Ayaman Purun Matan Sungai Rutas, Tapin

TVRI Kalsel, Rantau -- Hasil alam banua Kalimantan Selatan liwar banyaknya. Mayu haja sagan hidup warga hari-hari. Warga Sungai Rutas, Kecamatan Candi Laras Selatan (CLS), Kabupaten Tapin, maharagu tanaman purun nang tumbuh di baruh atawa rawa-rawa, sagan diulah ayaman. Purun hingkat diayam, diulah tikar, bakul, kampil, tas wan tupi.

Matan tahun 1982, Mariani tamasuk urang Sungai Rutas nang manarusakan kabisaan urang Banjar maayam tikar purun, bakul, kampil, tas wan tupi. Inya arai bakisah, hasil gawiannya sudah dijual ka Bali, Yogyakarta, Samarinda wan Palangka Raya.

Tagal, sudah barapa bulan ini Mariani wan warga Sungai Rutas lainnya manggarunum. Baruh nang wadah tumbuh tanaman purun, magin bakipit, ditandar kabun sawit. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 19/01/2014, Pukul Lima kamarian. Matan Rantau, Jamaluddin, TVRI Kalimantan Selatan, mahabarakan.)