TVRI Kalsel, Banjarmasin --
Kalakuan bubuhan nang anum-anum di Banjarmasin sapalihan sudah sasain liwar.
Bangat banar. Sudah sasain bibas. Marga balum cukup umur, banyak nang minta
surat ijin kawin di Pangadilan Agama Banjarmasin. Surat ijin kawin diminta di
Pangadilan Agama, gasan mangawinakan anak nang balum cukup umur.
Tahun 2012, nang minta surat
ijin kawin 68 ikung. Tahun 2013 ni, inggan bulan Uktubur samalam haja, sudah 46
ikung nang minta surat ijin kawin.
Ujar tukang catat di
Pangadilan Agama Banjarmasin, Nuzuliah, Pangadilan Agama paksa mambari surat ijin,
marga bibiniannya sudah “bangkak parutnya”, atawa batianan.
Minta surat ijin kawin gasan
anak nang balum cukup umur, kada gagampangan. Banyak syaratnya. Marga itu, nang
kawitan sapalihan hakun mangawinakan anaknya “di bawah tangan”, atawa “kawin
agama” haja. Padahal, ujar Nuzuliah, kawin nang sah manurut agama wan
pamarintah tu mustinya di KUA, Pangadilan Agama, atawa Catatan Sipil. (*)
[ysas]
(“Habar Banua”,
TVRI Kalimantan Selatan, Banjarmasin. Siaran Ahad, 10 Nupimbir 2013. Ratna Sari
Dewi, Yusar Wardana, TVRI Kalimantan Selatan, mahabarakan.)
Tidak ada komentar:
Posting Komentar