Seni Budaya Banjar Masuk Kurikulum Pandidikan di Banua

TVRI Kalsel, Banjarmasin -- Malihat banyaknya seni budaya Banjar di banua Kalimantan Selatan, Parasidin RI Susilo Bambang Yudhoyono (SBY), rahat mambuka “Kongres Budaya Banjar” nang katalu di Mahligai Pancasila samalam, bapitua: seni budaya Banjar hingkat dimasukakan ka kurikulum pandidikan di sakulahan.

Mandangar pitua SBY tu, Kapala Dinas Pandidikan Parupinsi Kalimantan Selatan, Ngadimun, akur haja. Alahan lagi, ujarnya, seni budaya Banjar sapalihan sudah jua dilajarakan di sakulahan. Dinas Pandidikan rahat manahapi Kurikulum 2013. Seni budaya Banjar musti dikaji dahulu, nang mana haja kaina nang cagar dimasukakan kurikulum.

Ujar Ngadimun, seni budaya Banjar nang cagar dimasukakan kurikulum kaina diharap sama samunyaan, gasan balajaran di sakulahan. Sabalumannya, guru-gurunya cagar dilajari jua dahulu.

Lamunnya seni budaya Banjar masuk kurikulum pandidikan, diharap kaina buhan anak murid paham wan katuju lawan seni budaya warisan nini-datunya, gasan malawan budaya luar nang sasain liwar. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 3 Nupimbir 2013, Pukul lima kamarian. TVRI Kalimantan Selatan, mahabarakan.)