TVRI Kalsel,
Tanah Laut -- Daun rumbia magun haja dipakai warga banua Banjar sagan hatap
rumah. Rumah warga Kampung Kuala Tambangan, Takisung, Tanah Laut, sapalihan
magun haja bahatap rumbia.
Banyaknya rumah
warga nang bahatap rumbia, jadi usaha Nini Saidah. Hari-hari, sidin maulah hatap rumah atawa mahambit.
Anak sidin nang mancariakan daunnya, di hutan nang kada jauh pada kampung.
Saban hari, sidin sanggup maulah bapuluh-puluh kaping hatap rumbia, sagan
dijual ka urang nang batampah. 100 kaping hatap, dijual sidin Rp 80 ribu.
Hasilnya mayu haja sagan hidup sidin hari-hari.
Nang digawi Nini
Saidah bagus banar jadi tauladan bubuhan nang anum-anum. Bujur umur tuha, sidin
rajin haja lagi bagawi. Sidin indah batanai, maginnya mangalihi urang, tamasuk mangalihi
anak, cucu wan minantu sidin saurang. (*) [ysas]
(“Habar Banua”, TVRI
Kalimantan Selatan, Banjarmasin. Siaran Ahad, 17 Nupimbir 2013, Pukul lima
kamarian. TVRI Kalimantan Selatan, mahabarakan.)
Tidak ada komentar:
Posting Komentar