Jalan di Satui Rumbih Pulang

TVRI Kalsel, Batulicin -- Jalan di Satui Barat, Pal 169, Tanah Bumbu, tamasuk jalan antasan Kalimantan Selatan-Kalimantan Timur. Dapatnya hujan nang turun saling labatan, jalanan rumbih pulang. Siring wasi wajanya tabulangkir.

Pamarintah Tanah Bumbu musti maambil hikmahnya. Jangan lagi mambariakan parusahaan swasta manabuk batu harang di wadahya. Imbah tuntung batabuk, parusahaan kada lagi manyimpuni luang tanah bakas tabukannya. Jalan nang rumbih jadi bukti, batabuk batu harang jadi bala gasan warga. Jalan rumbih tarus.

Sudah barapa kali jalanan disiring, magun haja rumbih dapatnya hujan. Mun kada dihatiakan babanaran, jalan antasan Kalimantan Selatan-Kalimantan Timur wan kantur pamarintah bisa taumpat rumbih jua.

Wayah ditakuni TVRI, Camat Satui, H. Suwignyo, bapadah, Pamarintah Tanah Bumbu pacangan baulah jalan hanyar, dua ratus dapa jauhnya pada jalan nang ada. Panjangnya 375 dapa, luasnya 15 dapa. Satumbangan jalan lawas nang rumbih dibaiki, warga lalu lalang di jalan hanyar. Mau kada mau, musti damintu. Lamunnya kada, bilang kada kasudahannya ai. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 31.08.2014, Pukul Lima kamarian. Mawan Himawan, TVRI Kalimantan Selatan, mahabarakan.)