Buah Naga di Tanah Laut

TVRI Kalsel, Pelaihari -- Mun urang banua Banjar sapalihan balum tahu awan buah naga, wajar haja. Buah naga lain buah asli Kalimantan Selatan. Tagal, di Tanah Laut, buah naga banyak ditanam.

Batanam buah naga kada sadikit huhuwasnya. Pupuk larang, hama panyakitnya kada kurang-kurang. Banyak nang handak batanaman buah naga, tagal kada tahu dimapa caranya.

Aril, nang bakabun buah naga di Kintap, bingung handak batakun awan siapa wan di mana. Ujarnya, di wadahnya kadada argawai Balai Panyuluhan Partanian. Inya balum pangalaman batanam buah naga. Wayah tanamannya kana hama, inya kipuh, kada karuan tampuh. Inya maubati, mambuangi rapun wan daun buah naganya nang mati-mati haja, sakira jangan malalar ka lain.

Kabun buah naga ampun Haji Imam Malik di Tajau Pecah, lain pulang kisahnya. Samunyaan sigar. Hasilnya baik banar. Saban hari, Haji Imam Malik mamutik tangah dua ratus inggan dua ratus kilu buah naga di kabunnya. Dijual salawi ribu sakilu.

Imbah dijarang, ujar banyu buah naga baik banar dikinum sagan kasihatan. Sagan mangurangi darah tinggi wan lain-lain. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 09/03/2014, Pukul Lima kamarian. Matan Pelaihari, Jamaludin, TVRI Kalimantan Selatan, mahabarakan.)