Supir Unjuk Rasa, Taksian Pal Anam Sunyi

TVRI Kalsel, Banjarmasin -- Supir Taksian Pal Anam, Banjarmasin, turunan pulang baunjuk rasa. Bubuhannya indah taksian dipindah ka Pal Tujuh Blas, Kabupaten Banjar.

                                                                          

Katua Organda Taksian Pal Anam, Banjarmasin, Hamidan, bapadah, bubuhan supir unjuk rasa imbah mandangar habar Taksian Pal Tujuh Blas cagar cucubaan dipakai. Ujar Hamidan, biar dimapa jua kahandak pamarintah mamindah taksian, supir banua kadada nang hakunnya.

Baratus-ratus taksi L-300 wan bis samunyaan jurusan nang ada di Taksian Pal Anam bajurut tulakan ka DPRD Kalimantan Selatan wan Kajaksaan Tinggi. Ayungannya, Taksian Pal Anam sunyi. Mun kada parai lalu manaksi, supir lain kadada nang waninya maangkut panumpang. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 24 Nupimbir 2013, Pukul lima kamarian. Ibnu Fatih, Sineda, TVRI Kalimantan Selatan, mahabarakan.)