Ujian Gasan Calun Guru

TVRI Kalsel, Banjarmasin -- Guru wayah ini lain banar awan guru bahari. Bujur gajihnya sadikit, guru bahari simpun haja. Guru wayah ini sapalihan baparigal kada sampuraka.

Bujur gajihnya ganal, guru wayah ini ada nang bagandakan awan papadaannya. Ada nang katuju baarai, atawa bagandakan, awan muridnya. Ada nang batumburan, galu saalamanan, marga muridnya batianan. Ada jua nang jarang maajar di sakulahan, aur bajualan, bacari duit haja.

Ujar kapala ahui Parsatuan Guru Ripublik Indunisia (PGRI) Kalimantan Selatan, Haji Dahri, sayang banar guru wayah ini sapalihan baparigal nang kada-kada. Tagal, ujarnya, guru manusia jua, nang bisa hilap. PGRI suwah manyurung ka pamarintah, wayah batarimaan, nang cagar jadi guru diuji dahulu jiwanya. Sakira katahuan, patut-kadanya inya jadi guru.

Haji Dahri handak, guru di banua Kalimantan Selatan manjaga adab wan manambah ilmunya, sakira muridnya jadi urang pintar nang baik wan baadab jua. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 17.08.2014, Pukul Lima kamarian. TVRI Kalimantan Selatan, mahabarakan.) 

Haul Syekh Muhammad Arsyad Al-Banjari

TVRI Kalsel, Martapura -- Umat Islam di banua Kalimantan Selatan wan matan mana-mana mahaul Syekh Muhammad Arsyad Al-Banjari, atawa Datu Kalampayan, nang kadua ratus lapan tahun.

Haulannya di Masigit Tupaturrogibin, Kampung Dalam Pagar Timur, Martapura. Baribu-ribu ikung nang datangan. Ada nang matan Kalimantan Timur wan Kalimantan Tangah. Hubnur Kalimantan Selatan, Rudy Ariffin, wan arjabat banua lainnya, ada jua.

Ujar Rudy Ariffin, Syekh Muhammad Arsyad Al-Banjari bin Abdullah bin Abdurrahman Al-Banjari diranakakan di Kampung Lok Gabang, 17 Maret 1710. Habis umur di Kampung Dalam Pagar, 3 Oktober 1812. Umurnya 102 tahun. Syekh Muhammad Arsyad Al-Banjari cangkal maislamakan urang banua, baik banar mun dituruti umat Islam nang hidup wayah ini.

Ujar Haji Sampurna, nang datang matan Balikpapan, Kalimantan Timur, haul Datu Kalampayan banyak banar hikmahnya, gasan mahargai usaha Syekh Muhammad Arsyad Al-Banjari maislamakan banua Banjar.

Lain pada Hubnur Rudy Ariffin, ada jua Bupati Banjar Sultan Khairul Saleh, Walikota Banjarmasin Muhidin, Bupati Tanah Bumbu Mardani H. Maming, wan arjabat banua Kalimantan Selatan lainnya. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 10.08.2014, Pukul Lima kamarian. Matan Martapura, Nurdin Yusuf, TVRI Kalimantan Selatan, mahabarakan.) 

                                                                                     

Maunjun di Lanting Paring Sungai Balangan

TVRI Kalsel, Paringin -- Urang banua Banjar katuju maunjun. Tagal, lain jua rasanya maunjun di tabing wan di atas lanting. Sapanjangan Sungai Balangan, banyak warga maunjun di lanting paring.

Lanting paring nang gasan warga Bumi Sanggam maunjun bajurut sapanjangan sungai. Di hujung lanting, ada wadah gasan kanaungan, sakira paunjunan kada kapanasan atawa kahujanan. Tumatan lanting, tantaran diulur, unjun dilabuh. Sambil mahadang unjunnya dipatuk iwak, paunjunan santai di kanaungan, basangga wihang, manjanaki banyu sungai. Damintu hari-hari.

Sasain parak kamarian, sasain banyak paunjunan datangan. Lanting paring sasain banyak. Ada jua nang maunjun di jukung. Tagal, maunjun di lanting paring sudah lawas jadi kabiasaan warga Balangan.

Warga maunjun kada sahibar gasan baramian haja. Sapalihan ada jua nang gasan bacari. Iwak di Sungai Balangan banyak haja, tamasuk iwak baung. Mun banyak kulihan, sapalihan dijual di pasar, sapalihan gasan dimakan saurang. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 10.08.2014, Pukul Lima kamarian. Matan Balangan, Fitri, TVRI Kalimantan Selatan, mahabarakan.) 

Kakanakan Dirungkau Biruang

TVRI Kalsel, Banjarmasin -- Sudah saminggu labih Taufik Hidayat nang umur sawalas tahun ditambai di Rumah Sakit Suaka Insan, Banjarmasin. Tangan kanannya sudah talu kali dijahit, imbah dirungkau wan diigut biruang.

Salasa samalam, tangan kanan murid kalas anam SDN Kampung Melayu 7 ni wawah diigut biruang. Lapak tangannya rabit, tulangnya patah, musti dijahit barapa kali. Ujar kawitan Taufik Hidayat, Nurhayati, inya kada manyangka sahama-hama, bakunjangan ka kabun satua jadi bala gasan anaknya. Ujarnya, kabun satua Pamarintah Banjarmasin musti tanggung jawap. Bayaran rumah sakit, larang banar.

Dinas Partanian Banjarmasin sudah bajanji mambayari rumah sakit. Tagal, ujar kulawarga Nurhayati, inggan samalam balum ada habarnya.

