Tukang Ulah Kain Sasirangan Pusing Naning

TVRI Kalsel, Banjarmasin -- Tukang ulah kain sasirangan pusing naning marga dollar Amirika nang magin larang. Matan tutup tahun 2013 samalam, haraga bahan nang sagan baulah kain sasirangan, magin larang, bagiringan lawan duit rupiah nang bamurah.

Matan pabrik, haraga kain katun sudah naik Rp 1.000 sadapa. Sutra incaan, naik Rp 2.000. Sutra asli, naik Rp 5.000 sadapa. Kalir kain naik Rp 15.000-Rp 20.000 sacuntang.

Sakira usaha tatap jalan, tukang ulah kain sasirangan kada wani banyak maambil hujungan. Mun haraga kain naik 30 %, kain sasirangan palingan naiknya 15 % haja. Marga itu, hujungannya kada banyak.

Lain pada haraga bahan, haraga elpiji nang larang maulah tukang kain sasirangan magin pusing naning. Gas elpiji tapakai banar sagan manjarang banyu, sagan manculup kain nang disirang ka banyu manggurak.

Nang baulah kain sasirangan handak, samunyaan tabulik nang kaya asal. Sakira bubuhannya hingkat bausaha. Supaya nyaman sabarataan, sakira pakulih hujungan. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 19/01/2014, Pukul lima kamarian. Fitri, TVRI Kalimantan Selatan, mahabarakan.)