Valentine Day Kada Ditangati

TVRI Kalsel, Banjarmasin -- Bujur urang Banjar sapalihan kada katuju umpat baramian di “Hari Kasih Sayang” atawa Valentine Day, tagal kapala ahui Nahdlatul Ulama Kalimantan Selatan, Syarbaini Haira, lain pulang pandapatnya. Ujarnya, dalam Islam kadada “Hari Kasih Sayang”. Urang Islam musti bakasih sayang awan kulawarga wan papadaannya hari-hari.

“Hari Kasih Sayang” bisa haja diramiakan, tagal niatnya musti baik, pariannya sagan mambari urang susah. Jangan manyalaya, maginnya baparigal atawa baidabul nang kada-kada. Mun kada sasuai ajaran agama, baramian di “Hari Kasih Sayang” ditangati.

Ujar Syarbaini Haira, adat budaya urang Barat kada samunyaan jahat. Banyak jua nang kawa diambil hikmahnya, sagan kamaslahatan sabarataan. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 16/02/2014, Pukul Lima kamarian. Wiryanto Hadi, Oku, TVRI Kalimantan Selatan, mahabarakan.) 

Pantai Taluk Gosong, Kotabaru

TVRI Kalsel, Kotabaru -- Jaka ibarat bibinian, Pantai Taluk Gosong di Pulau Laut Utara, Kotabaru, masih dadaraan. Balum banyak nang tahu kabungasannya. Pamarintah Kotabaru, gin, balum maulahnya jadi wadah wisata. Pantainya asli. Andakannya ampat pal haja matan Pantai Gadambaan, Sarang Tiung. Intangan Jalan Raya Berangas, di Pal 18.

Kadada lawang sakipingnya. Masuknya, gin, kada babayaran. Kita tinggal bamandak haja di pinggir kartak, atawa turun di batang Taluk Gosong. Wadahnya sunyi, pantar kita haja lagi nang ampun pantai. Ada ai urang bagawian di batang, kakanakan nang maunjun wan mandian, bakunyungan.

Mun sudah takamari, kita asa handak balawas. Kada banyak urang nang kamari. Pasir pantainya barasih, banyu lautnya jaranih. Lain banar awan pantai lain nang ada di Kotabaru. Mun sudah tulai di wadah nang rami wan handak basunyi-sunyi, pas banar manukui Pantai Taluk Gosong. Bunyi umbak haja nang kadangaran.

Mun sawat kamari, jangan kalumpanan: jangan bajajumput apa-apa, cuali sagan bagambaran. Jangan jua mambarang babuang ratik. Sakira pantainya tatap barasih, kawa sagan wadah bakunjangan salawasan. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 16/02/2014, Pukul Lima kamarian. Matan Kotabaru, Fitri, TVRI Kalimantan Selatan, mahabarakan.) 

Tanah Rumbih di Satui, Tanah Bumbu

TVRI Kalsel, Tanah Bumbu -- Hujan labat nang turun dua hari di Satui, Tanah Bumbu, Kalimantan Selatan, maulah tanah rumbih. Nang rumbih tanah di Pal 160. Lima buah rumah katuyukan tanah. Tanahnya rumbih Pukul Lima subuh. Lain pada marga hujan labat, wadah batabuk batu harang nang kada jauh pada situ disangka jadi ungkara. Tanah bangkang. Bisa jua kaina rumbih pulang.

Intangan situ ada parusahaan batu harang nang hanyar tuntung batabuk. Luang bakas tabukannya bangangaan, saling ganalan. Imbah tuntung batabuk, parusahaan kada bagaduh lagi. Ayungannya, tanah lamah, maginnya wayah hujan. Untung kadada nang mati katindihannya. Wayah tanah bamula bangkang, urang rumah sawat bukahan, kaluaran.

Ujar Herman, nang rumahnya taumpat rumbih, rahatan tanah bangkang, inya wan warga lainnya langsung kaluaran. Kada sawat lagi mambawa harta barana.

Lain pada lima buah rumah nang karumbihan, tuyukan tanah rumbih tu sawat mangganggu jalan antara Kalimantan Selatan-Kalimantan Timur, marga andakannya dua puluh dapa haja pada pinggir kartak. Marga itu, warga rugi ratusan juta. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 16/02/2014, Pukul Lima kamarian. TVRI Kalimantan Selatan, mahabarakan.) 

Banjarbaru Baulah Rumah Sakit Hanyar

TVRI Kalsel, Banjarbaru -- Sagan malayani kasihatan warga, Pamarintah Banjarbaru cagar baulah rumah sakit hanyar nang batingkat ampat.

Ujar kapala ahui Rumah Sakit Banjarbaru, Hajjah Endah Labati Silapura, Banjarbaru musti baisi rumah sakit nang bapala, nang sasuai alam lingkungan. Ujarnya, rumah sakit nang ada banyak banar kakurangannya. Tanahnya kipit, kada kawa lagi ditajaki bangunan hanyar. Wadah parkirnya, damintu jua, kipit banar, ngalih sagan maandak kandaraan.

Ujar kapala ahui Dinas PU Banjarbaru, Jaya Kresna, rumah sakit cagar digawi bulan ampat kaina. Luas tanahnya ampat burungan labih. Duitnya matan APBD Banjarbaru Tahun 2014-2015, samunyaan Rp 217 miliar. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 09/02/2014, Pukul lima kamarian. Matan Banjarbaru, Nurdin Yusuf, TVRI Kalimantan Selatan, mahabarakan.) 

Hutan Meratus Jadi Taman Nasiunal

TVRI Kalsel, Banjarmasin -- Ujar kapala ahui Dinas Kehutanan Kalimantan Selatan, Rahmadi Kurdi, mun handak nyaman wan kadada lagi nang kawa manggutak, hutan Gunung Meratus diulah jadi Taman Nasiunal haja.

Mun jadi Taman Nasiunal, hutan Gunung Meratus cagar tarahagu, pacangan tahan salawasan. Mun pariannya ada jua kaina parusahaan nang handak batabang kayu atawa batabuk batu harang, ijinnya kada gagampangan.

Ujar Rahmadi Kurdi, mun handak jua, samunyaan musti akur, tamasuk bubuhan LSM, pamarintah banua wan masyarakat adat di Gunung Meratus. Banyak parusahaan nang minta ijin ka Kementerian Kehutanan di Jakarta, handak manggawi hutan Meratus. Nang pambanyaknya, handak batabuk batu harang. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 09/02/2014, Pukul lima kamarian. Wiryanto Hadi, Fauzi Oku, TVRI Kalimantan Selatan, mahabarakan.)