Elpiji Nang Talu Kilu Dijual di Kotabaru

TVRI Kalsel, Kotabaru -- Di warung-warung Kotabaru banyak dijual elpiji nang isi talu kilu. Padahal, Kotabaru balum ditunjuk pamarintah pusat baalih mamakai minyak gas ka elpiji. Di pinggir kartak Jalan Suryagandamana, elpiji nang isi talu kilu satuyuk di muka warung. Ditukar di Banjarmasin, isinya dijual talung puluh lima ribu.

Ujar urang warung, inya sudah satahun bajualan elpiji nang isi talu kilu. Saban bulan, inya dikirimi saratus inggan tangah dua ratus bigi. Kada di Kotabaru-nya haja, di Pasar Serongga, Kalumpang Hilir, elpiji nang isi talu kilu banyak jua dijual.

Di Kotabaru, elpiji nang isi talu kilu mustinya kada dibariakan dijual, marga ada minyak gas nang basupsidi. Mun dijual jua, ngarannya tadua-dua. Elpiji isi talu kilu tu asalnya matan Banjarmasin, nang sudah baalih ka elpiji. Ayungannya, jatah sagan Banjarmasin bakurang. Cucuk haja bahanu di Banjarmasin kakurangan elpiji.

Tagal, masalah ni pina kada dihatiakan jua. Wayah ditakuni, urang dinas di Kotabaru nang maurusi elpiji pina batatunjulan.

Wayah ditalipuni, kapala ahui Pertamina Kotabaru, Cipto, pina indah manjawapi. Bapadah rahat parai bagawi. Ujarnya, tu urusan Pertamina Wilayah Kalselteng di Banjarmasin. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 09/03/2014, Pukul Lima kamarian. Matan Kotabaru, Fitri, TVRI Kalimantan Selatan, mahabarakan.)