TVRI Kalsel, Balangan
-- Warga Bumi Sanggam nang diam di unjut kampung manakunakan nasipnya lawan
Pamarintah Balangan. Sudah barapa tahun jambatan gantung pagat, balum ada
tatangar pabila jua pacangan dibaiki.
Jambatan gantung tamasuk
panyawaan gasan warga RT 2, Kampung Kambiyain, Tabing Tinggi, Balangan --
talung puluh pal jauhnya pada Paringin.
2 buah jambatan gantung pagat dapatnya ba’ah, tahun 2005 wan 2007
samalam.
Ujar warga, saminggu imbah
jambatan pagat, datang trak nang mambawa wasi gasan mambaiki jambatan. Tagal,
inggan ini, jambatannya kada dibaiki. Wasinya tatuyuk. Batagar. Tatukup kumpai.
Kalawasan mahadang, warga
bahandip, baulah jambatan paring. Pungkalanya, mun banyu pasang, warga kada
kawa manyubarang. Jambatannya larut dibawa banyu nang landas. Ayungannya, warga
takurung, kada kawa kaluar kampung. Lain pada jambatan gantung, ada jua jalan
lain. Tagal, kajajauhan. Jalan gunung. Kawa gasan bajalan batis haja, kada kawa
bakandaraan. (*) [ysas]
(“Habar Banua”,
TVRI Kalimantan Selatan, Banjarmasin. Siaran Ahad, 07.09.2014, Pukul Lima
kamarian. Matan Paringin, Fitri, TVRI Kalimantan Selatan, mahabarakan.)
Tidak ada komentar:
Posting Komentar