Di banua Kalimantan Selatan, kabun satua sawalasannya. Andaknya di Jalan Jahri Saleh, Banjarmasin. Bujur satuanya kada tapi banyak, tagal nang bakunjangan kamari malaran jua. Sakira urang kada jara, mustinya kakanakan nang datang kamari dijaga wan dihawasi. Sakira kada bakajadian lagi. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 10.08.2014, Pukul Lima kamarian. Wiryanto Hadi, TVRI Kalimantan Selatan, mahabarakan.) 

Baladuman Malam Hari Raya

TVRI Kalsel, Barabai -- Bunyi gadaguman di Kampung Palajau malam hari raya samalam lain bunyi latupan, tagal laduman karbit. Bunyinya liwar hangkui. Saling nyaringan. Bumi bagantar. Talinga sunging mandangar.

Kadada nang tahunya, matan pabila kabiasaan baladuman saban malam hari raya Idul Fitri ni bamula. Ujar Haji Fahrudin, tatuha Kampung Palajau, Pandawan, Hulu Sungai Tangah (HST), Kalimantan Selatan, tumatan sidin halus warga sudah baladuman saban malam hari raya. Tahun ini warga baulah 108 buting laduman. Tahun samalam, 60 buting haja.

Ladumannya diulah sabulan sabaluman bulan puasa. Laduman musti diulah badahulu, gasan baladuman salajur batakbiran malam hari raya. Ujar Haji Fahrudin, rapun hanau nang gasan diulah laduman musti kujur. Imbah ditabang, dikuyak, dibalah dua. Dalamnya dikarik. Imbah tu, ditangkupakan baasa, diikat tali anyaman buluh. Rapun hanaunya manukar. Sarapun, haraganya ampat ratus ribu. Ada jua nang sajuta, diliat ganal-halusnya.

Sakira hakun babunyi, luang ladumannya dibuati banyu wan karbit. Luangnya ditukupi satumat, sakira karbitnya tarandam. Mun kabanyakan banyu, laduman bisa buntat. Imbah tu, laduman dicucul. Siapa haja hingkat mancucul ladumannya. Kada pandang tuha, lalakian, bibinian atawa kakanakan. Asal wani. Gasan jaga-jaga, nang ampun gawi manyiapakan mutur ambulan wan pamadam kabakaran. Pulisi wan tantara, ada jua.

Sayang banar, Pamarintah HST kada mahatiakan kabiasaan warga baladuman saban malam hari raya Idul Fitri di Kampung Palajau, padahal saku baik banar gasan wisata budaya. Nang datang kada warga Bumi Murakata haja. Urang luar, banyak jua. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 03.08.2014, Pukul Lima kamarian. Rachma Ainun, TVRI Kalimantan Selatan, mahabarakan.) 

Kampung Katupat di Banjarmasin

TVRI Kalsel, Banjarmasin -- Di Banjarmasin, siapa nang kada tahu Kampung Katupat? Mun bakunjangan ka Sungai Baru, sapanjangan jalan bilang katupat haja nang dijanaki. Katupat wan lontong disadai atawa digantung, antui-antui di palataran, atawa di muka rumah warga.

Tumatan subuh, imbah babuncalak mata, warga Sungai Baru sudah mangulai katupat. Maginnya sabaluman hari raya Idul Fitri, 1 Syawal 1435 Hijriyah samalam, tukang ulah katupat wan lontong bilang kada kasintakan hinak, kabanyakan gawian. Nang maambil upah maulah urung katupat kada bibinan nang tuha-tuha haja, bibinian nang anum-anum banyak jua.

Di rumah Halimah, nang wadah baulah, manjarang wan bajual katupat wan lontong, damintu jua. Samunyaan kadada nang baranainya: maulah urung katupat, maisi’i barasnya, manjarang katupat wan lontongnya.

Hari raya Idul Fitri babarakat banar gasan warga Kampung Katupat. Halimah nang baumuran baulah katupat, damintu jua. Rajakinya dasar di katupat. Marga kada kaawakan, paksa inya mangiau urang gasan mandangani bagawi. Nang kaya tahun samalam jua, hadap hari raya samalam inya baulah 6.000 inggan 7.000 bigi katupat wan lontong hari-hari. Inya kulihi haja anam juta sahari. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 03.08.2014, Pukul Lima kamarian. Rini Muliana, Ibnu Fatih, TVRI Kalimantan Selatan, mahabarakan.) 

                                                                                                                  

Bubuhan Hukuman Dapat Karinganan

TVRI Kalsel, Banjarmasin -- Hari raya Idul Fitri 1 Syawal 1435 Hijriyah samalam banyak banar hikmahnya gasan bubuhan hukuman di Panjara Taluk Dalam, Banjarmasin. 1.022 ikung hukuman dapat karinganan matan Kamantrian Hukum wan HAM RI.

Ujar kapala ahui Panjara Taluk Dalam, Eddy Teguh Widodo, pamarintah mangurangi hukuman gasan bubuhan hukuman nang apik parigalnya salawas dipanjara. 9 ikung langsung bibas, 60 ikung hukumannya dikurangi sabulan, 60 ikung hukumannya dikurangi tangah dua bulan.

Nang pambanyaknya dapat karinganan bubuhan nang dihukum marga narkuba: 689 ikung. 12 ikung nang dihukum marga kurupsi, dikurangi jua hukumannya. Ujar Eddy Teguh Widodo, Panjara Taluk Dalam sudah kahibakan. Mustinya gasan 366 ikung haja, tagal dibuati 2.389 ikung hukuman. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 03.08.2014, Pukul Lima kamarian. Wiryanto Hadi, TVRI Kalimantan Selatan, mahabarakan.)