Kasturi Ngalih Dicari

TVRI Kalsel, Kartak Hanyar -- Kasturi tamasuk buah asli nang tumbuh di Tanah Banjar. Ngaran Latin-nya mangifera delmiyana. Awan bakantan (ngaran Latin-nya nasalis larvatus), kasturi jadi ciri buah wan satua Kalimantan Selatan.

Bujur sudah musim buah, tagal kasturi pina ngalih dicari. Padahal, musim kasturi rajin bagiringan haja awan musim durian, tiwadak, rambutan, ramania wan kalangkala.

Ujar Acil nang bajualan, tahun ini buah kasturi dasar kada banyak. Padahal, saban tahun, saban bulan dua, rajin banyak nang maatarinya. Tahun ini, sadikitannya. Ujar sidin, kasturi nang dijualnya asalnya matan Astambul. Marga sadikitannya, haraganya talarang. Saribu sabigi.

Kasturi tamasuk buah asli banua nang kadada duanya. Nang musti ditakunakan, napa di Tanah Banjar kada tadangar nang batanaman atawa bakabun kasturi? Sakira kasturi jangan hilang di Bumi Antasari. (*) [ysas]    

(“Habar Banua”, TVRI Kalimantan Selatan, Banjarmasin. Siaran Ahad, 09/03/2014, Pukul Lima kamarian. Ratna Sari Dewi, Ten Umaiyah, TVRI Kalimantan Selatan, mahabarakan.)