Darmaga Musium Wasaka Runtuh

TVRI Kalsel, Banjarmasin -- Bilang kada disangka-sangka. Kadada angin, kadada hujan, Salasa (07/01/2013) samalam darmaga Musium Waja Sampai ka Puting (Wasaka), nang di higa Jambatan Banua Anyar, Banjarmasin, runtuh.

Rahat runtuh, untung kadada urang di bawahnya, jadi kadada nang kagugurannya. Sabaluman runtuh, darmaga di tabing sungai ni sawat mandua bulanan cundai.

Ujar urang Disporbudpar Kalimantan Selatan, Hajjah Yudiawati, darmaga nang runtuh ni cagar mangalihi urang naik ka batang di muka musium, nang datang jalan sungai.

Ujar urang Disporbudpar lainnya, D. Sunjaya, darmaga ni lain tanggung jawap musium, tagal Dinas Pekerjaan Umum (PU) Kalimantan Selatan. Dinas PU sawat mambaiki. Tagal, imbah tuntung dibaiki, balum diunjuk ka musium. Marga itu, urang musium kada hingkat baapa-apa.

Sayang banar darmaga Musium Wasaka runtuh, padahal hanyar barapa bulan dibaiki. Mun kada lakas dibaiki, atawa diulah baasa, turis nang datang jalan banyu pacangan ngalih ka musium. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 12/01/2014, Pukul lima kamarian. M. Maurisza, Yusar Wardana, TVRI Kalimantan Selatan, mahabarakan.)