Asam Tandui di Hulu Sungai Selatan

TVRI Kalsel, Kandangan -- Di banua Banjar, Kalimantan Selatan, asam tandui saku tumbuh di Hulu Sungai Selatan wan Gunung Meratus haja. Tinggal barapa rapun haja lagi di Bumi Antasari. Kawa dihitungi. Mahadang habisnya haja lagi. Asam tandui nang babuah satahun sakali wayah musim hujan ni rasanya liwar masam.

Di Bumi Antaludin, asam tandui saku tinggal sarapunannya di Kampung Tanah Bangkang, Sungai Raya. Ujar Amang nang tahu, umur asam tandui di wadahnya sudah dua ratus tahun labih. Ganalnya tangah dua dapa, tingginya talung puluh lima dapa labih.

Urang kampung yakin, kulipak rapun asam tandui hingkat sagan manambai sakit gula, darah tinggi wan mambuangi racun imbah dipatuk ular. Banyak nang manguiti kulipaknya, sagan dijarang wan dikinum banyunya.

Sakira kada lakas mati, marga karancakan dikuiti, Pambakal Tanah Bangkang mamagari rapun asam tandui-nya. Untungnya, ada warga nang sawat batanam asam tandui. Bujur dua rapun haja nang tumbuh, paling kada ada harapan, asam tandui di Hulu Sungai Selatan kada pacangan hilang salawasan. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 09/03/2014, Pukul Lima kamarian. Matan Kandangan, Jamaludin, TVRI Kalimantan Selatan, mahabarakan.)