Hasil Pamariksaan Ombudsman Sagan Bahan Mambaiki Gawian

TVRI Kalsel, Banjarmasin -- Imbah dipariksa Ombudsman Parwakilan Kalimantan Selatan, hanyar katahuan, parak samunyaan dinas wan SKPD Pamarintah Kalimantan Selatan ba-cap habang. Artinya, balum baik malayani warga. Dinas-dinas wan SKPD Pamarintah Banua dianggap balum bujur-harus bagawian, sasuai Undang-Undang Numur 25 Tahun 2009.

Wakil Hubnur Kalimantan Selatan, Rudy Resnawan, rahat ditakuni wayah Milad 42 Tahun KORPRI, lapang dada haja. Ujarnya, hasil pamariksaan Ombudsman kawa jadi bahan, sagan pamarintah mambaiki gawian. Sakira dinas-dinas wan SKPD nang ada bujur-harus bagawi malayani warga. Dinas-dinas wan SKPD nang dapat cap habang, kada parlu dihukum. Samunyaan musti bujur-harus bagawi, sasuai aturan Undang-Undang.

Ujar  Ombudsman, matan 33 dinas wan SKPD  Pamarintah Kalimantan Selatan, hanyar 45 % nang bagawi sasuai Undang-Undang. 97 %-nya, balum. Undang-Undang Numur 25 Tahun 2009 manyuruh samunyaan dinas wan SKPD pamarintah di Indunisia bujur-harus bagawi malayani warga. (*) [ysas]

    

(“Habar Banua”, TVRI Kalimantan Selatan, Banjarmasin. Siaran Ahad, 15/12/2013, Pukul lima kamarian. Ratna Sari Dewi, Junaedi, TVRI Kalimantan Selatan, mahabarakan.)