Laut Utara. Tahun lapan puluhan, Bupati Gusti Syamsir Alam nang panambaian maangkat kisahnya. Alkah Raja-raja Sigam ni bakurinah diurus pamarintah tahun 2000. Tahun 2011, jadi Cagar Budaya.

Sabaluman Karajaan Banjar dihapus Walanda, di sini dikubur raja-raja Sigam. Matan raja nang panambaian, Pangeran Jaya Sumitra, inggan nang pahabisan, Pangeran Abdul Rahman. Ada jua kubur lain, tamasuk kubur warga nang lain juriat karajaan. Saban tahun, saban Milad Kotabaru, Pamarintah Bumi Sa-ijaan mahaul di alkah. Bulan Maulid, bahanu ada jua warga nang jiarah.

Hanyar-hanyar tadi, Balai Arkeologi Banjarmasin mamariksa Alkah Raja-raja Sigam nang bahari wilayahnya matan Pulau Laut inggan Pulau Sebuku ni. Cuali barang antik, sisa karajaan kadada lagi sahimpil-himpil. Maklum haja, bahari istana wan bangunan karajaan di Kalimantan Selatan bahannya kayu, nang kada tahan lawas. Imbah dibanam Walanda, jadi habu. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 02/03/2014, Pukul Lima kamarian. Matan Kotabaru, Fitri, TVRI Kalimantan Selatan, mahabarakan.) 

Warga Kampung Pudi, Kotabaru, Kakurangan Listrik

TVRI Kalsel, Kotabaru -- Saban hari, batu harang dikukut matan Bumi Sa-ijaan, Kotabaru, sagan mahidupi listrik di banua lain. Tagal, di Kotabaru saurang, warga sapalihan kakurangan listrik. Mun malam, paksa guring bakadap.

Di Kampung Pudi, Kalumpang Utara, saminggu listrik nang hidup siang-malam dua hari haja. Imbah tu, malam haja. Tu, gin, bahanu mati.

Warga nang sugih hingkat manukar jinsit saurang sagan malihat tipi. Tagal, nang susah, nang hidup sapamatuk sapangikih, paksa taungut, bamandaman. Bakadap. Balilin atawa balampu samprung haja. Ujar warga, listrik panambaian masuk Kampung Pudi tahun lapan ampat. Inggan ini, listrik rahat mati. Warga sudah kanyang tamakan janji P.T. PLN.

Marga itu, wayah bubuhan P.T. PLN mamadahi cara bayar listrik nang bapulsa, warga kadada nang hakunnya. Ujar warga, bayar bapulsa tu mangalihi haja. Warga handak, P.T. PLN bagawi bujur-bujur dahulu. Jangan listrik mati tarus. (*) [ysas]

   

(“Habar Banua”, TVRI Kalimantan Selatan, Banjarmasin. Siaran Ahad, 02/03/2014, Pukul Lima kamarian. Matan Kotabaru, Fitri, TVRI Kalimantan Selatan, mahabarakan.) 

Burung Walet di Guha Temuluang Bisa Kadada Lagi

TVRI Kalsel, Kotabaru -- Guha Temuluang andakannya di Kampung Bangkalaan Dayak, Kalumpang Hulu, 120 pal matan Kotabaru. Kada gagampangan kamari. Mun hujan, jalannya liwar licak. Sabaluman ka guha, kita musti bapadah dahulu awan kapala adatnya.

Umur Guha Temuluang saku sudah ribuan tahun. Samunyaan masih asli. Panjang guhanya ampat pal. Dalamnya, kadap. Kita musti jalan bagamat. Mun kada, bisa tagulingsir di batu nang lincar.

Imbah lapah bajalan sa-pal, ada sungai nang musti dilalui bakatinting. Di atas guha, sapanjangan sungai nang ligar anam dapa wan dalam talu dapa ni, harta barana Guha Temuluang marikit: sarang burung walet.

Matan bahari kala, sarang walet di Guha Temuluang sudah jadi hual. Banyak nang marabutakan. Alahan lagi, sawat bamatian. Marga itu, guhanya dijaga. Salau-salau, ada lampau warga nang jaga.

Lain pada itu, ada jua pungkala lain. Imbah digaduh Pamarintah Kotabaru, nang manunjuk parusahaan swasta sagan maambil hasilnya, sarang walet diputiki sakahandaknya haja. Kada mangganang sagan kaina.

Mustinya, sarang walet diputik talu bulan sakali haja. Ini, kada. Rancak banar diputiki. Ayungannya, anak walet kada sawat ganalan. Sarangnya diambil, anak burungnya dibuang. Mun damintu tatarusan, sarang walet di Guha Temuluang bisa kadada lagi. Saku kaina tinggal kisahnya haja. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 02/03/2014, Pukul Lima kamarian. Matan Kotabaru, Fitri, TVRI Kalimantan Selatan, mahabarakan.) 

Katangkapan Mambuang Ratik

TVRI Kalsel, Banjarmasin -- Warga Banjarmasin magun haja mambarang mambuang ratik. Magun haja katuju mambuang ratik di luar jam-nya. Saban kalian Satpol PP Banjarmasin rajia, musti ada nang katangkapan.

Mandam kapiu. Tatangis-tangis. Damintu parigal warga Banjarmasin nang kadapatan malanggar aturan mambuang ratik di luar jam nang sudah diatur. Ayungannya, lima warga nang malanggar aturan, tamasuk saikung mahasiswa, bayar danda dua satangah, sakira jangan dipanjara saminggu.

Rahat rajia samalam, Satpol PP Banjarmasin maintai intangan wadah tuyukan ratik, manangkapi warga nang mambarang buang.

Sasuai Aturan Dairah Pamarintah Banjarmasin Numur 21 Tahun 2011, warga musti mambuang ratik di wadah tuyukannya matan Pukul Anam kamarian inggan Pukul Anam baisukan. Lain pada itu, ditangati. (*) [ysas]

 

(“Habar Banua”, TVRI Kalimantan Selatan, Banjarmasin. Siaran Ahad, 02/03/2014, Pukul Lima kamarian. Ratna Sari Dewi, Fauzi Oku, TVRI Kalimantan Selatan, mahabarakan.)