40 Tahun Maambil Upah Mambaiki Payung

TVRI Kalsel, Banjarmasin -- Wayah ini, maambil upah mambaiki payung kada sarami bahari. Tagal, magun ada haja lagi nang manggawi. Muhammad Fadlan Binson, nang sudah 40 tahun labih maambil upah mambaiki payung, bapadah, musim hujan babarakat banar sagan tukang payung. Nang mambaiki payung lawan sidin, di pinggir kartak Jalan Ahmad Yani, Pal 4,5, Banjarmasin, tabanyak pada biasanya.

Muhammad Fadlan Binson, nang barumah di Kelayan, kada suah marista diri. Bujur umur sudah 75 tahun, sidin tatap bacari. Matan Kelayan, ka gawian, kada paparakan. Nang ngaran sudah gawian hari-hari, asa biasa haja.

Wayah musim hujan ni, rajaki sidin batambah, tabanyak pada musim kumarau. Mun hujan, banyak urang bapayung. Banyak payung nang rusak, ditampur angin wan hujan, atawa marga mambarang pakai.

Di umurnya nang tuha, Muhammad Fadlan Binson sudah kada talalu bahimat lagi bacari. Sidin manyukuri rajaki nang dibari Tuhan, asal mayu sagan makan. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 17 Nupimbir 2013, Pukul lima kamarian. TVRI Kalimantan Selatan, mahabarakan.)