Sabtu, 08 Maret 2014

Sarang Walet di Guha Temuluang Ditutup



TVRI Kalsel, Kotabaru -- Imbah ada nang mancuntani, Pamarintah Kotabaru manutup samantara sarang burung walet di Guha Temuluang, Kampung Bangkalaan Dayak, Kalumpang Hulu. Imbah ijin P.T. Walesta dicabut bulan sawalas tahun samalam, inggan ini kadada nang dibariakan maambil. Mahadang dibari ijin, sagan mamutik sarang burung nang haraganya bamiliar-miliar tu.

Ijin mamutiki sarang walet sagan P.T. Walesta dicabut Pamarintah Kotabaru, marga sudah habis waktunya. Imbah ijinnya diulah baasa, atawa ada parusahaan lain nang manggantiakan, hanyar sarang walet hingkat diputik.

Matan jaman Bupati Syahrani Mataja, sarang walet di Guha Temuluang digaduh Pamarintah Bumi Sa-ijaan. Gawi sabumi awan parusahaan lain, imbah dililang. Alasannya, Guha Temuluang tamasuk hutan nang diharagu pamarintah. Tagal, P.T. Walesta tarus nang manang lilang. Ujar habar, P.T. Walesta haja nang basurung.

Matan jaman Walanda, sarang walet di Guha Temuluang sudah dirabutakan. Bilang kada kasudahannya. Tamasuk dirabutakan papadaan warga Kampung Bangkalaan Dayak saurang. Paampihannya, ada nang mancuntani. Marga itu, pamarintah wan pulisi Kotabaru manutup samantara Guha Temuluang. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 02/03/2014, Pukul Lima kamarian. Matan Kotabaru, Fitri, TVRI Kalimantan Selatan, mahabarakan.) 

Tidak ada komentar:

Posting Komentar