Batanding Madihin Sabanua Kalimantan Selatan

TVRI Kalsel, Banjarmasin -- Sakira jangan langlam, adat budaya banua musti diharagu. Tamasuk madihin, nang sudah jadi ciri kasanian asli Banjar. Urang di mana-mana sudah tahuan, madihin ampun urang Banjar.

Banyak pamadihinan nang umpat Batanding Madihin Sabanua Kalimantan Selatan, di palataran Musium Wasaka, Banua Anyar, Banjarmasin, Arba (04/12/2013) samalam. Lain-lain parigal wan idabulnya. Nang malihat, lucut tatawaan, rahat ada pamadihinan nang syairnya balulucuan. Rami urang basurah wan baampikan.

Kapala Disporabudpar Kalimantan Selatan, Mohandas Hendrawan, bapadah, kasanian asli Banjar ni musti dijaga, jangan sawat langlam. Marga itu, Disporabudpar Kalimantan Selatan maulah gawi Batanding Madihin Sabanua, sagan mancari bibit pamadihinan.

Nang manilainya jagau-jagau madihin di banua: John Tralala, Anang Syahrani wan budayawan Mukhlis Maman atawa “Julak Larau”. John Tralala wan Anang Syahrani tamasuk undasnya pamadihinan banua, “Julak Larau” puhun gawi “Warung Bubuhan” wan “Kisah Kamarian” di “Tipi-nya Urang Banua”. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 08/12/2013, Pukul lima kamarian. Ibnu Fatih, Mawan Himawan, TVRI Kalimantan Selatan, mahabarakan.)