Hutan di Gunung Meratus Musti Diharagu

TVRI Kalsel, Barabai -- Gunung Meratus malintang matan Kalimantan Selatan inggan Kalimantan Timur. Hutannya sapalihan masih sabat, baik banar sagan pahinakan manusia. Harta barana nang tapatak dalam tanah liwar banyaknya.

Di tanah Gunung Meratus banyak batu harang wan bigi wasi. Banyak pangusaha nang kada baingat diri, bahimat manabuki. Saban hari, hasil alam dijual ka luar banua wan luar nagri. Gunung wan hutan baluang-luang, pantar muha nang baracak atawa bakayap.

Ujar nang tukang hatiakan lingkungan hidup di Barabai, M. Harris Fadillah, di Banua Anam tinggal Hulu Sungai Tengah (HST) haja lagi nang tanah, hutan wan gunungnya baluman ditabuki. Tagal, inya gair jua. Mun kurang-kurang, tanah di Bumi Murakata bisa ditabuki urang jua. Mun kada dijaga wan diharagu sama-sama, anak cucu kita kaina malumu tunjuk wara.

Banyak warga nang himung, inggan ini Pamarintah HST kada manggutak hutan di Gunung Meratus. Alam lingkungan, tanah, banyu wan hutan, musti dijaga wan diharagu sama-sama, sagan kamaslahatan anak cucu kita. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 16/03/2014, Pukul Lima kamarian. Matan Barabai, Jamaludin, TVRI Kalimantan Selatan, mahabarakan.)