TVRI
Kalsel, Banjarmasin -- Aturan Dairah nang diulah DPRD Banjarmasin gasan warga
nang handak bajakat, layat jua urusannya. Nang talayat dipandirakan, pariannya
siapa haja kaina nang cagar dipintai jakat, siapa nang tapatut manarima. Lain
pada itu, siapa jua kaina nang jadi amil jakatnya, pagawai nagri atawa swasta.
Wakil
puhun gawi nang maulah Aturan Dairah gasan bajakat di DPRD Banjarmasin,
Johansyah, bapadah, hasil jakat di Banjarmasin malaran jua banyaknya. Sasain
tahun, jakat warga Banjarmasin sasain banyak. Jakat nang diurus Badan Amil
Jakat Banjarmasin sudah karasaan hasilnya. Ada nang gasan mambaiki rumah warga
nang rumbis, manyakulahakan anak yatim-piatu, tamasuk gasan mamudali warga
bajualan.
Ujar
Johansyah, Badan Amil Jakat Nasiunal inggan ini magun haja diurus pamarintah.
Diharap, kaina ada pawadahan nang bakurinah maurusnya. Diharap, ada jua
kanturnya. Inggan ini, Badan Amil Jakat Nasiunal magun haja baupang di Masigit
Miftahul Ihsan, di Jalan Jati, Banjarmasin.
Lain
pada Aturan Dairah, kaina cagar ada jua Aturan Walikota Banjarmasin, nang
maatur saapa banyaknya jakat gasan bubuhan pagawai nagri sipil (PNS) di
Banjarmasin. (*) [ysas]
(“Habar Banua”,
TVRI Kalimantan Selatan, Banjarmasin. Siaran Ahad, 3 Nupimbir 2013, Pukul lima
kamarian. Budi Alamsyah, TVRI Kalimantan Selatan, mahabarakan.)
Tidak ada komentar:
Posting Komentar