Hujan Ulahan di Banua

TVRI Kalsel, Banjarbaru -- Gasan mangurangi palak nang timbul di banua marga kukus api, Pamarintah Parupinsi Kalimantan Selatan, BPPT wan P.T. PLN maulah hujan. Hasilnya, sudah mandua mingguan (sabaluman SBY datang ka banua samalam), palak kukus api bakurang. Hujan bamula turun di banua. 

Ujar M. Djazim Syaifullah, urang BPPT nang ahli cuaca, hujan ulahan ni sabulanan, tumatan 17 Uktubur samalam. Maulah hujan, kada gagampangan. Dicari dahulu awan di langit nang cagar diulah hujan. Uyah nang dihambur di awan, parak sapuluh pikul.

Kumandan Lapangan Ulin Syamsudin Noor, Letkol Esron S.B. Sinaga, bapadah, TNI AU akur banar lawan hujan ulahan ni. Ujarnya, kumarau landang maulah hutan wan pahumaan kamandahan. Timbul palak kukus api, nang mangganggu turun-naik kapal tarbang di Lapangan Ulin.

Mulanya, awan di atas langit Riam Kanan dihamburi uyah. Tumatan kapal tarbang mahambur uyah, inggan turun pulang, waktunya sa-jam haja. Ngaran supir atawa pilot kapal tarbangnya Sofyan Mandala Sihombing, didangani anak buahnya. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 3 Nupimbir 2013, Pukul lima kamarian. TVRI Kalimantan Selatan, mahabarakan.)