Kain Pagatan Sagan Baju Muslim

TVRI Kalsel, Tanah Bumbu -- Lain pada kain sasirangan, di Kalimantan Selatan ada jua kain Pagatan. Sakira warga magin katuju, Pamarintah Kabupaten Tanah Bumbu maulah gawi maarai baju Muslimah, pakai kain Pagatan. Pawadahan bibinian di Tanah Bumbu, rami umpatan.

Baju bibinian nang bahannya kain Pagatan kada kalah langkarnya lawan kain banua lain. Samunyaan diarai, ditampaiakan. Indruk bakambang-kambang wan tangkuluk nang dipakai, liwar bungasnya. Ada jua kain mudil bumbang, basa Bugis nang artinya “galumbang”. Kain bumbang sudah jadi ciri budaya warga Pagatan nang andaknya di pinggir laut.

Maarai baju Muslimah bakain Pagatan ni sagan Hari Ibu. Diharap, kaina hingkat sagan baju Muslim. Sabalumannya, kain Pagatan sagan baju adat haja.

Pamarintah Tanah Bumbu sudah mambari alat sagan bubuhan nang baulah kain Pagatan, di Kampung Mudalang, Kacamatan Kusan Hilir, tamasuk malajari cara baulah kainnya. Kain asli matan Bumi Bersujud ni rahat mambawa ngaran Kalimantan Selatan di banua lain. Bahara kain Pagatan ada salawasan. (*) [ysas] 

(“Habar Banua”, TVRI Kalimantan Selatan, Banjarmasin. Siaran Ahad, 22/12/2013, Pukul lima kamarian. Matan Tanah Bumbu, Alam, TVRI Kalimantan Selatan, mahabarakan.)