Musim Hujan, Iwak Haruan Kadadaan

TVRI Kalsel, Banjarmasin -- Urang Banjar katuju banar makan iwak haruan. Tagal, sudah saminggu labih iwak haruan kada tapi ada di pasar. Mun ada jua, haraganya larang banar, naik 30-40 % sakilu. Wayah musim musim hujan, iwak haruan kadadaan. 

Ujar nang bajual iwak, Suri, nang ngaran iwak alam, iwak haruan saban tahun dasar kadadaan talu bulanan. Bulan talu atawa bulan ampat tahun dihadap, hanyar ada pulang. Iwak haruan nang diatar bubuhan paiwakan ka wadahnya sadikit banar jua, saparu pada biasanya. Marga itu, inya kada banyak bajual.

Tukang sayur kuliling, damintu jua, sapalihan sudah kada bajual iwak haruan lagi. Haraganya sudah Rp 60 ribu sakilu.

Urang Banjar katuju iwak haruan sagan makan nasi kuning, katupat atawa lontong. Mama Reza, nang bajualan nasi kuning, paksa mahalusi ukuran iwak haruannya pada biasa, sakira kada malarangi haraganya.

Ujar Mama Reza, haraga iwak haruan nang larang ni biasa haja. Kaina tabulik asal jua. Musim tanam kaina, haruan cangulan pulang, haraganya kaya biasa pulang. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 08/12/2013, Pukul lima kamarian. Rachma Ainun, TVRI Kalimantan Selatan, mahabarakan.)