Mobil Branding Calun Wakil Rakyat

TVRI Kalsel, Banjarmasin -- Bujur ditangati maandak gambar di mutur wan taksi angkutan umum, tagal calun wakil rakyat kada habis akal. Sapalihan maandak gambarnya di mutur. Basa lautnya, “mobil branding”. Tukang ulah mobil branding di Banjarmasin kada kasintakan hinak, marga kabanyakan gawian.

Munir tamasuk nang ahli manggawi mobil branding. Inya wan kakawalannya siap manggawi, matan maulah gambar, malikapi wan maharagu hasil gawiannya. Ujarnya, sabulanan ni haja sudah barapa calun wakil rakyat nang maulah mobil branding. Upahnya tiga satangah sampai lima satangah juta sabuah, tuntungnya ampat-lima hari sampai saminggu.

Ujar Munir, nang tabanyak minta ulahakan bubuhan PDI Parjuangan, PPP, wan lain-lain. Inya himung, bubuhan partai pulitik rajin babawaan kawan baulah mobil branding di wadahnya. Ujarnya, nang ngaran sudah gawian hari-hari, maulahnya nyaman haja. Waktu manggawinya banar ai nang kurang, magin mun tabarungan banyak pasanan.

Lain pada manggawi mobil branding, Munir manggawi napa haja nang sagan kampanye calun wakil rakyat, nang kaya pin, cangkir, cap, wan lain-lain. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 1 Disimbir 2013, Pukul lima kamarian. Rachma Ainun, TVRI Kalimantan Selatan, mahabarakan.)