Ilung di Danau Baruh Bahinu

TVRI Kalsel, Paringin -- Tukang haragu wadah wisata Danau Baruh Bahinu di Balangan ngalu kapala dapatnya ilung wan kumpai. Ilung wan kumpai sabat banar, manukupi danau. Danau nang asalnya luas, bakipit. Nang tukang haragu bilang kada kaawakan mambarasihi.

Ujar nang tukang haragu, M. Abidin, Pamarintah Balangan sadikitannya mambari duit gasan maharagu wan mambarasihi Danau Baruh Bahinu. Marga itu, bubuhan Sadar Wisata satatayuhnya haja mambarasihi ilung wan kumpai nang sabat. Dinas Pakarjaan Umum Balangan kada manuntung jua mambarasihi. Ujar, duitnya kada mayu.

Pawadahan Sadar Wisata Baruh Bahinu kada sanggup lagi mambuangi ilung wan kumpai nang sudah diangkat ka darat. Marga itu, ilung wan kumpainya dituyuk di tabing haja. Lawas kalawasan, danaunya bakipit.

Danau Baruh Bahinu andaknya di Kampung Baruh Bahinu Dalam, Paringin Selatan. Kada jauh pada Paringin. Panjangnya mandua pal-an. Jalan nang tuju ka sana, nyaman haja. Saban hari Ahad, banyak warga nang bakunjangan ka mari. Lain pada gasan wadah raunan, Danau Baruh Bahinu dipakai warga gasan manggaduh iwak di karamba, tamasuk gasan wadah latihan balanjaan jukung.

M. Abidin handak, Pamarintah Balangan mahatiakan Danau Baruh Bahinu. Maginnya pulang, inggan ini di Bumi Sanggam balum ada undas wisata. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 24.08.2014, Pukul Lima kamarian. Matan Balangan, Fitri, TVRI Kalimantan Selatan, mahabarakan.)